بەكبولات تىلەۋحان: «تىعىرىقتان جول تاپقان» تۋىندىسىن ءاربىر قازاق كورۋى ءتيىس

استانا. قازاقپارات - «ەلباسى جولى» كينو ەپوپەياسىنىڭ «تىعىرىقتان جول تاپقان» فيلمىن قازاقتىڭ ءاربىر بالاسى كورۋى ءتيىس. تۋىندىنى تاماشالاعاننان كەيىن العان اسەرىمەن بولىسكەن قر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان وسىنداي پىكىر ءبىلدىردى،

 دەپ حابارلايدى  BNews.kz ءتىلشىسى.
 
 «كينودا ءبىر ادامنىڭ ءومىر جولى ارقىلى بۇكىل ۇلتتىڭ تاعدىرى كورسەتىلگەن. ءبىر نازاربايەۆتىڭ تۇلعاسى ارقىلى بۇكىل قازاق تاريحىن، ونىڭ ىشىندە وتارلىق ساياساتتىڭ جەلىسىن كورسەتۋى، سونىمەن قاتار، تاربيەلىك ءمانى، ياعني، اتا- اناعا دەگەن كوزقاراس، تۋعان جەرگە دەگەن ماحاببات -  وسىنىڭ ءبارىن ءجىپتىڭ بويىنا ءتىزىپ، اسقان شەبەرلىكپەن رەجيسسەردىڭ كورسەتە الۋى ەكىنىڭ ءبىرىنىڭ قولىنان كەلەتىن دۇنيە ەمەس»، - دەيدى ول.

 بەكبولات تىلەۋحان «تىعىرىقتان جول تاپقان» فيلمىن وتە ءساتتى شىققان كينو دەپ باعالادى.

 «داستۇرگە دەگەن ەلباسىنىڭ كوزقاراسىن بۇكىل ەل بىلەدى عوي. دومبىرانىڭ بولۋى، قولىنا بۇركىت الىپ، تازى ەرتىپ، اڭشىلىققا شىققان ساتتەر، وسىلايشا تۇلعانىڭ بويىنداعى قاسيەتتەردى اسپەتتەۋ ارقىلى ۇلتتىق قۇندىلىققا دەگەن ماحابباتتى وياتاتىن دەتالدەردىڭ كينودا بولۋى وتە ءساتتى قادام دەپ ويلايمىن. بۇل كينونى قازاقتىڭ ءاربىر بالاسى، ءاربىر قازاقستاندىق كورۋى ءتيىس. جاقسى جاعى مول، ءساتتى شىققان تۋىندى ەكەنىنە كۇمان بولماسىن. بۇعان قوسا، ناعاشى اتاسىنىڭ قانىنا سىڭگەن مۇسىلمانشىلدىعىنا دەيىن كورىنىپ وتىر. ءدىن دەيسىز بە، ءداستۇر دەيسىز بە، اڭشىلىق دەيسىز بە، ءداۋىردىڭ تىنىسى دەيسىز بە -  وسىنىڭ ءبارىنىڭ كورسەتىلگەنى مەنى قۋانتتى»، - دەپ فيلمدى كورگەننەن كەيىن اسەرىمەن ءبولىستى ب. تىلەۋحان.

 ايتا كەتەيىك، كەشە، استانادا تۇڭعىش پرەزيدەنت كۇنىندە مەملەكەت باسشىسى نۇرسۇلتان نازاربايەۆتىڭ شىعارمالارىنىڭ جەلىسىمەن تۇسىرىلگەن «ەلباسى جولى» كينو ەپوپەياسىنىڭ «تىعىرىقتان جول تاپقان» فيلمىنىڭ تۇساۋكەسەرى ءوتتى.

 «تىعىرىقتان جول تاپقان» فيلمى «ەلباسى جولى» كينو ەپوپەياسىنىڭ ءتورتىنشى فيلمى. جاڭا كارتينا مەملەكەت باسشىسى پارتيا حاتشىسى بولىپ سايلانىپ، ۇلكەن ساياساتقا ەندى ارالاسا باستاعان 1971 مەن 1977- جىلدار ارالىعىن قامتيدى. بۇل فيلمدە دە باستى ءرولدى اكتەر نۇرلان ءالىمجانوۆ سومدادى.

اۋەلى فيلم «پارتكوم حاتشىسى» دەپ اتالىپ، سوڭعى مەزەتتە عانا «تىعىرىقتان جول تاپقان» دەپ وزگەرتىلگەن.

«قازاق فيلم» كينوستۋدياسىندا تۇسىرىلگەن «تىعىرىقتان جول تاپقان» فيلمى جالپى ۇلتتىق پروكاتقا 4 - جەلتوقساننان باستاپ شىعادى.

بۇعان دەيىن «ەلباسى جولى» كينوەپوپەياسىنىڭ «بالالىق شاعىمنىڭ اسپانى» ، «وت وزەن» جانە «تەمىرتاۋ» تۋىندىلارى جارىق كوردى.

ايىمگۇل ابىلەۆا