ن. نازاربايەۆ پەن گ. بەردىمۇحامەدوۆ ەكى ەل اراسىندا ىقپالداستىقتى كۇشەيتۋگە باعىتتالعان ءبىرقاتار قۇجاتتارعا قول قويدى

استانا. قازاقپارات - ەلباسى نۇرسۇلتان نازاربايەۆ پەن تۇركىمەنستان پرەزيدەنتى گۋربانگۋلى بەردىمۇحامەدوۆ كەلىسسوزدەر قورىتىندىسى بويىنشا بىرلەسكەن بريفينگ وتكىزدى.

بۇل تۋرالى اقوردانىڭ باسپا ءسوز قىزمەتىنەن حابارلادى.

نۇرسۇلتان نازاربايەۆ قول جەتكەن ۋاعدالاستىقتاردىڭ ەرەكشە ماڭىزدىلىعىن اتاي كەلىپ، كەڭ اۋقىمداعى ماسەلەلەر جونىندە جۇرگىزىلگەن كەلىسسوزدەردىڭ ناتيجەسىنە جوعارى باعا بەردى.

- بۇگىنگى ساپار قارىم-قاتىناستارىمىزدى نىعايتۋعا دەگەن ورتاق ىقىلاستى كورسەتەدى. ىنتىماقتاستىقتى دامىتۋ جونىندە پىكىر الماسىلدى. سونداي-اق بىزگە ءسوزسىز اسەرى تيەتىن وڭىرلىك جانە جاھاندىق قاۋىپسىزدىك ماسەلەلەرى تالقىلاندى. ءبىز ەلدەرىمىز اراسىنداعى ىقپالداستىقتى كۇشەيتۋگە باعىتتالعان ءبىرقاتار ەكىجاقتى قۇجاتتارعا قول قويدىق، - دەدى قازاقستان پرەزيدەنتى.

مەملەكەت باسشىسى ەكى ەلدىڭ شەكارالاس اۋماقتارى اراسىنداعى تىكەلەي بايلانىستى دامىتۋدىڭ ماڭىزدىلىعىنا نازار اۋداردى.

- ماڭعىستاۋ وبلىسىنىڭ اكىمدىگى مەن بالقان ءۋالاياتى حياكيمليگى اراسىندا ساۋدا-ەكونوميكالىق، عىلىمي-تەحنيكالىق جانە مادەني ىنتىماقتاستىق تۋرالى كەلىسىمگە قول قويىلدى. ول شەكارالاس وبلىستاردىڭ ءوزارا ىقپالداستىعىن تەرەڭدەتۋگە ەلەۋلى سەرپىن بەرەتىن بولادى،- دەدى نۇرسۇلتان نازاربايەۆ.

قازاقستان پرەزيدەنتى كەلىسسوزدەر بارىسىندا ءوسىم ءۇشىن جاقسى الەۋەتكە يە ساۋدا-ەكونوميكالىق ىنتىماقتاستىقتى دامىتۋ ماسەلەلەرىنە زور كوڭىل بولىنگەنىن ايتتى.

- ەلدەرىمىز اراسىنداعى تاۋار اينالىمى بيىلعى 9-ايدا %23  عا ۇلعايدى. الەمدە داعدارىس قۇبىلىستارى بولىپ، ەكسپورت ازايىپ جاتقان كەزدە ءبىزدىڭ ەلدەرىمىز اراسىنداعى ساۋدا ءوسۋ ۇستىندە، ونىڭ مولشەرى 500 ميلليون دوللارعا تايادى.

ءبىراق بۇل قارقىن دا ءبىزدىڭ ءوزارا ىقپالداستىعىمىزدىڭ بۇكىل الەۋەتىن تولىق اشپايدى. تاياۋ ۋاقىتتا تاۋار اينالىمىن ۇلعايتۋ جونىندەگى بىرلەسكەن جۇمىس توبىنىڭ ءبىرىنشى وتىرىسىن وتكىزۋ جوسپارلانۋدا، - دەدى نۇرسۇلتان نازاربايەۆ.

