ەلشىنىڭ بالاسى مەكتەپتەن قۋىلدى

استانا. قازاقپارات - اتا-انالار شۆەتسيا ەلشىسىنىڭ بالاسىن مەكتەپتەن قۋۋدى تالاپ ەتىپ وتىر.

سكانديناۆيالىق ەلشىنىڭ استاناداعى مەكتەپتەردىڭ بىرىندە وقيتىن بالاسىنىڭ ۇستىنەن شاعىم ايتقان اتا-انالار ونىڭ بالاسىن سىنىپتان ەمەس، ءتىپتى، مەكتەپتەن قۋىپ جىبەرۋدى تالاپ ەتىپ وتىر. وتاندىق ب ا ق پەن الەۋمەتتىك جەلىلەردە جاريالانعان دەرەكتەردە ەلشى مەن ونىڭ وتباسى قازاقستان مەن قازاقتاردىڭ ار-نامىسىنا تيەتىن سوزدەر ايتتى دەسە، ق ر سىرتقى ىستەر مينيسترلىگى باسپا ءسوز قىزمەتىندەگىلەر: «ايتىلعانداردىڭ ءبارى بىردەي شىندىققا جاناسپايدى»، - دەيدى.

استانا قالاسىندا ورنالاسقان ۇزدىكسىز ءبىلىم بەرەتىن حالىقارالىق كوللەدجدىڭ  «ب» 2-سىنىپ اتا-انالارى ق ر باس پروكۋراتۋراسىنا، ق ر سىرتقى ىستەر مينيسترلىگى مەن ق ر ءبىلىم جانە عىلىم مينيسترلىگىنە، سونداي-اق، كوللەدج ديرەكتورىنىڭ اتىنا حات جازىپ، اتالعان سىنىپتا وقيتىن شۆەتسيا كورولدىگىنىڭ قازاقستانداعى توتەنشە جانە وكىلەتتى ەلشىسى حريستيان كاميللدىڭ ۇلى گەورگ كاميللدى مەكتەپتەن شىعارىپ جىبەرۋدى تالاپ ەتتى.

وزدەرىنىڭ نارازىلىقتارىن «ءبىز،  «ب» 2-سىنىپ وقۋشىلارىنىڭ اتا-انالارى، وسى سىنىپتا وقيتىن گەورگ كاميللدىڭ ورەسكەل جانە ءتارتىپسىز قىلىعىن ايتىپ، بىرنەشە رەت شاعىمداندىق. ءوزىن ءوزى ۇستاي المايتىن ول بالالارىمىزعا ويىنا كەلگەنىن ىستەدى: بالالارىمىزدى قورلادى، ادەپسىز سوزدەر ايتتى، قىز بالالارعا ۇنەمى كۇن كورسەتپەدى، قولىنا تۇسكەن زاتتى لاقتىردى، ۇل بالالارمەن ۇنەمى توبەلەسىپ، كۇن سايىن قىزداردى رەنجىتتى»، -  دەپ بىلدىرگەن اتا-انالار ۇستازدار مەن اتا-انالاردىڭ وزىنە ايتقان سىن-ەسكەرتپەلەرىنە قۇلاق اسپايتىنىن ايتادى.

«27 - قاراشادا ول (گەورگ كاميلل -  ن. ج. ) سىنىپتاعى ۆيتوريا اتتى قىز بالانى تاياققا جىعىپ، مۇرنىن سىندىردى. ول از بولعانداي، گەورگتىڭ ءبىزدىڭ مەكتەپتە وقيتىن اپكەسى ءوزىن قورعاعىسى كەلگەن ۆيكتورياعا «ساعان ءالى كورەسىنى كورسەتەمىن!» دەپ قورقىتقان. بۇل -  بالالار ەمەس، بۇزاقىلاردىڭ بانداسى!»، -  اشۋلانعان اتا-انالار بالانىڭ اكەسى حريستيان كاميلل ۇلىنا ەسكەرتۋ جاساۋدىڭ ورنىنا، كەرىسىنشە، باسقا وقۋشىلاردى كىنالاعانىن ايتادى.

