پرەزيدەنت سارا نازاربايەۆانىڭ ءرولىن سومداعان اكتريساعا العىسىن ايتتى
مەملەكەت باسشىسى جۇبايىنىڭ ءرولىن سومداعان اكتريسا ءمادينا ەسمانوۆا ەلباسى ونىڭ فيلمدەگى ەڭبەگىن جوعارى باعالاعانىن ايتتى. «ول العاش كىرىپ كەلگەن بويدا ماعان قاراپ: «سەن جاقسى وينادىڭ». ال شىعىپ بارا جاتىپ، مەنىڭ قاسىما كەلىپ تۇرىپ بىلاي دەدى: «سەن ءرولدى وتە تاماشا وينادىڭ. ساعان كوپ راحمەت». كورەرمەن بەرگەن باعا ەڭ جوعارعى باعا دەپ ەسەپتەيمىن. سوندىقتان مەن ءۇشىن بۇل سوزدەردەن ارتىق سىيلىق جوق. ونىڭ ۇستىنە باسقا ۇلت كوشباسشىسىنىڭ ءوزى جىلى پىكىر ءبىلدىرىپ جاتسا بۇل فيلمدى ءساتتى شىقتى دەۋگە تولىق نەگىز بار»، - دەدى اكتريسا. «ەكىنشى جانە ءۇشىنشى بولىمدە مەن جاس قىزدىڭ ءرولىن سومداسام، ال ءتورتىنشى بولىمدە كەلىنشەكتىڭ ءرولىن وينادىم»، - دەپ تولىقتىردى ءوز ءسوزىن ەسمانوۆا.
ول سونداي-اق، جاي رولدەردى سومداعاننان گورى تاريحي رولدەردە ويناۋ الدەقايدا قيىن. سەبەبى مەنىڭ كەيىپكەرىمدى ەلدىڭ بارلىعى تانيدى. «ارينە مەن ول كينودا جۇبايىن جاقسى كورەتىن قاراپايىم عانا ايەلدىڭ ءرولىن وينادىم. جانە مەن ءبىرىنشى حانىمنىڭ ەمەس، ءوزىنىڭ دۇنيە تانىمى بار، وزىنە عانا بەلگىلى قورقىنىشى دا جوق ەمەس قاراپايىم ايەلدى سومدادىم. ءار كۇشتى ەركەكتىڭ ارتىندا كۇشتى ايەل تۇرادى ەمەس پە»، - دەپ ءسوزىن تولىقتىردى اكتريسا.
ەسمانوۆانىڭ سوزىنە قاراعاندا، ول ومىردە سارا نازاربايەۆامەن جۇزدەسىپ كورمەگەن. «ال ەكىنشى ءبولىم ەكرانعا شىققاندا ول كىسى اتقارىلعان جۇمىسقا كوڭىلى تولاتىنىن، وزىنە فيلم ۇناعانىن ايتتى. مەن ءۇشىن بۇدان اسقان سىيلىق جوق»، - دەپ تولىقتىردى ول ءوز ءسوزىن.
فيلمنىڭ ءتورتىنشى بولىمىندە باسىمدىق مەملەكەت باسشىسىنىڭ جەكە ومىرىنە بەرىلگەن. وتباسىنا دەگەن قامقورلىعى دا نازاردان تىس قالعان جوق. بۇل كارتينادا پرەزيدەنتتىڭ ەكى بالاسى - قىزدارى داريعا مەن دينارانىڭ بالا كۇنگى بەينەسى كورىنىس تابادى. ال داريعا نازاربايەۆانىڭ 12 جاس شاماسىنداعى ءرولىن ويناعان بالعىن اكتريسا، ءارى ءانشى اقەركە سۇلەيمەنوۆا فيلم بارىسىندا ءان دە ايتقان جەرى بار.
