جاڭا تەح پاسپورت كورشى ەلدەردەن كولىك ساتىپ الۋدى وڭايلاتادى
جاڭا قۇجاتتىڭ نەگىزىنە بارلىق زاماناۋي تالاپتارعا ساي دەپ تانىلعان رەسەيلىك تەحنيكالىق پاسپورت الىنباق كورىنەدى. جاڭا جۇيەگە وراي كەلەر جىلدان باستاپ كەدەندىك وداق ەلدەرىنىڭ ازاماتتارى كولىكتى ساتۋ-ساتىپ الۋ ارەكەتتەرىن ەش كەدەرگىسىز جاساي الادى. نەگىزى مۇنداي جوبانى 2013-جىلى ەنگىزۋ كوزدەلگەندى. الايدا، ول كەزدە ءبازبىر سەبەپتەرمەن كەيىنگە قالدىرىلعان بولاتىن.
كولىكتىڭ تەحنيكالىق پاسپورتىنىڭ ءبىرىڭعاي فورماسى قازعاز جانە ەلەكتروندى فورماتتا بولادى. ەلەكتروندى قۇجات باسقا ەلدەن ساتىپ الىنعان كولىكتى راسىمدەۋدە ءبىرقاتار جەڭىلدىكتەر بەرەدى. مىسالى، بۇعان دەيىن رەسەيلىكتەر قازاقستان جانە بەلارۋس ەلدەرىنەن كولىك ساتىپ العاندا ءبازبىر قيىندىقتارمەن بەتپە-بەت كەلەتىن.
ولار الدىمەن رەسەيلىك كەدەن مەكەمەسىندە كولىككە جاڭا تەحنيكالىق پاسپورت راسىمدەپ، سونان سوڭ كولىكتىڭ ەۆرو-5 كە سايكەستىگى تۋرالى سەرتيفيكات الۋى ءتيىس بولاتىن. سودان كەيىن عانا كولىكتى جول پوليتسياسىندا تىركەيتىن. جاڭا جىلدان باستاپ مۇنداي قيىندىقتار جويىلادى. ساراپشىلاردىڭ پايىمداۋىنشا، بۇل جوبا كەدەندىك وداق ەلدەرى اراسىنداعى كولىك ساۋداسىنىڭ ارتۋىنا وڭ ىقپال ەتەتىن بولادى، اسىرەسە، ەكىنشى نارىقتاعى كولىك ساۋداسى كۇشەيەدى.
سونداي-اق قازاقستاندىق ازاماتتار رەسەيدەن كولىك ساتىپ العاندا ونى ەش كەدەرگىسىز ءوز تۇراقتى مەكەن-جايى بويىنشا تىركەۋگە قويا الادى. مىسالى، ءبىزدىڭ ەلدىڭ ازاماتى رەسەيدەن كولىك ساتىپ السا، ول سول جاقتان جاڭا تەح پاسپورت الادى دا، ءوزى تۇراتىن قالاعا كەلىپ جول پوليتسياسىنا تىركەۋگە قويادى.
جاڭا كولىك ساتىپ العاندا كولىككە تەحنيكالىق پاسپورتتى ديلەرلەر نەمەسە اۆتوسالوندار راسىمدەيدى.
مامانداردىڭ ايتۋىنشا، بۇل جوبانىڭ باستى ارتىقشىلىعى - ەلەكتروندى تەح پاسپورتتىڭ ءبىرىڭعاي اقپاراتتىق الاڭدا بولۋى جانە ءبىرىڭعاي باقىلاۋدا ۇستالۋى. كەز كەلگەن كولىككە قاتىستى اقپارات ورتاق بازادا ساقتالادى. ونى ءاربىر ەلدىڭ قۇزىرلى ورگاندارى تەكسەرۋ مۇمكىندىگىنە يە. بۇل ءوز كەزەگىندە ۇرلانعان جانە كەدەندىك تازارتۋدان وتپەگەن كولىكتەردىڭ ساتىلۋىنا توسقاۋىل بولادى. ياعني، زاڭسىز كولىك ساتۋ بيزنەسىنىڭ جولىن كەسۋگە مۇمكىندىك بەرەدى.
ەسكەرتە كەتەتىن جايت، بۇل جۇيەنىڭ وڭ رولدى كولىكتەرگە قاتىسى جوق. وزگە ەلدەن ساتىپ الىنعان وڭ رولدى كولىكتى جول پوليتسياسىنا تىركەۋگە قويا المايسىز. ويتكەنى، قازاقستانعا وڭ جاق رولدى كولىكتەردى اكەلۋگە تىيىم سالىنعان. الايدا، ونداي كولىكتەردى سەنىمحات ارقىلى باسقارۋعا رۇقسات ەتىلەدى.
اۆتور: قالدار كومەكبايەۆ
«الاش ايناسى»
