لۋكاشەنكو: رەسەي بەلارۋستەن جارتى عاسىرعا قالىپ قويدى

استانا. قازاقپارات - بەلارۋس پرەزيدەنتى الەكساندر لۋكاشەنكو رەسەي ازىق-تۇلىك قاۋىپسىزدىگى جونىنەن بەلارۋستەن جارتى عاسىرعا قالىپ قويدى دەپ ەسەپتەيدى، - دەپ حابارلايدى ر ي ا نوۆوستي.

ول بۇل تۋرالى 3- جەلتوقسان كۇنى مينسكىدەگى كەڭەستە مالىمدەدى.

«ەگەر قانداي تاۋارلار قاۋىپسىز: بەلورۋستىكى مە، رەسەيلىك پە دەگەن ماسەلەنى قوياتىن بولساق، ول بەلارۋستە عانا ەمەس، كەز كەلگەن رەسەيلىكتىڭ دە كۇلكىسىن كەلتىرەدى. (...) رەسەي، ماعان وكپەلەمەسىن، تاۋار قاۋىپسىزدىگى تۇرعىسىنان بەلارۋستەن جارتى عاسىرعا قالىپ قويدى»، - دەدى الەكساندر لۋكاشەنكو.

ەسكە سالا كەتەيىك، قاراشادا جالعان سەرتيفيكاتتارى بار، قايدان شىققانى بەلگىسىز ەت ونىمدەرىنىڭ ءىرى كونترابانداسىنىڭ ارناسى اشكەرەلەنگەن ەدى. بۇل بەلارۋس پەن رەسەي اۋماعى ارقىلى قازاقستانعا جەتكىزىلەدى دەلىنگەن، ءبىراق شىن مانىندە رەسەيدە ساتىلاتىن ترانزيتتىك جۇك ءۇشىن جاسالىنعان. ايتا كەتەيىك، قازان ايىنىڭ سوڭىنان بەرى بەلارۋس شوشقانىڭ افريكالىق وباسى ىندەتىنەن كەيىن رەسەيگە شوشقا شارۋاشىلىعى ونىمدەرىن جەتكىزۋگە ءوز-وزىنە شەكتەۋ قويعان ەدى. بۇعان ەۋروپالىق ءونىمنىڭ رەسەيگە قايتا ەكسپورتتالۋى جاعدايلارىنىڭ بىرنەشە رەت تىركەلۋى دە سەبەپ.

بۇدان سوڭ روسپوترەبنادزور قاۋىپتى ميكرواعزالاردىڭ انىقتالۋىنا بايلانىستى بەلورۋستىڭ ەت، شۇجىق، ءسۇت وندىرەتىن 11 كاسىپورنىنىڭ ءونىم جەتكىزۋىنە شەكتەۋ قويدى. وسى سەبەپپەن 26- قاراشادان باستاپ، تاعى سەگىز كاسىپورىنعا قاتىستى شەكتەۋ ەنگىزىلدى. الەكساندر لۋكاشەنكو بەلورۋس ازىق-تۇلىگىن اكەلۋگە تىيىم سالعان رەسەي بيلىگى ابەستىككە باردى دەپ ەسەپتەيدى. ونىڭ پىكىرىنشە، رەسەي «كەدەن وداعىندا قول جەتكەن بارلىق ۋاعدالاستىقتىڭ بۇزىلۋىنا جول بەردى».

tengrinews.kz