استانادا تاۋەلسىزدىك كۇنىنە وراي بۇقارالىق سپورتتىق شارالار وتەدى

استانا. قازاقپارات - ەلوردادا سپورتپەن شۇعىلدانىپ، بەلسەندى ءومىر سالتىن ۇستاناتىندار تاۋەلسىزدىك كۇنىن ەرەكشە اتاپ وتپەك.

قىسقى سپورت ماۋسىمىنىڭ اشىلۋى اياسىندا شاڭعى جارىسى وتكىزىلەدى.

استانا قالاسىنىڭ تۋريزم، دەنە تاربيەسى جانە سپورت باسقارماسىنىڭ حابارلاۋىنشا، شاڭعى-روللەرلىك تراسساداعى دودا 15 - جەلتوقسانعا بەلگىلەنگەن.

سونىمەن قاتار، 16 - جەلتوقساندا «بارىس» س ك اۋەسقويلار اراسىندا شايبالى حوككەيدەن استانا چەمپيوناتى، ال «الاۋ» مۇز سارايىندا جاپپاي كونكي تەبۋ ۇيىمداستىرىلادى. وماروۆ اتىنداعى شاحمات كلۋبىندا ۇلتتىق جانە ۇستەل ويىندارىنا اۋەس جاندار اراسىندا دويبىدان بليتس- تۋرنير (15 - جەلتوقسان) جانە 13-15 - جەلتوقساندا توعىزقۇمالاقتان جارىس وتەدى.

بۇدان باسقا، ق ر تاۋەلسىزدىك كۇنىنە وراي مۇمكىندىگى شەكتەۋلى جاندار اراسىندا ۇستەل تەننيسى مەن شاحمات فەستيۆالى بولادى. «داۋلەت» س ك شينكيوكۋشينكاي كاراتەدەن اشىق چەمپيونات، 15-18 - جەلتوقساندا «الاتاۋ» س ك ساداق اتۋدان «استانا كۋبوگى»، سونداي-اق، 15-19 - جەلتوقساندا №9 ب ج س م وق اتۋدان تۋرنير وتەدى، دەپ حابارلادى ەلوردا اكىمدىگىنىڭ رەسمي سايىنان.