«ولار وتباسىمەن تۇگەل قازاقستان ازاماتى ەمەس، جامان ايتپاي، جاقسى جوق، بىردەڭە بولا قالسا، زاڭ الدىندا جاۋاپ بەرمەستەن، ەلدەرىنە تايىپ تۇرۋى مۇمكىن. سوندىقتان گەورگ كاميللدى سىنىپتان عانا ەمەس، مەكتەپتەن قۋۋدى تالاپ ەتەمىز!»، -  دەگەن اتا-انالار ايتقانىمىزدان قايتپايمىز دەپ وتىر. ال  «ب» 2-سىنىپ وقۋشىلارى اتا-انالار كوميتەتىنىڭ باسشىسى ايگۇل قاپاروۆانىڭ ايتۋىنشا، شۆەتسيا ەلشىسى ۇلىنان تاياق جەگەن قىزدىڭ ۇستىنەن پوليتسياعا شاعىم ءتۇسىرىپتى. «سونداي-اق، ەلشى مىرزا، ونىڭ ايەلى مەن بالالارى «كازاحستان -  سترانا دەبيلوۆ ي ۋرودوۆ، كازاحي -  نەكۋلتۋرنىي ي ديكيي نارود، پاپى ي مامى ودنوكلاسسنيكوۆ -  تۋپىە دەبيلى» دەپ قورلادى».

شۆەتسيا كورولدىگىنىڭ توتەنشە جانە وكىلەتتى ەلشىسى قازاقستانعا بيىل كۇزدە كەلگەن. بۇعان دەيىن شۆەد ديپلوماتى سانكت-پەتەربۋرگتەگى باس كونسۋلدىعىندا، ەۋروپالىق قاۋىپسىزدىك جانە ىنتىماقتاستىق ۇيىمىنىڭ ۆەناداعى دەلەگاتسياسىندا جانە كيەۆتەگى شۆەتسيا ەلشىلىگىندە جۇمىس ىستەگەن.

ەلشىنىڭ وتباسىنا قاتىستى وسى وقيعا الەۋمەتتىك جەلىلەردە قىزۋ پىكىرتالاسقا ۇلاستى. ق ر سىرتقى ىستەر مينيسترلىگى اتالعان جايتقا قاتىستى ارنايى تەكسەرۋ جۇمىستارىن جۇرگىزۋگە كىرىسىپتى. مينيسترلىكتىڭ باسپا ءسوز حاتشىسى نۇرجان ايتماحانوۆ: «الدىن الا جۇرگىزىلگەن تەكسەرۋگە سايكەس، بۇقارالىق اقپارات قۇرالدارى مەن الەۋمەتتىك جەلىلەردە كورسەتىلگەن اقپاراتتىڭ بارلىعى بىردەي شىندىققا جاناسپايدى. ب ا ق وكىلدەرى مەن الەۋمەتتىك جەلىلەردى قولدانۋشىلاردى سابىرعا شاقىرا وتىرىپ، جاعدايدى ۋشىقتىرماۋدى وتىنەمىز. جان-جاقتى جۇرگىزىلگەن تەكسەرۋ ناتيجەسىندە قاجەتتى شارالاردى قولدانامىز جانە قوعامدى حاباردار ەتەمىز»، -  دەيدى.

ارادا كوپ ۋاقىت وتپەي جاتىپ، كوللەدج ديرەكتورى ەلشىنىڭ بالالارىن باسقا مەكتەپكە اۋىستىرۋعا شەشىم قابىلدانعانىن ايتتى. ال پوليتسيا شاعىم تۇسىرگەن ۆيكتوريا دەگەن قىز بالانىڭ اكە-شەشەسى مەن ەلشىنىڭ وتباسى ءبىر-بىرىنەن كەشىرىم سۇراعان. ال بۇعان دەيىن ەلشىنىڭ ۇلى مەن قىزىن مەكتەپتەن شىعارۋدى تالاپ ەتكەن  «ب» 2-سىنىبى وقۋشىلارىنىڭ اتا-انالارى بولعان وقيعاعا قاتىستى پىكىر ايتۋدان ءۇزىلدى-كەسىلدى باس تارتىپ وتىر.

ءنازيا جويامەرگەن قىزى

«تۇركىستان»