ءبىر انمەن- اق جارق ەتكەن جۇلدىزدار
ءانشى كوپ- اۋ، كوپ بولا بەرسىن، ءبىراق سول كوپتىڭ قاتارىن تولىقتىرىپ جۇرگەندەردىڭ ەستە قالار ەرەكشە ءانى بار ما دەگەن سالماقتى ساۋال تۋىنداعاندا ءتىلىمىز تۇساۋلانىپ قالادى- اق.. .
وسىدان جيىرما جىل بۇرىن تىنىشباي راقىمنىڭ «التايدىڭ ار جاعىنان كەلگەن ارۋ» اتتى ءانى شىققاندا بىردەن تىڭدارماننىڭ قۇلاق قۇرىشىن قاندىرعانى ەستە. ءانى مەن اۋەزى، ءسوزى مەن سازى ۇيلەسكەن كەرەمەت ءان ءوز ورىنداۋشىسىن اداسپاي تاپقانى تاعى دا قۋانتقان. ساكەن قالىموۆتىڭ قوڭىر داۋىسى وسى ءبىر ءاندى تىڭدارماننىڭ جۇرەگىنەن ويىپ تۇرىپ ورىن الىپ بەردى. ارادا قانشاما جىل وتسە دە اۋەزدى ءان مەرەكەلىك كەشتەردىڭ كورىگىن قىزدىرىپ ءجۇر. تىڭدالماي تاسادا قالىپ كەتكەن كەزى جوق. وسى اننەن كەيىن ساكەن قالىموۆتىڭ جۇلدىزىن جاندىرعان ءان جولىقپادى ما، الدە باسقالاي سەبەبى بار ما، ساحنادان كورىنبەي كەتتى. ءبىراق قالىڭ تىڭدارمان ونىڭ كەرەمەت داۋىسىن ءالى دە ۇمىتقان جوق. ۇمىتپايتىن دا شىعار. ءبىر انمەن عانا تاريحتا قالۋ دەگەن وسى بولار، بالكىم؟ !..
ءاۋ باستا «اقمارجان» ءانى شىققاندا ورىنداۋشىسى كىم ەكەن دەپ ەل ەلەڭدەي كوپ كۇتتى. داۋسىنا قاراپ جاس ەمەس، جاسامىس ەكەنى بىردەن بىلىنەتىن. اۋەزى ەرەك، بولمىسى بولەك ءان بىردەن جۇرەكتى جاۋلاپ العانداي ەدى. راديودان، ودان قالسا ديسكىلەردەن وسى ءاندى ەستىپ قالسا ەلەڭ ەتپەيتىن ەل جوق- تى. ورىنداۋشىسى دا كوپكە كورىنبەي كوپ كۇتتىردى. اقىرى ارادا قانشاما ۋاقىت وتكەندە بارىپ قانا زاتتىبەك جارق ەتىپ شىعىپ، «اقمارجاننان» دا ادەمى اندەرىن تارتۋ ەتتى.. .
ودان بەرى دە «قازاق راديوسىنان» قالقامان ساريننىڭ سوزىنە جازىلعان «جىبەك سەزىم» اتتى ءاندى ەرەكشە ىقىلاسپەن تىڭدايتىن جۇرت. ءسوز ارقىلى سەزىمنىڭ نازىك قىلىن تەربەگەن كەرەمەت انگە اۋەزى قوسا ۇيلەسىپ تىڭدارمانىن وزىنە ىنتىقتىراتىن. ورىنداۋشىسى كلارا تولەنبايەۆا ەكەنىن بەرتىندە بىلدىك. وسى ءان ساحنادا سيرەك ورىندالدى. سول سەبەپتەن دە كلارا تولەنبايەۆانىڭ ورىنداۋىندا دا وتە سيرەك كورەتىنبىز. ءبىراق «قازاق راديوسى» ۇنەمى بەرىپ كەلەدى. جاقىن جۋىقتارىنا قۇتتىقتاۋ جولداعىسى كەلگەندەر دە ۇنەمى وسى ءاندى بەرۋىن سۇراپ جاتادى. تالايلاردىڭ جۇرەگىن جىبىتكەن، سەزىم پەرنەسىن ءدوپ باسقان مۇنداي اندەر كوپ ەمەس.. .
بۇگىندە جۇرت داڭعىر- دۇڭعىر اندەردەن جالىقتى. بۇگىن بار، ەرتەڭ- اق ۇمىتىلاتىن اننەن كورى كوكەيگە ۇيالاپ قالاتىن، كوپكە دەيىن ىڭىلداپ ايتىپ جۇرەتىندەي ۇمىتىلمايتىن ءان شىعارىپ تاريحتا اتى قالعان قانداي جاقسى! ايتپەسە جىلتىراعى باسىم حيت ءان شىعاراتىن سازگەر- سىماقتار بۇگىندە اننان مۇننان ۇرلاپ، جىرلاپ قالتا قامىن عانا قۋىپ كەتكەندەي. ءبىر ءسات تىڭدارماننىڭ دا وبالىن ۇمىتپاعان دۇرىس- اۋ.. .
اۆتور: ناركەس ناربايەۆا
«الاش ايناسى»
