تارازدىق كاسىپكەر قازاق ەرتەگىلەرىنىڭ كەيىپكەرلەرى ۇلگىسىندەگى ويىنشىقتار شىعارماق
Atameken Startup بيزنەس- يدەيالار بايقاۋىنا قاتىسقان ءا. نۇرجىگىتوۆا العاشقىدا بۇل جوبانى ءبىلىم مەكەمەسىندە ىسكە اسىرىپ، كەيىننەن ءوز بيزنەسىن تىركەپ الدى. ماماندىعى بويىنشا قارجىگەر ول ج و و- ىن ءتامامداعان سوڭ كاسىپكەرلىك قىزمەتپەن اينالىسقان.
2013 - جىلى ستۋدەنتتەرىمەن بىرگە Atameken Startup بايقاۋىنا قاتىسىپ، ەكىنشى ورىن العان ەدى. ءا. نۇرجىگىتوۆانىڭ ستارتاپ جوباسىنىڭ يدەياسى سۋرەتتىڭ كوپتەگەن ۇزىندىلەرىنەن موزايكا قۇراستىراتىن پازل- ويىنىن جاساۋدا بولدى.
«پازلداردى وقۋدا تابىستى قولدانۋعا بولادى. مىسالى، سۋرەت ۇزىندىلەرىنەن ۇلتتىق ۆاليۋتانى، قازاقستان كارتاسىن قۇراستىرۋعا بولادى. ءبىز قازاق ەرتەگىلەرىنىڭ كەيىپكەرلەرى بەينەلەنگەن پازلداردى دايىندادىق. ءبىر كەزدەرى ادامدار وسىنداي سىيلىققا بەرىلەتىن پازلداردى دايىنداۋدى سۇراعان ەدى، ناتيجەسىندە باعاسى قولجەتىمدى، ءارى بالانىڭ دامۋىنا سەپتىگىن تيگىزەتىن سىيلىق جاسالدى. ءبارى وسىلاي باستالدى. كەيىننەن ادامدار تاعى قانداي كادەسىيلار، سىيلىقتاردى ۇسىنا الاتىنىمىزدى سۇراي باستادى»، - دەيدى كاسىپكەر ايەل.
ءبىر جىل بۇرىن ءا. نۇرجىگىتوۆا جەكە كاسىپكەر رەتىندە تىركەلىپ، ءوز ءىسىن باستاۋ شەشىمىن قابىلدادى. جەكە ديزاينەرلىك ستۋدياسىنا ءپىشۋ، تىگۋ جانە توقۋ ونەرىمەن اينالىساتىن مامانداردى شاقىردى.
بۇگىندە «KZ element» ستۋدياسى ءتۇرلى ونىمدەر، كورپوراتيۆتىك سىيلىقتار، قۋىرشاقتار جاساپ شىعارادى، بۇل رەتتە ۇلتتىق سارىنعا ەرەكشە نازار اۋدارىلادى. دايىنداعان ونىمدەرى جوعارى ساپالى، ءارى باعاسى قولجەتىمدى.
«ءبىزدى ويىنشىقتار نارىعى قىزىقتىرادى. وعان تالداۋ جاساپ، قازاقستاندىق نارىقتىڭ شەتەلدىك تاۋارعا تولى ەكەنىن، بالالارىمىزدىڭ تۋعان حالقىنىڭ داستۇرىمەن، مادەنيەتىمەن قارىم- قاتىناسىنىڭ جوقتىعىن تۇجىرىمدادىق. قازاقستاندا شىعارىلاتىن جۇمساق ويىنشىقتار جوقتىڭ قاسى. الداعى جىلدىڭ ناۋرىز ايىنا قاراي ءبىز قازاق ەرتەگىلەرى مەن مۋلتفيلمدەرىنەن الىنعان كەيىپكەرلەر ۇلگىسىندەگى قازاقستاندىق ويىنشىقتاردى شىعارماقپىز»، - دەدى ءا. نۇرجىگىتوۆا.
