امەريكالىق قىزدى اياۋسىز ولتىرگەن كۇدىكتى ۇستالدى
ەسكە سالا كەتەيىك، ءابۋ-دابيدە بالاباقشادا قىزمەت ەتىپ جۇرگەن ا ق ش ازاماتشاسىن «رەەم ايلاند» اۋدانىنداعى «بۋتيك مولل» سۋپەرماركەتىنىڭ ايەلدەر دارەتحاناسىندا باۋىزداپ كەتكەن بولاتىن.
كۇدىكتى دارەتحانادان شىعىپ كەلە جاتقاندا باقىلاۋ ۆيدەوكامەرالارىنا ءتۇسىپ قالعانىمەن «نيقاب» (مۇسىلمان ايەلدەرىنىڭ كوزى عانا كورىنەتىندەي ەتىپ بەتىن بۇركەپ الاتىن كيىم ءتۇرى) كيىپ العاندىقتان ونىڭ كىم ەكەنىن اجىراتۋ تەرگەۋشىلەرگە قيىنعا سوققان.
دەگەنمەن، ب ا ءا قۇقىق قورعاۋ ورگاندارىنا اتالعان قىلمىستى اشۋعا 48 ساعات جەتكىلىكتى بولدى. سارسەنبى كۇنى ءابۋ-دابي پوليتسياسى 48 جاستاعى ب ا ءا ازاماتشاسىن ءوز ۇيىندە تۇتقىندادى.
ب ا ءا پوليتسياسىنىڭ حابارلاۋىنشا، كۇدىكتى بىرنەشە ا ق ش ازاماتشاسىن ءولتىرۋدى جوسپارلاعان. ول تاعى ءبىر ا ق ش ازاماتىن (دارىگەر) ءولتىرۋ ءۇشىن جارىلعىش زات قويىپ كەتپەك بولعانىندا ۇستالىپ وتىر.
ب ا ءا پرەمەر-ءمينيسترىنىڭ ورىنباسارى، ىشكى ىستەر ءمينيسترى شەيح سايف بين زايەد اتالعان وقيعا بويىنشا وتكىزگەن پرەسس-كونفەرەنتسيادا كۇدىكتىنىڭ ۇيىنەن جارىلعىش زات بولشەكتەرى تابىلعانىن ايتتى. شەيح سايف ولتىرىلگەن جانە ولتىرمەك بولعان ادامداردىڭ كۇدىكتىمەن ەشقانداي جەكە قارىم-قاتىناسى بولماعانىن اتاپ ءوتتى. بولجام بويىنشا بۇل تەررورلىق موتيۆتەردى باسشىلىققا العان، ب ا ءا ۇلتتىق قاۋىپسىزدىگىن بۇزۋ ءۇشىن جىبەرىلگەن ادام بولۋى مۇمكىن.
وسىعان وراي ءى ءى م باسشىسى ەلدەگى تىنىشتىقتى بۇزۋعا ارەكەتتەنگەن ادامداردىڭ بيلىك قاتاڭ ءارى، اياۋسىز جولىن كەسەتىنىن ەسكەرتتى.
