ن. نازاربايەۆ: قازاقستان يران مەن تۇرىكمەنستانعا تەپلوۆوزدار مەن ۆاگوندار جەتكىزۋ تۋرالى ۇسىنىس جاسادى
تۇركىمەنستاننىڭ اكيايلا ستانساسىنا كەلگەن مەملەكەت باسشىلارىنا «قازاقستان - تۇرىكمەنستان - يران» جاڭا تەمىرجول ماگيسترالى تانىستىرىلدى.
مەملەكەت باسشىلارىنىڭ بىرلەسكەن مالىمدەمەسى بارىسىندا نۇرسۇلتان نازاربايەۆ ءۇش ەل پرەزيدەنتتەرىن تەمىرجول قۇرىلىسىنىڭ اياقتالۋىمەن قۇتتىقتادى.
- ءبىز جولدىڭ قازاقستاندىق بولىگىن بىلتىر تۇرىكمەنستان پرەزيدەنتى گۋربانگۋلى بەردىمۇحامەدوۆپەن بىرگە سالتاناتتى تۇردە ىسكە قوستىق. ەندى بۇل ماگيسترال ءۇش ەلدى جالعايتىن بولادى، - دەدى ەلباسى.
مەملەكەت باسشىسى حالىقارالىق ماگيسترالدى ىسكە قوسۋ ءوڭىر ەكونوميكاسى ءۇشىن جاڭا پەرسپەكتيۆالار اشاتىنىن ايتتى.
- ءبىزدىڭ مەملەكەتتەرىمىزدە وڭىرلىك نارىق پەن ازيا نارىعىنا باعدارلانعان ءوندىرىستىڭ ماڭىزى ارتادى، - دەدى نۇرسۇلتان نازاربايەۆ.
سونىمەن قاتار، قازاقستان پرەزيدەنتى ءبىزدىڭ رەسپۋبليكانىڭ تەمىرجولدارى ارقىلى بۇكىل ءوڭىر رەسەيمەن جانە قىتايمەن ەكونوميكالىق ىنتىماقتاسۋ مۇمكىندىگىنە يە بولاتىنىن ەسكە سالدى.
تۇرىكمەنستان پرەزيدەنتى گۋربانگۋلى بەردىمۇحامەدوۆ ءوز كەزەگىندە جاڭا تەمىرجول ماگيسترالىنىڭ وڭىردەگى ەلدەر ءۇشىن زور ەكونوميكالىق جانە الەۋمەتتىك ءمانى بار ەكەنىن ايتتى.
- 7 جىل ىشىندە وراسان جۇمىس اتقارىلدى. ەندى بۇل جول تاتۋ كورشىلەستىك پەن دوستىق قارىم- قاتىناستاردىڭ وركەندەۋى مەن نىعايۋىنا قىزمەت ەتەتىن بولادى، - دەدى تۇرىكمەنستان پرەزيدەنتى.
يران يسلام رەسپۋبليكاسىنىڭ پرەزيدەنتى حاسان رۋحاني ءوڭىر ەلدەرىنىڭ اراسىندا ىنتىماقتاستىقتى جولعا قويۋدىڭ، ءوزارا ساۋدانى دامىتۋ ءۇشىن قاجەتتى جاعداي جاساۋدىڭ وزەكتىلىگىنە توقتالدى.
- ءۇش ەلدىڭ اراسىندا كوممۋنيكاتسيالاردى دامىتۋ قاجەت. بۇل تەمىرجول ءۇش مەملەكەتتى عانا جالعاستىرىپ قويمايدى، سونىمەن قاتار پارسى شىعاناعىنا، رەسەي مەن قىتايعا شىعار جولدى قامتاماسىز ەتەدى، - دەدى حاسان رۋحاني.
بۇدان كەيىن تۇرىكمەنستان مەن يراننىڭ شەكاراسىندا ءۇش ەل پرەزيدەنتتەرىنىڭ قاتىسۋىمەن ءتۇيىستىرۋشى «التىن توسەمدى» قويۋ ءراسىم ءوتتى.