«مەن ءۇشىن بۇل ءرولدى سومداۋ اسا قيىندىق تۋعىزا قويعان جوق. ال بۇگىن بۇل كينونى كورگەنىمدە جىلاپ جىبەرۋگە شاق قالعانىمدى جاسىرمايمىن. پرەزيدەنتتىڭ الدىندا تۇرعانىمدى سوزبەن ايتىپ جەتكىزۋ مۇمكىن ەمەس. مەنىڭ ومىرىمدە سومداعان رولىمە سونشالىقتى بەرىلىپ، ەنىپ كەتكەن كەزىم بولعان جوق دەسەم قاتەلەسپەيمىن. بولعان وقيعالار ناق ءوزىمنىڭ باسىمنان ءوتىپ جاتقانداي بولىپ كورىندى ماعان»، - دەدى ول.
اقەركە دە بۇعان دەيىن ءوز كەيىپكەرىمەن جۇزدەسە قويماعان. «بۇل، تەك ازىرگە عانا»، - دەپ كۇلدى ول. بالعىن اكتريسا بۇعان دەيىن «عاشىق جۇرەك»، «تراكتورشىنىڭ ماحابباتى» جانە تاقيا life اتتى سەريالداردا ويناعان.
ال مەملەكەت باسشىسىنىڭ ءرولىن سومداعان نۇرلان ءالىمجانوۆ جۋرناليستەرمەن فيلمنىڭ پرەمەراسى كورسەتىلمەي جاتىپ-اق تىلدەسىپ ۇلگەرگەن ەدى. «الدىمەن مەن سىزدەردى تۇڭعىش پرەزيدەنت كۇنىمەن قۇتتىقتايمىن. بارلىقتارىڭىزعا ساتتىلىك، باقىت، تابىس تىلەيمىن. ءوز باسىم فيلمدى ءالى كورگەن جوقپىن. بارلىقتارىڭىزعا ۇنايدى دەپ ۇمىتتەنەمىن»، - دەدى نۇرلان.
«بۇل - تاريحي ءتىرى وبراز. سوندىقتان زور جاۋاپكەرشىلىك جۇكتەلگەنى بەلگىلى. سوعان قاراماستان كينوەپوپەيانىڭ ءبىرىنشى جانە ەكىنشى ءبولىمى حالىقتىڭ دا، پرەزيدەنتتىڭ دە كوڭىلىنەن شىققان بولاتىن. ءتورتىنشى ءبولىمنىڭ دە كوپشىلىكتىڭ كوڭىلىنەن شىعاتىنىنا سەنىم ارتامىن»، - دەدى اكتەر.
ەسكە سالامىز، بۇل كارتينا «ەلباسى جولى» كينوەپوپەياسىنىڭ جالعاسى ىسپەتتى. جالپى كينوەپوپەيا «بالالىق شاعىمنىڭ اسپانى»، «وتتى وزەن» جانە «تەمىر تاۋ» اتتى بولىمدەردەن تۇرادى. فيلم سەناريىن قازاقستاندىق بەلگىلى دراماتۋرگ-سەناريست شاحيماردان قۇسايىنوۆ، رۇستەم ءابدىراشوۆ پەن گەننادي زەمەل نۇرسۇلتان نازاربايەۆ تۋرالى كىتاپ جەلىسى بويىنشا بىرىگىپ جازعان. رەجيسسەر - رۇستەم ءابدراشوۆ. فيلمدە مەملەكەت باسشىسىنىڭ زامانداستارى، دوستارى مەن ارىپتەستەرىنىڭ دە ەستەلىكتەرى ەسكەرىلگەنىن ايتا كەتكەن ءجون.
جاڭا فيلمدە باس كەيىپكەردىڭ ورتالىق ازيا بويىنشا ەڭ ءىرى «قارمەتكومبيناتتا» باسشىلىقتا ءجۇرىپ پارتيالىق ۇيىمداستىرۋ ىسىندە جۇرگەن كەزەڭدەرى كورىنىس تابادى. فيلم جەلىسى بويىنشا پرەزيدەنت دنەپرودزەرجينسك قالاسىنان وقۋىن اياقتاپ كەلىپ، ۇلكەن ىسكە ارالاسا باستاعان شاعى باياندالادى. كينوەپوپەيانىڭ ءتورتىنشى ءبولىمى استانا، الماتى، تەمىرتاۋ مەن ماسكەۋ قالالارىندا قاتار تۇسىرىلگەن. كارتينا پروكاتقا 2014-جىلى 4- جەلتوقساندا شىعادى.
