ەلباسى ەلدىڭ جاڭا جىلدىق باس شىرشاسىنىڭ شامدارىن جاقتى - فوتو
ەلباسىمەن بىرگە باس شىرشانى جاعۋ قۇرمەتىنە حالىقارالىق جارىستاردىڭ جەڭىمپازدارى مۇحامەدالى جۇگىنىسوۆ پەن دانيا يشانقۇلوۆا يە بولدى.
بيىل قازاقستاننىڭ باس شىرشاسى «استانا وپەرا» وپەرا جانە بالەت تەاترىنىڭ الدىنداعى الاڭدا ورىن تەپتى. «باقىت قۇسى» دەپ اتالاتىن باستى شىرشانىڭ بيىكتىگى - 25 مەتر. شىرشا جۇزدەگەن ويىنشىقپەن جانە جارىقتاندىرعىش قۇرالدارىمەن اشەكەيلەندى. باس شىرشامەن ءبىر مەزگىلدە رەسپۋبليكاداعى بارلىق شىرشالاردىڭ شامدارى جاعىلاتىن بولادى.
پرەزيدەنت بارشا قازاقستاندىقتاردى الداعى جاڭا جىل مەرەكەسىمەن قۇتتىقتاپ، بولاشاقتارىنا باياندىلىق، دەندەرىنە ساۋلىق جانە باقىت تىلەدى.
«تاۋەلسىزدىك جىلدارىندا قازاقستانىمىز وركەندەپ، ءوستى، دۇنيەجۇزىنە بەلگىلى بولدى، ەلىمىزدىڭ ءال-اۋقاتى ارتتى. بارلىق جاساپ جاتقان شارۋامىز جاس ۇرپاقتىڭ جاعدايى ءۇشىن»،- دەدى پرەزيدەنت.
وسى ورايدا مەملەكەت باسشىسى ءبىلىمدى بالالاردى تاربيەلەۋ ءۇشىن مەكتەپتەر مەن بالاباقشالار، ۋنيۆەرسيتەتتەر جانە باسقا دا الەۋمەتتىك ماڭىزدى نىساندار سالىنىپ جاتقاندىعىن اتاپ ءوتتى.
«بالالار باقىتتى بولسا، ەل باقىتتى. سىزدەر تاۋەلسىز قازاقستاندا، بارشا الەمگە سىيلى ەلدە ءومىر سۇرىپ جاتىرسىزدار. بۇگىن ەلىمىزدىڭ ەڭ نەگىزگى شىرشاسىنىڭ شامدارىن جاعامىز. بارلىق ارماندارىڭىز ورىندالسىن! سوندىقتان، كەلە جاتقان جاڭا جىلدارىڭىز قۇتتى بولسىن!»،-دەدى ەلباسى.
بۇگىن اياز اتا، اقشاقار، ەرتەگى كەيىپكەرلەرى مەن كيىنگەن ۇلكەن قۋىرشاقتاردىڭ قاتىسۋىمەن وتكەن تەاترلاندىرىلعان قويىلىمدى ۇلكەندى-كىشىلى قالا تۇرعىندارى مەن قوناقتارى تاماشالادى. كورەرمەندەردىڭ باسىم دەنى الەۋمەتتىك جاعىنان تۇرمىسى تومەن جانە كوپبالالى وتباسىلاردان شىققان بالالار، اتا-انانىڭ قامقورلىعىنسىز قالعان بۇلدىرشىندەر بولدى.
رۋسلان عابباسوۆ
