ۋكراينانىڭ جاڭا پارلامەنتىندە العاشقى توبەلەس بولدى - كەسكىن/ فوتو
بىرنەشە دەپۋتات داۋىس بەرۋ راسىمىنە نارازى بولىپ، مىنبەرگە جاقىنداپ كەلدى دە، قارسىلىقتارىن بىلدىرە باستادى. 2014-جىلدىڭ اقپانىندا يانۋكوۆيچكە ۋلتيماتۋم ۇسىنعان مايدان بەلسەندىسى، حالىق دەپۋتاتى ۆلاديمير پاراسيۋكتىڭ داۋىسى بارىنەن وكتەم شىقتى.
پاراسيۋك پ پ ب دەپۋتاتتارىنا مايداننىڭ ادىلدىك ءۇشىن كۇرەسكەنىن ەسكە سالىپ، كوميتەت باسشىلارىن تاعايىنداۋدا ادىلدىكتى قامتاماسىز ەتۋى ءۇشىن دەپۋتاتتاردىڭ جارتى ساعات ارتىق جۇمىس ىستەۋى كەرەك ەكەنىن ايتتى. ءبىراق قارسىلاستارى وعان «بۇل جەر ساعان مايدان ەمەس، ورنىڭا وتىر!» دەپ ايقايلادى، توبەلەستىڭ شىعۋىنا دا سول سەبەپ بولدى. توبەلەسكە بوريسلاۆ بەرەزا، يۋري ليەۆچەنكو، ەگور سوبوليەۆ سياقتى دەپۋتاتتار دا ارالاستى.
توبەلەس باسىلعاننان كەيىن پ پ ب دەپۋتاتى رۋسلان كنيازيەۆيچ داۋىس بەرۋدىڭ رەگلامەنتكە ساي وتكەنىن مالىمدەدى. ول حالىق دەپۋتاتتارىنا زاڭداردان ايىرماشىلىعى قاۋلى جوبالارىنا نەگىزىنە قاراي جانە تۇتاس كۇيىندە دە داۋىس بەرۋگە بولاتىنىن ەسكە سالدى.
ءسويتىپ، بۇگىن ۋكراينانىڭ جوعارعى راداسى 1004№ قاۋلىنىڭ جوباسىن ماقۇلداپ، 27 كوميتەتتى قۇردى. 4- جەلتوقسان كۇنى پارلامەنت وتىرىسىندا قۇجاتقا زالدا تىركەلگەن 375 حالىق دەپۋتاتىنىڭ 270 ءى داۋىس بەردى. داۋىس بەرۋگە وپپوزيتسيا بلوگى قاتىسپادى، ولاردىڭ پىكىرىنشە، وپپوزيتسيا وكىلدەرىنە كوميتەتتەردە كۆوتا بولىنبەگەن. ءۇش كوميتەت ءتوراعاسىز قالدى: قۇرىلىس، قالا قۇرىلىسى جانە تۇرعىن ءۇي-كوممۋنالدىق شارۋاشىلىق؛ رەگلامەنت كوميتەتى جانە قارجى ساياساتى مەن بانك قىزمەتى كوميتەتى. قۇجاتتا ۋكراينانىڭ سەگىزىنشى شاقىرىلىمداعى جوعارعى راداسىنىڭ ءار كوميتەتىنىڭ قۇرامىنا 11 دەن كەم ەمەس جانە 35 تەن اسپايتىن حالىق دەپۋتاتى كىرە الاتىنى بەكىتىلگەن.
داۋىس بەرۋدەن سوڭ وپپوزيتسيا وكىلدەرىنە ارناپ ءسوز سويلەگەن ۆلاديمير پاراسيۋك ولاردىڭ ءارقايسىسىنىڭ پارلامەنتتەگى جۇمىس ءۇشىن جاۋاپتى ەكەنىن ايتتى. «ەگەر جۇمىس ىستەمەيتىن بولساڭىزدار، ءبىز سىزدەردى بۇل جەردەن شىعارىپ جىبەرەمىز. سىزدەردى وزدەرىڭىزدىڭ ميلليوندارىڭىز دا قۇتقارا المايدى»، - دەدى ول.
