ەۋرازيا ۇلتتىق ۋنيۆەرسيتەتىندە ولجاس سۇلەيمەنوۆ ءدارىس وقىدى

استانا. قازاقپارات - ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە ايتۋلى اقىن، بەلگىلى ساياساتكەر، مەملەكەت جانە قوعام قايراتكەرى ولجاس سۇلەيمەنوۆ ءدارىس وقىدى.

بۇل كەزدەسۋدى اشقان ق ر ۇ ع ا كوررەسپوندەنت مۇشەسى، تاريح عىلىمدارىنىڭ دوكتورى، ە ۇ ۋ رەكتورى ەرلان سىدىقوۆ: «تۇڭعىش پرەزيدەنت كۇنىنەن كەيىن ۋنيۆەرسيتەتىمىزدە تاۋەلسىزدىك كۇنى مەرەكەسىنە ارنالعان ءىس-شارالار ولجاس ومار ۇلىنىڭ دارىسىمەن باستالىپ وتىر. ولجاس سۇلەيمەنوۆ - اقىن، ويشىل، عالىم، ساياساتكەر. ول ادەبيەتكە ەرەكشە داۋىسپەن ەندى. ونىڭ شىعارمالارى ءاۋ باستان-اق ۇلتتىق ادەبي قۇبىلىستارعا تولى بولدى، سونىمەن قاتار ءسوز قادىرىن تۇسىنەر جۇرتتىڭ كوڭىلىنەن شىقتى جانە بۇگىنگە دەيىن سول دەڭگەيىن جوعالتقان جوق»، - دەي كەلىپ، ءسوز تىزگىنىن اقىنعا بەردى. اقىن اڭگىمەسىن پوەزيادان ەمەس، ءدارىس وقۋدان باستادى.

- ءبىز ءۇشىن بۇگىن تاريحي كۇن، ءبىز ءۇشىن ولجاس سۇلەيمەنوۆپەن كەزدەسىپ، ءدارىسىن تىڭداۋ ۇلكەن باقىت، - دەدى كەزدەسۋدە ءسوز العان ەۋرازيا ۇلتتىق ۋنيۆەرسيتەتىنىڭ ستۋدەنتتەرى. ءسوز اراسىندا كەشتىڭ جۇرگىزۋشىسى، پۋبليتسيست-عالىم عادىلبەك شالاحمەتوۆ تە ولجاستىڭ سوناۋ «جاس تۇلپار» ۇيىمىندا جۇرگەن كەزدەرى مەن ودان كەيىنگى ءومىر جولدارىنان سىر شەرتىپ قانا قويماي، ونىڭ ولەڭدەرى قازاق حالقىنىڭ تالاي عاسىرلىق مۇڭى مەن قۋانىشىن، سىرى مەن سيپاتىن ايعاقتايتىنىن، اقىننىڭ جىرىن وقىپ وتىرىپ ءبىر ۇلتتىڭ سان عاسىرلىق ساليحالى تاريحىن ارالاعانداي بولاتىنىڭىزدى، نەمەسە سەمەي يادرولىق سىناق پوليگونىن جابۋداعى سىڭىرگەن ەڭبەگى جايلى جان-جاقتى جەتكىزدى.

ولجاس ءتىلتانۋشى رەتىندە كونە تۇركى ءتىلىن زەرتتەدى، اسىرەسە شۋمەرلەر جانە شۋمەر ءتىلى تۋرالى ەڭبەكتەرى باتىس عالىمدارىنىڭ كونە ءتىل ءۇندى- ەۋروپا تىلدەرىنەن باستاۋ الادى دەيتىن قاساڭ تەورياسىنا پارمەندى سوققى بەردى.

اقىن وتكىزگەن ءدارىستىڭ 1975 - جىلى جارىق كورگەن «از ي يا»، جازۋ مەن تاڭبانىڭ تاريحى تۋرالى «1001 ءسوز»، «جازۋ ءتىلى»، «تاريحقا دەيىنگى تۇركىلەر»، ءتىپتى قازاقستاننىڭ ىشكى جانە سىرتقى ساياساتى مەن يۋنەسكو جايلى ءتالىمى مول بولدى.

قازاقستان لەنين كومسومولى سىيلىعى، بۇكىل وداقتىق لەنين كومسومولى سىيلىعى، قازاق ك س ر مەملەكەتتىك سىيلىعى، قازاقستاننىڭ حالىق جازۋشىسى اتاعى، تاۋەلسىز «تارلان» سىيلىعىنىڭ يەگەرىنەن ءدارىس تىڭداعان ستۋدەنتتەر جۇرەكتەرىنە وت تۇتانا كەلىپ، ولجاس اعالارىنىڭ ولەڭىن الما-كەزەك وقىدى. «تۇلپاردىڭ ءدۇبىرى جاتقان قۇلىندى وياتادى» دەگەندەي، ولجاس ومار ۇلى دا «ساباقتىڭ» ۋاقىتى ءبىتىپ قالعانىنا قاراماستان، ساعىنىپ قالعان وقىرماندارىنا جىر ارنادى، دەپ حابارلايدى ۋنيۆەرسيتەتتىڭ باسپا ءسوز قىزمەتىنەن.