ن. نازاربايەۆ: قازاقستان فرانسۋز ستۋدەنتتەرىنە ارنايى كۆوتا بولەدى
«ءبىز قازاقستاندىق بالالاردىڭ فرانسۋز ءتىلىن مەڭگەرۋىنە جاعداي جاسالعانىن قالايمىز، فرانسيادا وقۋعا قازاق ستۋدەنتتەرى مۇمكىندىك الىپ جاتسا، نۇر ۇستىنە نۇر. قازاقستان قازاق تاريحىن، ءتىلىن مەڭگەرىپ، ءبىزدىڭ ءوڭىردى زەرتتەۋ ءۇشىن فرانسۋز ستۋدەنتتەرىنە ارنايى كۆوتا بولەر ەدىك»، - دەدى پرەزيدەنت.
ەلباسى فرانسيامەن اراداعى قارىم- قاتىناستار اياسىندا قازاق جاستارىن ينجەنەرلىك- تەحنيكالىق ماماندىقتار بويىنشا وقىتۋدى قالايتىندىعىن باسا ايتتى.
«بىزدە بۇل سالادا ۇلكەن تاجىريبەمىز بار. 2010 - جىلدان بەرى Total كومپانياسىنىڭ قولداۋىمەن قاراعاندى تەحنيكالىق ۋنيۆەرسيتەتىندە دانەكەرلەۋشىلەر ينستيتۋتى قۇرىلدى. ماعان بۇل فاكتىنى حابارلاۋ اسا جاعىمدى كوڭىل كۇيگە بولەيدى. سەبەبى مەن ءوزىم كەزىندە سول ۋنيۆەرسيتەتتە وقىعان بولاتىنمىن»، - دەپ ءتۇيدى ويىن مەملەكەت باسشىسى.
اۆتور: جاسۇلان جولدىبايەۆ
