13:33, 05 - جەلتوقسان 2014 | GMT +5
قازاقستان ءىرى ساياسي وقيعالارعا ىقپال ەتۋگە قاۋقارلى مەملەكەت - فرانسۋا وللاند
استانا. قازاقپارات - فرانسيانىڭ قازاقستانمەن ىنتىماقتاستىقتى نىعايتۋدا قىزىعۋشىلىعى مول. بۇل تۋرالى بۇگىن اقوردادا مەملەكەت باسشىسى نۇرسۇلتان نازاربايەۆپەن كەڭەيتىلگەن قۇرامداعى كەلىسسوزدەر بارىسىندا قازاقستانعا مەملەكەتتىك ساپارمەن كەلگەن فرانسۋز رەسپۋبليكاسىنىڭ پرەزيدەنتى فرانسۋا وللاند ءمالىم ەتتى.
2008-جىلى ەكى ەل اراسىندا ستراتەگيالىق ارىپتەستىك تۋرالى كەلىسىمگە قول قويىلعانىن ەسكە سالىپ وتكەن فرانسيا باسشىسى: «اتاپ ايتقاندا، فرانسيالىق ينۆەستيتسيالاردىڭ قازاقستاندا تۇراقتى ءوسىمى بايقالۋدا. مەنىمەن بىرگە مينيسترلىكتەردىڭ، پارلامەنتتىڭ، كاسىپورىنداردىڭ، ۋنيۆەرسيتەتتەردىڭ وكىلدەرى قامتىلعان ۇلكەن دەلەگاتسيانىڭ كەلۋى فرانسيانىڭ ورتالىق ازياداعى ءىرى ەكونوميكاسى بار قازاقستانمەن ىنتىماقتاستىقتى نىعايتۋدا قىزىعۋشىلىعى مول ەكەندىگىن بايقاتادى»، - دەدى.
وسى ورايدا ول قازاقستان ەكونوميكالىق الەۋەتىن تابىستى جۇزەگە اسىرعانىن، سونىمەن قاتار ەلىمىز الەمدە ماڭىزدى ساياسي جانە ديپلوماتيالىق ءرولدى اتقارىپ وتىرعاندىعىن، قازاقستان ءىرى ساياسي وقيعالارعا ىقپال ەتۋگە قاۋقارلى ەكەندىگىن قاداپ ايتتى.
اۆتور: رۋسلان عابباسوۆ
