الماتى ماڭىنان ورتا عاسىرعا ءتان تاريحي جادىگەرلەر تابىلدى
قازبا ورنىنان تابىلعان قۇندى جادىگەرلەر قازىر الماتى تاريحى مۇراجايىنا جەتكىزىلىپ، زەرتتەلىپ جاتىر. زيراتتان ەكى مۇردە تابىلعان. ونداعى دۇنيەلەردىڭ ءبىرازى بۇگىنگە كۇنگە دەيىن بۇلىنبەي جەتكەن.
ايەلدەردىڭ جانىنا قۇرباندىققا شالىنعان قويدىڭ سۇيەكتەرى، تۇرمىستا پايدالانعان قىش ىدىستار، اشەكەي بۇيىمدار، شاش تۇيرەگىشتەرى مەن قولا اينا قويىلىپتى. ەرەكشەلىگى، بۇل قۇيىلعان اينا ەمەس، قولامەن قاپتالىپ، شەگەلەنگەن. ۇزىندىعى - تەمىر تۇتقاسىمەن بىرگە العاندا 16 س م. ماماندار كونە جادىگەردى قىتايلار جاساعان جانە دە مۇنداي اينا قازاقستان جەرىندە بۇدان بۇرىن تابىلماعانىن ايتادى. قورىمدا جەرلەنگەن ايەلدەردىڭ جاسى 20 دان اسپايدى. ەكەۋى تەكتى اۋلەتتەن شىققان بولۋى كەرەك.
ايبەك سادىقوۆ، الماتى قالاسى تاريحى مۇراجايىنىڭ ديرەكتورى
- نەگىزگى قابىر تونالعان. تونالعاننىڭ وزىندە جاقسى ماتەريالدار تاپتىق: قولادان، اقىقتان جاسالعان سىرعالار، سونىمەن قاتار، التىن بۇيىمدار، التىن تۇيمەلەر. تابىلعان بۇيىمدارعا قاراپ ول جەردە جاتقان ادامداردىڭ دارەجەسىن انىقتاۋعا بولادى. سەبەبى ماتەريالدار وتە باعالى.
ارحەولوگيا ينستيتۋتى جانە مۇراجاي قىزمەتكەرلەرى تاريحي ورىندا ءبىر ايداي قازبا جۇمىستارىن جۇرگىزدى. شاعىن قورعاننىڭ ەرەكشەلىگى قورعان ىشىندە ەدەن توسەلىپ، قابىر قابىرعالارى سازبەن جاقسىلاپ تەگىستەلگەن، شۇڭقىرلارى تەرەڭ ەمەس. ال ايەل ادامنىڭ دەنەسى اعاش تابىتقا سالىنعان. مۇراجايدىڭ عىلىمي حاتشىسى مۇرات نۇرپەيىسوۆتىڭ ايتۋىنشا، تونالعاننان كەيىن ايەلدىڭ تۋىستارى كەلىپ، مۇردەگە قايتا جوندەۋ جۇمىستارىن جاساعان كورىنەدى. ال ەكىنشى قورعاندا ەر ادامدار جەرلەنگەن.
مۇرات نۇرپەيىسوۆ، الماتى قالاسى تاريحى مۇراجايىنىڭ عىلىمي حاتشىسى
- ەندى ءبىز سونىڭ ماڭىنداعى قورعاندى زەرتتەپ جاتىرمىز. ول - كەيىنىرەك پايدا بولعان زيرات. تاستارمەن قالانعان ۇلكەن قورعان. ول جەردە ەر ادامدار جەرلەنگەنى بەلگىلى بولدى. ونىڭ تونالعانىن ايتا الامىز. نەگىزى قازاقستاندا ورتا عاسىردان قالعان ارحەولوگيالىق ەسكەرتكىشتەر تولىق زەرتتەلمەگەن. قازىرگى جۇمىسىمىز عىلىمعا ۇلكەن ۇلەسىن قوسادى.
ارحەولوگيالىق قازبالار قار ەرىگەن سوڭ جالعاسادى. قالا اۋماعىنىڭ ۇلعايۋىنا بايلانىستى اپاتتى قورعاندار قازىلىپ، ول جەرلەردە قۇرىلىس جۇمىستارى جۇرگىزىلمەك.
اۆتورلارى: دينارا سارۋار، ەرلان شالبايەۆ
«حابار» ارناسى
