قازاقتار رەسەيدەن كولىك پەن پاتەردى جاپپاي ساتىپ الىپ جاتىر

استانا. قازاقپارات - رۋبل قۇلدىراعان سايىن ەلىمىزدىڭ رەسەيمەن شەكارالاس وبلىستارىنىڭ تۇرعىندارى كورشىلەردىڭ ساۋداسىن قىزدىرۋدا.

وتانداستارىمىز رەسەيدەن تۇرمىستىق تەحنيكا مەن ازىق -تۇلىك تاسىسا، قالتالى قازاقستاندىقتار كولىك پەن جىلجىمايتىن مۇلىككە دەيىن ساتىپ الىپ جاتىر.

ويتكەنى ول جاقتا تاۋار قۇنى 30-35 پايىزعا دەيىن ارزانداعان. سولتۇستىك شەكارا جاقتاعى الىس- بەرىس جايىندا ءتىلشىمىز گۇلميرا تاسبولات قىزى ايتىپ بەرسىن.

يۋري اۋباكىروۆ كۇن سايىن عالامتوردان رەسەيدىڭ جىلجىمايتىن مۇلىك نارىعىنداعى جاعدايدى باقىلاپ وتىرادى. كورشى ەلدەن پاتەر ساتىپ الۋ ونىڭ بايىرعى ارمانى. ەندى رۋبل قۇنىنىڭ قۇلدىراۋىنا بايلانسىتى سونى ورىنداۋدىڭ ءساتى كەلگەن سياقتى.

يۋري اۋباكىروۆ، پەتروپاۆل قالاسىنىڭ تۇرعىنى:

- قازىر ومبىداعى جانە پەتروپاۆلداعى پاتەرلەردىڭ قۇنى تەڭەسىپ قالدى. كوشەيىن دەگەن ويىم جوق. انامنان مۇراعا قالعان باسى ارتىق پاتەرىمدى ساتىپ، كورشى ەلدەن باسپانا الىپ قويسام دەيمىن. ءوز ويىمشا، مەن وسىلاي كاپيتالدى ءتيىمدى ورنالاستىرىپ وتىرمىن.

ال گۇلنار ماديەۆا رەسەيدىڭ ومبى قالاسىنان ساتىپ العان كولىگىنە ءماز. پەتروپاۆلدا مۇنداي كولىك كەمى 12-15 مىڭ دوللار تۇرادى. ال ول كورشى ەلدەن سول ماشينانى 8 مىڭ دوللارعا ساتىپ الىپتى.

گۇلنار ماديەۆا، پەتروپاۆل قالاسىنىڭ تۇرعىنى:

- بۇكىل قازاقستاننان ومبىعا بارىپ جاتىر، ماشينا الىپ جاتىر. باي قازاقتار، قالتالى، اقشاسى بار كىسىلەر بارىپ سول جاقتان الىپ جاتىر. جاقسى، ءارى ارزان.

قىزىلجارلىقتاردىڭ تاياق تاستام جەردەگى رەسەيگە اعىلۋى تەگىن ەمەس. بيىل كوكتەمدە عانا رۋبل 5 تەڭگە 38 تيىننان ساتىلىپ ەدى. ەندى مىنە اراعا بەس اي سالىپ ونىڭ قۇنى ەكى ەسەگە دەيىن ءتۇستى. كەيبىر تۇرعىندار كورشى ەلگە ايلىق العان سايىن باراتىن بولعان.

ناتاليا رودينا، پەتروپاۆل قالاسىنىڭ تۇرعىنى:

- ارينە، بىزگە كورشى ەلگە بارىپ كەرەك-جاراعىمىزدى العان ءتيىمدى. تەك سول جاقتاعى باعالار وسپەسە دەپ وتىرمىز. اي سايىن جالاقى العان كۇنى كەلىپ رۋبل ساتىپ الامىز دا، رەسەيگە جول تارتامىز.

الەمدىك نارىقتا مۇناي باعاسىنىڭ ارزانداۋى مەن ەۋروپا تاراپىنان قويىلعان ءتۇرلى سانكتسيالاردىڭ رۋبلگە اسەر ەتپەي قويماعانى انىق. رەسەي ساراپشىلارى ءتۇرلى باسىلىمدارعا بەرگەن سۇحباتتارىندا ورىس اقشاسىنا قاتىستى جامان دا، جاقسى دا بولجام جاساعان. ولارعا سەنسەك، ەكى جاعدايدا دا بۇل ۆاليۋتانىڭ تاعدىرى تىكەلەي ۋكرايناداعى احۋالعا بايلانىستى ەكەن.

- وپتيميستىك بولجام بويىنشا، ەكى ەل اراسىنداعى ساياسي احۋال جاقسارسا، رۋبلدىڭ دوللارعا شاققانداعى باعامى 45 كە كەلىپ تىرەلۋى مۇمكىن. ال ەگەر پەسسيميستىك بولجام ورىندالسا، الداعى 2015 - جىلى رۋبل قازىرگىمەن سالىستىرعاندا تاعى دا 10-15 پايىزعا قۇلدىرايتىن بولادى.

ktk