ال يران تاراپىنا وتكەننەن كەيىن مەملەكەت باسشىلارى ءۇشجاقتى كەزدەسۋ وتكىزىپ، ونىڭ بارىسىندا جاڭا كولىك ماگيسترالىنىڭ ستراتەگيالىق ماڭىزىن اتاپ كورسەتتى.
تاراپتار سونداي- اق كولىكتىك- لوگيستيكالىق الەۋەتتى دامىتۋ، جاڭا اۆتوموبيل جولدارى مەن تەمىرجولدار قۇرىلىسىن، لوگيستيكالىق ورتالىقتار سالۋ سالاسىنداعى تىڭ باستامالاردى تالقىلادى. سونىمەن بىرگە شەكارالاس ايماقتارداعى ىنتىماقتاستىقتى دامىتۋ، ەركىن ەكونوميكالىق ايماقتار قۇرۋ جانە ينۆەستيتسيالىق ىقپالداسۋ ماسەلەلەرى قاراستىرىلدى.
مەملەكەت باسشىلارى ساۋدانى جانداندىرۋ باعىتتارىن انىقتايتىن، سونداي- اق كولىك- لوگيستيكا سالاسىنداعى ءوزارا ءىس- قيمىلدىڭ بولاشاعىن زەردەلەيتىن جۇمىس توبىن قۇرۋعا ۋاعدالاستى.
كەزدەسۋ قورىتىندىسى بويىنشا قازاقستان، يران جانە تۇرىكمەنستان پرەزيدەنتتەرى ب ا ق وكىلدەرى ءۇشىن بريفينگ وتكىزىپ، ونىڭ بارىسىندا ءۇش ەلدىڭ اراسىنداعى ءوزارا ءتيىمدى ىنتىماقتاستىق اياسىن كەڭەيتۋ قاجەتتىگىنە سەنىمدى ەكەندىكتەرىن ءبىلدىردى.
قازاقستان پرەزيدەنتى زاماناۋي كولىك ينفراقۇرىلىمىن قالىپتاستىرۋ جونىندەگى ءىس- قيمىلىنىڭ وزەكتىلىگىن اتاپ ءوتتى.
- ءبىز بۇگىن ءبىزدىڭ ءۇش ەل مەن قىتاي ارقىلى تىنىق مۇحيتقا دەيىن ءىس جۇزىندە جاڭا جىبەك جولىن سالدىق، - دەدى نۇرسۇلتان نازاربايەۆ.
مەملەكەت باسشىسى سونداي- اق «قازاقستان- تۇرىكمەنستان- يران» جاڭا تەمىرجول ماگيسترالى قازىردىڭ وزىندە ەكونوميكالىق تيىمدىلىك اكەلىپ وتىرعانىن جانە ءوزارا ساۋداداعى قاجەتتىلىكتى وتەۋگە قابىلەتتى ەكەنىنە دە توقتالدى.
- قازاقستان بىلتىر يرانعا 1 ميلليون توننا بيداي جەتكىزدى، ال پارسى شىعاناعىنىڭ قاجەتتىلىگى 9-10 ميلليون توننانى قۇرايدى. ءبىز بولات، مينەرالدى تىڭايتقىش، وزگە دە قازاقستاندىق ونىمدەردى جەتكىزگەلى وتىرمىز. تيىسىنشە تۇرىكمەنستان مەن يراننان قاجەتتى تاۋارلار الامىز، - دەدى نۇرسۇلتان نازاربايەۆ.
سونداي- اق قازاقستان پرەزيدەنتى ءبىزدىڭ ەل يران مەن تۇرىكمەنستانعا تەمىرجولعا ارنالعان ماشينالار جاساۋ سالاسىنداعى وتاندىق ونىمدەرىمىزدى، سونىڭ ىشىندە تەپلوۆوزدار، جۇك جانە جولاۋشى ۆاگوندارىن جەتكىزۋ تۋرالى ۇسىنىس ەنگىزگەنىن مالىمدەدى.
سوڭىندا ءۇش مەملەكەتتىڭ باسشىلارى جاڭا تەمىرجولدىڭ ىسكە قوسىلۋى بۇكىل ءوڭىردىڭ دامۋىنا وڭ ىقپالىن تيگىزەتىنىن اتاپ ايتتى.
