فرانسيا قازاقستاننىڭ جەتەكشى ساۋدا ارىپتەسى بولىپ تابىلادى - ن. نازاربايەۆ
«ءسىزدىڭ ساپارىڭىز ءبىزدىڭ ۇلتتىق مەرەكەمىز تاۋەلسىزدىك كۇنى قارساڭىندا ءوتىپ وتىر. قازاقستاندىقتار ءبىزدىڭ تاۋەلسىزدىگىمىزدى العاشقى بولىپ مويىنداعان فرانسيا ەكەنىن بىلەدى، سونىمەن بىرگە تاۋەلسىز قازاقستانعا ەڭ ءبىرىنشى ساپار جاساعان تۇڭعىش ەۋروپالىق ليدەر فرانسۋا ميتتەران بولاتىن. وسى جىلدار ىشىندە ءبىز بىرلەسە جۇمىس ىستەپ كەلەمىز، ستراتەگيالىق ارىپتەستىك تۋرالى كەلىسىمىمىز دە بار. وسىنىڭ ءوزى ءبىراز جايتتى اڭعارتادى»، - دەدى ن. نازاربايەۆ.
بۇدان بولەك، ەلباسى رەسمي پاريجدىڭ استانادا ە ق ى ۇ سامميتىن وتكىزۋ تۋرالى باستامانى العاشقىلاردىڭ ءبىرى بولىپ قولداعانىن، سونىمەن بىرگە فرانسيا قازاقستاننىڭ جەتەكشى ساۋدا ارىپتەسى ەكەنىن اتاپ ءوتتى.
«فرانسيا ءبىز ءۇشىن ءىرى ينۆەستور، قازىرگى تاڭدا جۇزدەن استام كومپانيالار فرانسۋز كاپيتالىنىڭ قاتىسۋىمەن جۇمىس ىستەپ جاتىر. ءبىز ءبىلىم بەرۋ سالاسىندا دا ىنتىماقتاسامىز. استانادا بۇگىن جوعارۋ وقۋ ورىندارىنىڭ بەسىنشى فورۋمى وتەدى، الماتىدا ورتالىق ازيادا العاش رەت سوربوننا ينستيتۋتىنىڭ فيليالى اشىلىپ وتىر. ءبىزدىڭ ەلوردامىزدا پرەزيدەنت شارل دە گوللگە ەسكەرتكىش اشىلاتىنىن بىلەسىزدەر. ول 1966-جىلى ساپارىندا بايقوڭىر ايلاعىندا بولىپ قايتقان ەدى»، - دەدى مەملەكەت باسشىسى.
اۆتور: قانات مامەتقازى ۇلى
