كارىستىڭ تراكتورى شىمكەنتتەن شىعادى
دەپ حابارلادى www.shymkent.gov.kz.
بۇل ەكى كومپانيا اراسىندا وڭتۇستىك قازاقستاندا «KIOTI»برەندىمەن تراكتور شىعاراتىن زاۋىت سالۋ بويىنشا ءتيىستى كەلىسىم جاسالعان. بۇل كەلىسىمگە «ەۋرازيالىق ەكونوميكالىق وداق اياسىنداعى جاڭا ينۆەستيتسيالىق مۇمكىندىكتەر» حالىقارالىق ينۆەستيتسيالىق فورۋمى اياسىندا قول قويىلدى.
قۇرىلىس 2014 - جىلدىڭ قازان ايىندا باستالعان. اۋماعى 70 گەكتار جەردى قۇرايدى. ازىرگە 5 گەكتار اۋماقتا تۇرعىزىلاتىن نەگىزگى زاۋىت پەن كەڭسە عيماراتىنىڭ دا قۇرىلىسى قاتار ءجۇرىپ جاتىر. باس- اياعى 105 قۇرىلىسشى الا تاڭنان قاس قارايعانعا دەيىن جۇمىس ىستەيدى. قىس ءتۇسىپ، توڭ قاتقانعا دەيىن نولدىك فازا، ياعني بەتون قۇيۋ جۇمىستارىن اياقتاۋ قاجەت. ءازىردىڭ وزىندە ءبىرشاما بولىگى ەڭسەرىلىپ، ەندىگى بىتۋگە تاياپ قالعان.
نولدىك فازا اياقتالعاننان كەيىن، مونتاج جۇمىستارى باستالادى.
جالپى زاۋىتتىڭ ىسكە قوسىلۋ كەزەڭدەرى بىرنەشە كەزەڭگە بولىنگەن. ءبىرىنشى كەزەڭدە تراكتور بولشەگىنىڭ كەمى 30 پايىزى وسى زاۋىتتا شىعارىلادى. بۇل دەگەنىڭىز، تراكتور دوڭعالاقتارى مەن اككۋمۋلياتور تولىقتاي 100 پايىزى وسىندا وندىرىلەدى. ەكىنشى كەزەڭدە لوكاليزاتسيا كورسەتكىشى 50 پايىزىدان كەم بولمايدى. ياعني، تراكتور كابيناسى مەن تەرەزەلەرى وزىمىزدە جاسالادى. مۇندا شىعارىلاتىن تراكتور بولشەكتەرىنىڭ ۇلەسى جىلدان- جىلعا ارتا بەرەدى. ال، وعان دەيىن قوزعالتقىشى جانە تاعى باسقا قاجەتتى بولشەكتەرى وڭتۇستىك كورەيادان اكەلىنەدى. باستاپقىدا 300-400 ادام جۇمىسقا تارتىلسا، ودان كەيىنگى كەزەڭدە ەڭ ازى 600 ادام جۇمىسپەن قامتىلادى.
جوبانىڭ ءبىرىنشى كەزەڭىنىڭ قۇنى - 41 ميلليون ا ق ش دوللارى. قارجىلاندىرۋ «جيلستروي يندۋستريا» ج ش س- ءنىڭ ءوز قارجىسى جانە وڭتۇستىك كورەيالىق «Daedong» كومپانياسىنىڭ قاراجاتى ەسەبىنەن، سونىمەن قاتار نەسيەلەندىرۋ، جەڭىلدىكپەن بەرىلەتىن سۋبسيديا ارقىلى جۇرگىزىلۋدە.
بىزبەن بىرگە قۇرىلىس اۋماعىن ارالاعان «جيلستروي يندۋستريا» كومپانياسىنىڭ ۆيتسە- پرەزيدەنتى باحتيار ماماتوۆتىڭ سوزىنشە، تۇركيالىق جانە وڭتۇستىك كورەيالىق تاعى دا باسقا كومپانيالارمەن كەلىسسوزدەر جاسالۋدا ەكەن. باستاپقىدا «KIOTI» تراكتورى جانە وعان قاجەتتى سوقا، تىرما مەن تاعى دا باسقا ءتۇرلى مىندەتتەرگە ارنالعان سوقا- سايمان، تىركەمەسى سىندى تولىمداۋشى تەحنيكالارى شىعارىلادى. ودان كەيىن، وزگە دە ارنايى تەحنيكا تۇرلەرى، مىسالى تۇركيانىڭ اۋىر جۇك تاسيتىن BMC ماشينالارىن قۇراستىرۋ جوسپارلانعان. نەگىزگى ماقسات: وڭتۇستىك قازاقستان وبلىسىندا ماشينا قۇرىلىسى كەشەنىن جاساۋ.