مەملەكەت باسشىسى قازاقستاننىڭ سىرتقى ساۋدا پالاتاسى مەن تۇرىكمەنستاننىڭ ونەركاسىپشىلەر جانە كاسىپكەرلەر وداعى اراسىندا قۇرىلعان ىسكەرلىك كەڭەس ەكى ەلدىڭ بيزنەس-قوعامداستىقتارىنىڭ وكىلدەرى اراسىنداعى پايدالى ەكونوميكالىق بايلانىستاردى جولعا قويۋعا سەپتىگىن تيگىزەتىنىن ايتتى.

نۇرسۇلتان نازاربايەۆ «قازاقستان- تۇركىمەنستان- يران» حالىقارالىق تەمىرجول ماگيسترالىنىڭ قازاقستان- تۇرىكمەنستان ۋچاسكەسىنىڭ ىسكە قوسىلۋى ارقاسىندا قول جەتكەن ايتارلىقتاي ەكونوميكالىق تيىمدىلىككە نازار اۋداردى.

- ونىڭ ىسكە قوسىلۋى ارقىلى بيىلدىڭ وزىندە، 8 ايدىڭ قورىتىندىسى بويىنشا،

جۇك اعىنى %40 عا جۋىق ۇلعايدى، - دەدى مەملەكەت باسشىسى.

قازاقستان پرەزيدەنتى تۇرىكمەن-يران ۋچاسكەسىن ىسكە قوسۋ دا ءوڭىر ەلدەرى ءۇشىن زور ماڭىزعا يە بولاتىنىنا توقتالدى.

- «وزەن - بەرەكەت - گورگان» تەمىرجولى ءبىزدىڭ ەلدەرىمىزگە سولتۇستىك جانە وڭتۇستىك باعىتتاردا جۇك تاسىمالىن ۇلعايتۋعا مۇمكىندىك بەرەدى. ءبىز ەلدەرىمىزدىڭ گەوگرافيالىق قونىسىن ەۋروپا مەن ازيا اراسىنداعى ترانزيتتىك كوپىر رەتىندە بۇدان ءارى دە بارىنشا ءتيىمدى پايدالانۋعا ۋاعدالاستىق، - دەدى نۇرسۇلتان نازاربايەۆ.

سونىمەن قاتار، مەملەكەت باسشىسى قازاقستان اۋماعىنداعى جاڭا باعىتتار تۇركىمەنستانعا قىتاي جانە ودان ءارى تىنىق مۇحيتىنا قاراي جۇك تاسىمالداۋ مۇمكىندىگىن اشاتىنىنا توقتالدى.

نۇرسۇلتان نازاربايەۆ ەلدەرىمىز حالىقارالىق سالادا ءوزارا قولداۋ كورسەتىپ، ىنتىماقتاستىقتى ءارى قاراي دامىتاتىنىن ايتتى.

- ب ۇ ۇ، ي ى ۇ، ت م د، تۇركى كەڭەسى جانە باسقا دا حالىقارالىق ۇيىمدار اياسىنداعى باستامالاردى جۇزەگە اسىرۋعا بەلسەنە قاتىساتىن بولامىز، - دەدى مەملەكەت باسشىسى.

قازاقستان پرەزيدەنتى ساپار قورىتىندىسى قازاق-تۇرىكمەن قاتىناستارىن ىقپالداستىقتىڭ بارىنشا ساپالى دەڭگەيىنە شىعاراتىنىنا سەنىم ءبىلدىردى.

تۇركىمەنستان پرەزيدەنتى ءوز سوزىندە ەكى ەلدىڭ اراسىنداعى ءداستۇرلى دوستىق پەن اشىقتىق اۋانىندا وتكەن كەلىسسوزدەردىڭ جەمىستى بولعانىن اتاپ ءوتتى.

