قوستانايدا اكىمنىڭ ۇلىنا كىسى ولىمىنە قاتىستى ايىپ تاعىلدى

استانا. قازاقپارات - قوستانايدا اۋدان اكىمى مەن كوللەدج ديرەكتورىنىڭ ۇلدارىنىڭ ۇستىنەن سوت پروتسەسى ءجۇرىپ جاتىر دەپ حابارلايدى «جەتىنشى ارنا».

كۇدىكتى ازاماتتارعا كىسى ولىمىنە تاپسىرىس بەردى دەگەن ايىپ تاعىلدى. ال، ولاردىڭ تاعى ءبىر سىبايلاسى تاپسىرىستى ورىنداعانى ءۇشىن سوتتالۋدا.

تەرگەۋشىلەردىڭ مالىمەتىنشە، كۇدىكتىلەردىڭ قۇربانى - قايتىس بولعان ازامات كوزى تىرىسىندە قۇنى 400 مىڭ دوللار بولاتىن تاۋارى بار جۇك كولىگىن ۇرلاپ كەتكەن كورىنەدى. تاۋاردى ول سەرىكتەرىمەن ساتىپ، اقشاسىن ءبولىسىپ العان. ال، جۇكتىڭ شىنايى يەلەرى جوعالعانىن ىزدەي باستاعان ساتتە سەرىكتەستەر ارالارىنداعى «السىزدەن» قۇتىلۋ ماقساتىندا ونىڭ ولىمىنە تاپسىرىس بەرگەن ەكەن.

«ولار تاپسىرىستى ورىنداۋشىعا تاپانشا بەرىپ، جۇمىستى تولىق ورىنداعاننان كەيىن 3,5 مىڭ دوللار بەرۋگە ۋادە بەرگەن. كيللەر اتالعان تاپانشامەن جابىرلەنۋشىنى ءولتىرىپ، كەيىن ۇشەۋى ونىڭ دەنەسىن قارابالىق اۋدانىنىڭ سىرتىنا شىعارىپ، ورتەپ جىبەرگەن» دەيدى قوستاناي وبلىسىتىق قىلمىستىق ىستەر بويىنشا ارنايىلاندىرىلعان اۋدانارالىق سوتىنىڭ باسپا ءسوز حاتشىسى شولپان قاسىموۆا.