نۇرسۇلتان نازاربايەۆ «تۇرىكمەننىڭ ەل اعاسى» قۇرمەتتى اتاعىن الدى - فوتو
ەستەرىڭىزگە سالا كەتسەك، 2- جەلتوقسان كۇنى ن. نازاربايەۆ تۇرىكمەنستانعا رەسمي ساپارمەن باردى. ساپار بارىسىندا قازاقستان پرەزيدەنتى قازاقستان-تۇرىكمەنستان-يران حالىقارالىق تەمىرجول ماگيسترالىنىڭ اشىلۋ سالتاناتىنا قاتىسادى دەپ جوسپارلانعان.
ەلباسىنىڭ باسپا ءسوز قىزمەتىنىڭ مالىمدەۋىنشە، كەلىسسوز بارىسىندا ن. نازاربايەۆ ءبىزدىڭ ەل تۇرىكمەنستاندى تۋىس جانە سەنىمدى سەرىكتەس سانايتىنىن جەتكىزگەن. سونداي-اق ن. نازاربايەۆ تاۋار الماسۋ دەڭگەيىنىڭ وسكەنىن، الداعى ۋاقىتتا ساۋدا-ەكونوميكالىق قارىم-قاتىناستى ودان ءارى ارتتىرۋ كەرەك ەكەنىن اتاپ ءوتتى.
«الەمدە بولىپ جاتقان كەلەڭسىز وزگەرىستەرگە قاراماستان قازاقستان مەن تۇرىكمەنستان اراسىندا ساۋدا قاتىناسىنىڭ وسكەنى بايقالادى. بۇل ءبىزدىڭ ەكونوميكامىزدىڭ دامىعانىن كورسەتەدى. ءبىز ساۋدا-ساتتىق كولەمىن ميلليارد دوللارعا جەتكىزۋ ءۇشىن بار مۇمكىنشىلىكتى پايدالانۋىمىز كەرەك»، - دەدى قازاقستان پرەزيدەنتى نۇرسۇلتان نازاربايەۆ.
