فرانسيا قازاقستاننىڭ جوعارى وقۋ ورىندارىمەن بايلانىستى تەرەڭدەتۋگە دايىن

 استانا. قازاقپارات - فرانسيا قازاقستاننىڭ جوعارى وقۋ ورىندارىمەن بايلانىستى تەرەڭدەتۋگە دايىن. بۇگىن قازاقستانعا مەملەكەتتىك ساپارمەن كەلگەن فرانسيا رەسپۋبليكاسىنىڭ پرەزيدەنتى فرانسۋا وللاند اقوردادا مەملەكەت باسشىسى نۇرسۇلتان نازاربايەۆپەن كەزدەسۋىنەن كەيىن بىرلەسكەن مالىمدەمە بارىسىندا وسىلاي دەدى.

«ءبىلىم بەرۋ سالاسىنداعى ىنتىماقتاستىققا كەلسەك، قازاقستان جوعارى وقۋ ورىندارىن دامىتۋعا مۇددەلى، ال ءبىز ءوز تاراپىمىزدان بۇنى قولداۋعا دايىنبىز. وسى باعىتتا اليانس قۇرىپ، اسا جوعارى دەڭگەيدە ىنتىماقتاستىق جۇرگىزۋگە دە ءازىرمىز. بۇل رەتتە ديپلومداردى، ۋنيۆەرسيتەتتىك دەڭگەيلەردى ءوزارا مويىنداۋ، قازاقستاننىڭ جوعارى وقۋ ورىندارىمەن ۋنيۆەرسيتەتتەرارالىق ءوزارا بايلانىس ماسەلەسىن تەرەڭدەتۋگە ءازىرمىز. ال قول قويىلعان كەلىسىم عىلىمي زەرتتەۋلەر، ۋنيۆەرسيتەتتەردىڭ ىنتىماقتاستىعىن دامىتادى» ، - دەدى فرانسۋا وللاند.

 سونىمەن قاتار، فرانسيا باسشىسى ەرتەڭ الماتى قالاسىندا ورتالىق ازياداعى العاشقى سوربوننا ينستيتۋتىنىڭ فيليالى سالتاناتتى جاعدايدا اشىلاتىنىن تىلگە تيەك ەتتى. «مەنىڭ ويىمشا، ءبىز وسى ارقىلى قازاقستان مەن فرانتسيانىڭ باسقا دا بەدەلدى ۋنيۆەرسيتەتتەرى اراسىنداعى بايلانىسقا جول اشامىز. وسى رەتتە فرانسۋز ءتىلىن دامىتۋدىڭ جايى دا وزەكتى دەگىم كەلەدى. بۇل ەكى مەملەكەتتىڭ مادەني ىنتىماقتاستىعىن تەرەڭدەتۋگە ءوز سەپتىگىن تيگىزەر ەدى» ، - دەدى ف. وللاند.

اۆتور: قانات مامەتقازى ۇلى