الماتىنىڭ كۇل-قوقىسى شىعىس ەۋروپاعا ەكسپورتتالادى

الماتى. قازاقپارات - الماتى اكىمدىگى وسىنداي جوبانى ماقۇلدادى. قۇنى 540 ميلليون ا ق ش دوللارى بولاتىن جوبا «الاتاۋ» ارنايى ەكونوميكالىق ايماعىندا جۇزەگە اسىرىلاتىن بولادى.

زاۋىتتا قالاداعى 1,2,3№ جىلۋ ەنەرگوستانسالارىنان شىققان كۇل-قوقىس وڭدەلىپ، قۇرىلىس ماتەريالدارىن جاسايتىن شيكىزات جاسالادى.

«بۇل جوبانىڭ ەڭ ماڭىزدىلىعى ءونىمنىڭ ەكسپورتقا باعىتتالعاندىعىندا. نەگىزىنەن بۇل شيكىزات شىعىس ەۋروپاعا، چەحيا مەن ۆەنگرياعا ەكسپورتتالادى»، - دەدى الماتى قالاسى اكىمىنىڭ ورىنباسارى ەربول شورمانوۆ.

ونىڭ ايتۋىنشا، زاۋىتتى سالۋ الماتىنىڭ ەكولوگيالىق احۋالىن جاقسارتۋعا مۇمكىندىك بەرەدى.

«قازىر قالادا 2 ميلليون تونناعا جۋىق كۇل-قوقىس ساقتالىپ وتىر. ءبىر عانا جىلىتۋ ماۋسىمىنان كەيىن 600 مىڭ توننا كۇل شىعارىلادى. جاڭا جوبا ءساتتى جۇزەگە اسسا، وسىنداي ۇلكەن ەكولوگيالىق ماسەلەنىڭ دە شەشىمىن تابۋعا بولادى»، - دەدى ە. شورمانوۆ.

اۆتور: گۇلميرا عوسمانالي