ەۋرازيالىق وداققا مۇشە ءتورت مەملەكەت شەتەل ۆاليۋتاستىنان تولىقتاي باس تارتۋى مۇمكىن

استانا. قازاقپارات - ەۋرازيا ەكونوميكالىق وداعىنا مۇشە ەلدەر دوللار مەن ەۋرودان باس تارتۋى مۇمكىن. رەسەيدىڭ ۇلتتىق تولەم كەڭەسى ديرەكتورلار كەڭەسىنىڭ ءتوراعاسى الەكساندر مۋرىچيەۆ «يزۆەستيا» باسىلىمىنا وسىنداي پىكىر بىلدەرگەن.

ەۋرازيالىق وداققا مۇشە ءتورت مەملەكەت شەتەل ۆاليۋتاسىنان تولىقتاي باس تارتۋى مۇمكىن

«وداققا مۇشە ءتورت مەملەكەت قارجى وپەراتسيالارى كەزىندە حالىقارالىق ۆاليۋتالاردان 2025-جىلى تولىقتاي باس تارتۋى كەرەك. ول ءۇشىن رەسەي، بەلورۋسسيا، قازاقستان جانە ارمەنيا ورتاق تولەم جۇيەسىنىڭ ينفراقۇرىلىمىن جاساۋدى قازىردەن قاراستىرعانى دۇرىس. ال ۇيىمعا مۇشە ەلدەردىڭ ۇلتتىق بانكتەرى الدىنا مەملەكەتارالىق تولەم اينالىمىنان ا ق ش دوللارى مەن ەۋرونى الىپ تاستاۋ ماسەلەسىن قويۋ كەرەك»، - دەيدى مۋرىچيەۆ.

باسىلىمنىڭ جازۋىنشا، باستامانى رەسەيدىڭ فەدەراتسيا كەڭەسى قولداعان. الايدا بىزدەگى ماماندار ءبىرىڭعاي ەكونوميكالىق كەڭىستىك اياسىندا تەك ۇلتتىق ۆاليۋتالارمەن ەسەپ ايىرىسۋ قيسىنعا كەلمەيدى دەگەن پىكىردە. قازاقستان وزگە دە مەملەكەتتەرمەن تىعىز ەكونوميكالىق بايلانىس ورناتقان.

«ەندەشە دوللار مەن ەۋرودان باس تارتۋ مۇمكىن ەمەس»، - دەدى قوعامدىق پروبلەمالاردى ساراپتاۋ ورتالىعىنىڭ ديرەكتورى مەرۋەرت ماحمۇتوۆا. ول رەسەيلىك ماماننىڭ بۇل باستاماسى مەرزىمىنەن ەرتە جاسالدى دەپ ەسەپتەيدى.

«قازاقستان تەك رەسەيمەن عانا ەكونوميكالىق بايلانىس ورناتىپ وتىرعان جوق. ال ارمەنيامەن قارىم-قاتىناسىمىز شامالى. ەكونوميكامىز ءۇشىن حالىقارالىق ۆاليۋتالاردان ءبىز ەشقايدا كەتپەيمىز. جالپى بىزگە دوللار دا ەۋرو دا قاجەت بولادى»، - دەيدى قوعامدىق پروبلەمالاردى ساراپتاۋ ورتالىعىنىڭ ديرەكتورى مەرۋەرت ماحمۇتوۆا.

استانا تەلەارناسى