ماسكەۋدە ەتنيكاارالىق جانە ءدىنارالىق كەلىسىمدى ساقتاۋدىڭ قازاقستاندىق-رەسەيلىك تاجىريبەسى سارالاندى
شارا بارىسىندا ساراپشىلار رەسەي مەن قازاقستانداعى ۇلتتىق ساياساتتىڭ ەرەكشەلىكتەرى جايىندا، داعدارىس جاعدايلارىنىڭ ق ر جانە ر ف- داعى الەۋمەتتىك-ەكونوميكالىق ۇردىستەرگە اسەرى، ەكى ەلدىڭ ەتنيكاارالىق جانە ءدىنارالىق كەلىسىمدى ساقتاۋ تاجىريبەسى تۋرالى پىكىر الماستى.
ساراپشىلار قازاقستاندا قابىلدانعان شارالارعا نازار اۋداردى. قازاقستان پرەزيدەنتى نۇرسۇلتان نازاربايەۆ «نۇرلى جول» جولداۋىندا كوپ ۇلتتى قازاقستاندىق قوعامدى داعدارىس وشاقتارىن ەڭسەرۋگە جانە قويىلعان ماقساتتارعا جەتۋگە نەگىز بولاتىن ەل حالقىنىڭ بىرلىگىن نىعايتۋعا شاقىرعانى اتاپ ءوتىلدى.
حالىقارالىق تۇركى اكادەمياسىنىڭ ساراپشىسى تيمۋر كوزىريەۆتىڭ پىكىرىنشە، ەتنيكاارالىق جانە كونفەسسياارالىق تولەرانتتىلىقتىڭ قازاقستاندىق ۇلگىسىنىڭ ەرەكشەلىكتەرى ءتۇرلى ەتنيكالىق توپتاردىڭ تاتۋ-ءتاتتى ءومىر ءسۇرۋ ءداستۇرىن ۇستانىپ، ەتنيكالىق، ءدىني قارىم-قاتىناستا قوعامنىڭ ارا-جىگى اجىراماي، تۇسىنىستىك پەن بىرلىكتىڭ باستى قۇندىلىققا اينالۋىندا.
ت م د ەلدەرى ينستيتۋتىنىڭ ورتالىق ازيا جانە قازاقستان ءبولىمىنىڭ مەڭگەرۋشىسى ا. گروزين ءوز بايانداماسىندا قازاقستان تاۋەلسىزدىك العاننان كەيىن ت م د- نىڭ باسقا ەلدەرىمەن سالىستىرعاندا تاتۋ-ءتاتتى، جاسامپاز دامۋ ءۇردىسىن قالىپتاستىرعانىن باسا ايتتى. سوندىقتان دا رەسەيدىڭ قازاقستاندىق تاجىريبەدەن ۇيرەنەرى از ەمەس.
«ءار ەل ەتنيكاارالىق، ءدىنارالىق كەلىسىم ۇلگىسىن قالىپتاستىرۋدى مىندەتتى ساناي بەرمەيدى. رەسەيدىڭ، مەنىڭ كوزقاراسىم بويىنشا، قازاقستاننان وسى ماسەلەدە ۇيرەنەرى كوپ. قازاقستان ەتنيكاارالىق سالادا وتە ءساتتى تاجىريبەنى قولدانعان مەملەكەت. بۇعان ءدىنارالىق كەلىسىمدى دە جاتقىزۋعا بولادى»، - دەدى ول.
بۇدان باسقا، رەسەيلىك ساراپشى قازاقستان حالقى اسسامبلەياسى، الەمدىك دىندەر سەزى ينستيتۋتتارىنىڭ ەلدەگى ۇلتارالىق ساياساتتى ىسكە اسىرۋ ۇردىسىندەگى نەگىزگى جاسامپاز رولىنە توقتالىپ ءوتتى.
جالپى العاندا، ساراپشىلار قازاقستاندىق تاجىريبەگە جانە ەتنيكاارالىق، كونفەسسياارالىق كەلىسىمدى ساقتاۋ بويىنشا قازاقستان باسشىسىنىڭ اتقارعان ىسىنە جوعارى باعا بەردى.