«KazKioti» تراكتور زاۋىتىن ءبىزدىڭ وبلىستا سالۋعا بىرنەشە جايتتار تۇرتكى بولىپتى. بىرىنشىدەن، وڭتۇستىكتىڭ اۋىلشارۋاشىلىعى سالاسىنىڭ اۋقىمى وزگە وڭىرلەردەن كوش ىلگەرى. «KIOTI» ماركالى تراكتورلارعا دەگەن سۇرانىس وسى وڭىردە جوعارى بولماق. ەكىنشىدەن، حالىق سانى كوپ. جۇمىس كۇشى دە مول. سايكەسىنشە، جۇمىس كۇشى استانا مەن الماتى قالالارىمەن سالىستىرعاندا ارزانعا تۇسەدى. زاۋىت جۇمىسشىلارىنىڭ دەنى وسى جەرگىلىكتى جۇرتشىلىق اراسىنان شىعاتىندىقتان، ولاردىڭ بارىپ- كەلۋ شىعىنى دا ازايادى. ۇشىنشىدەن، وڭتۇستىكتىڭ اۋا رايى زاۋىت جۇمىسىنا قولايلى. قىس ماۋسىمىنىڭ ۇزاققا سوزىلماۋى، جىل بويىنا اۋا تەمپەراتۋراسىنىڭ جوعارى بولۋى - زاۋىتتى جىلىتۋ جانە تاعى باسقا شىعىنداردان ۇنەمدەۋگە مۇمكىندىك بەرەدى.
ەندى ناق وسى «KIOTI» ماركالى تراكتورلاردى تاڭداۋعا دا بىرنەشە سەبەپ بار.
بۇل تاۋار بەلگىسىندەگى تراكتورلاردىڭ باعاسى وزگە دە جوعارى ساپالى تراكتور برەندتەرىمەن سالىستىرعاندا ارزان. ءبىراق، ارزاندىعىنا قاراماستان ساپا تۇرعىسىنان ەش قالىسپايدى. مىسالى، ارتقى بىلىك - تراكتوردىڭ قوزعالىسىنا تاۋەلسىز تۇردە رەتتەلەدى. ياعني، ارتقى بىلىك جەكە تەتىكپەن باسقارىلادى. ال، بۇگىندە وڭتۇستىك قازاقستاندا ءجيى قولدانىلىپ جۇرگەن باسقا تاۋار بەلگىسىندەگى تراكتورلاردا بۇل مۇمكىندىك قاراستىرىلماعان.
ەكىنشىدەن، كابينا ىشىنە جەلدەتكىش قويىلعان. بورت كومپيۋتەرى ورناتىلعان. قانداي دا ءبىر اقاۋ شىعا قالسا سول مەزەتىندە انىقتالادى. 16 ساتىلى بەرىلىس قورابىنا يە. «تاسباقا» ، «قويان» جانە تاعى باسقا اتاۋى قىزىق جىلدامدىقتى رەتتەيتىن تەتىك تۇرلەرى بار.
باحتيار ماماتوۆتىڭ ايتۋىنشا، «KIOTI» تراكتورلارى اۋىلشارۋاشىلىعىنىڭ بارلىق سالالارىندا قولدانۋعا جارايدى. مىسالى، 50 اتتىڭ كۇشىنە يە شاعىن «KIOTI» تراكتورلارى باۋ- باقشانىڭ بارلىق جۇمىستارىن اتقاراتىن جيىنتىقپەن جابدىقتالعان.
قاراشا ايىنىڭ باسىندا شىمكەنتتە وتكەن «AgriTek Shymkent 2014» اۋىل شارۋاشىلىعى جارمەڭكەسىنە «KIOTI» تراكتورلارى قويىلدى. سول جارمەڭكەگە كەلۋشىلەر تاراپىنان ساتىپ الۋعا كوپتەگەن ۇسىنىس تۇسكەن.