- ءبىز بارلىق باعىتتار بويىنشا ەكىجاقتى ديالوگتىڭ قازىرگى دەڭگەيىن جوعارى باعالادىق. ءبىزدىڭ قازاقستانمەن بايلانىستارىمىز تەڭقۇقىلىق جانە ءوزارا تيىمدىلىك قاعيداتىمەن قارقىندى ءارى جۇيەلى دامىپ كەلەدى، - دەدى گ. بەردىمۇحامەدوۆ.

ول سونداي-اق ەكى ەلدىڭ ىنتىماقتاستىعى ورتالىق ازيا مەن كاسپي ءوڭىرى كەڭىستىگىندەگى تۇراقتىلىق پەن قاۋىپسىزدىكتىڭ ستراتەگيالىق فاكتورى بولىپ وتىرعانىن ايتتى.

سونىمەن قاتار، گ. بەردىمۇحامەدوۆ كەلىسسوزدەر بارىسىندا ەكونوميكا جانە ساۋدا، سونىڭ ىشىندە تاۋار اينالىمىن ءارتاراپتاندىرۋ، ينۆەستيتسيالىق ساياساتتى جانداندىرۋ، ونەركاسىپتە، اگرارلىق كەشەندە جانە كولىك سالاسىندا ءىرى جوبالاردى جۇزەگە اسىرۋ ماسەلەلەرىنە ايرىقشا نازار اۋدارىلعانىن مالىمدەدى. سوڭىندا تۇرىكمەنستان پرەزيدەنتى قازاقستان حالقىنا تاتۋلىق پەن باق- بەرەكە تىلەيتىندىگىن جەتكىزدى.

بريفينگ بارىسىندا سونداي-اق نۇرسۇلتان نازاربايەۆقا تۇركىمەنستان مەن قازاقستاننىڭ اراسىنداعى تاتۋ كورشىلىك جانە دوستىق قارىم- قاتىناستاردى نىعايتۋ ىسىنە قوسقان زور ۇلەسى ءۇشىن «تۇركىمەننىڭ ەل اعاسى» قۇرمەتتى اتاعىن تاپسىرۋ ءراسىمى ءوتتى.

***

مەملەكەت باسشىلارىنىڭ كەلىسسوزدەر قورىتىندىسى بويىنشا تومەندەگىدەي قۇجاتتارعا قول قويىلدى:

- حالىقارالىق تۇركى اكادەمياسى مەن تۇركىمەنستان عىلىم اكادەمياسىنىڭ اراسىنداعى ءوزارا تۇسىنىستىك تۋرالى مەموراندۋم؛

- قازاقستاننىڭ سىرتقى ساۋدا پالاتاسى مەن تۇركىمەنستاننىڭ ونەركاسىپشىلەر جانە كاسىپكەرلەر وداعىنىڭ اراسىندا ىسكەرلىك كەڭەس قۇرۋ تۋرالى كەلىسىمگە؛

- قازاقستان رەسپۋبليكاسى ماڭعىستاۋ وبلىسىنىڭ اكىمدىگى مەن تۇركىمەنستاننىڭ بالقان ءۋالاياتىنىڭ حياكيمليگى اراسىندا ساۋدا-ەكونوميكالىق، عىلىمي-تەحنيكالىق جانە مادەني ىنتىماقتاستىق تۋرالى كەلىسىم؛

- قازاقستان رەسپۋبليكاسى ۇكىمەتى مەن تۇركىمەنستان ۇكىمەتى اراسىندا قازاقستان - تۇركىمەنستان - يران حالىقارالىق ترانزيتتىك تەلەكوممۋنيكاتسيالىق باعىتىن قۇرۋ تۋرالى مەموراندۋم

- قازاقستان رەسپۋبليكاسى ۇكىمەتى مەن تۇركىمەنستان ۇكىمەتىنىڭ اراسىندا تەڭىز كولىگى سالاسىنداعى ىنتىماقتاستىق تۋرالى كەلىسىم؛

- قازاقستان رەسپۋبليكاسى پرەزيدەنتى مەن تۇركىمەنستان پرەزيدەنتىنىڭ بىرلەسكەن مالىمدەمەسى.