مەن اقشامدى دوللاردا ساقتايمىن - «قازاقستان حالىق بانكى» ا ق باسقارما ءتورايىمى ءۇمىت شاياحمەتوۆا
«كاپيتالدىڭ دوللار دەپوزيتتەرىنە قاراي اعىنى بايقالادى. دوللار دەپوزيتتەرىنىڭ ستاۆكالارى 1,4 پايىز بولسا دا. ال بانكتەر كەرىسىنشە قازىر تەڭگەنىڭ وتىمدىلىگىن ارتتىرۋ ءۇشىن 10 پايىزعا دەيىن سىياقى قويدى. سوندا دا حالىقتىڭ سەنىمى ازايىپ بارادى. ماسەلەن، «حالىق بانكىندە» جىل باسىندا زاڭدى تۇلعالاردىڭ دوللارلىق دەپوزيتتەرى 44 پايىز بولسا، قازىر كەرىسىنشە دوللارداعى دەپوزيتتەر 56 پايىزدى قۇرادى. ال جەكە تۇلعالاردىڭ 70 پايىزى قازىر اقشاسىن دوللاردا ساقتاۋدى ءجون سانايدى»، - دەدى ءۇمىت شاياحمەتوۆا.
ونىڭ ايتۋىنشا، بۇدان ارى كاپيتال اعىنى قارقىندى بولمايدى. ويتكەنى، زاڭدى تۇلعالاردىڭ ءومىر سۇرۋىنە، جالاقى تولەۋىنە تەڭگە قاجەت.
بانك باسشىسى ءوزىنىڭ سالىمىن دوللاردا ساقتايتىنىن جەتكىزدى.
«بيىلعى ديەۆالۆاتسيا كەزىندە مەن ۇلكەن سومامدى جوعالتىپ الدىم. سودان بەرى اقشامدى دوللاردا ساقتاپ كەلەمىن»، - دەدى ءۇ. شاياحمەتوۆا.
رەسەي رۋبلىنىڭ بىردەن قۇلديلاۋىنا قاراي قازاقستاننىڭ سولتۇستىك وڭىرلەرىندە رەسەي ۆاليۋتاسىنا دەگەن سۇرانىس ارتىپ كەتكەندىگى بەلگىلى.
ونىڭ ايتۋىنشا، بۇل جاعداي وتاندىق تاۋار وندىرۋشىلەردىڭ ەكونوميكالىق احۋالىنا كەرى اسەر ەتەدى.
«وكىنىشكە وراي، قازىر وسىنداي جاعداي قالىپتاستى. شەكارا اشىق. ادامدار حالىق تۇتىناتىن تاۋارلاردان باستاپ، اۆتوكولىككە دەيىن الىپ كەلىپ جاتىر. اسىرەسە، وتاندىق اۆتو وندىرىسكە بۇل تەندەنسيا جاعىمسىز اسەر ەتىپ جاتىر. ونى ءبىز نەسيە پورتفەلىنەن كورىپ وتىرمىز»، - دەدى ول.
بانك باسشىسى سونداي- اق، «قازاقستان حالىق بانكى » ا ق 2014 - جىلعى 9 اي ىشىندە جارتى ميلليارد دوللاردان اساتىن اسا جوعارى شوعىرلاندىرىلعان تازا كىرىسكە قول جەتكىزگەنىن، بۇل بانك جانە قازاقستانداعى بانك سەكتورىنىڭ بۇكىل تاريحى بويىنشا ەڭ جوعارى ناتيجە ەكەندىگىن اتاپ ءوتتى. 2013 - جىلعى 31 - جەلتوقسانعا قاراعاندا بانك اكتيۆتەرى 13,5 پايىزعا وسكەن. جۇمىس ىستەمەيتىن قارىزدار 2014 - جىلعى 30 - ماۋسىمداعى 15,4 پايىزعا قاراعاندا 2014 - جىلعى 30 - قىركۇيەكتە 14,1 پايىزعا تومەندەدى.
اۆتور: گۇلميرا عوسمانالي
