ءبىرجان جاقىپوۆ برازيليالىق بوكسشىدان باسىم ءتۇستى

استانا. قازاقپارات - اۋەسقويلار اراسىندا بوكستان الەم چەمپيونى ءبىرجان جاقىپوۆ AIBA Pro Boxing (APB) ليتسەنزيالىق تۋرنيرىندە برازيليالىق بوكسشى شاگاسۋ ۆالەريو لوۋرەنسيدەن باسىم ءتۇستى.

تۋرنيردىڭ ەكىنشى تۋرىندا 49 كەلى سالماقتا ونەر كورسەتەتىن ب. جاقىپوۆ قارسىلاسى شاگاسۋ ۆالەريو لوۋرەنسيدى 59:55؛ 60:54؛ 60:54 ەسەبىمەن تىزە بۇكتىردى. ءبىرىنشى كەزەڭدە قازاقستاندىق بوكسشى قىتايلىق بىلعارى قولعاپ شەبەرى ليۋ بينگە ەسە جىبەرگەن بولاتىن.

ايتا كەتەيىك، AIBA Pro Boxing (APB) تۋرنيرىندە تاعى ءبىر قازاقستاندىق بوكسشى ءىلياس سۇلەيمەنوۆ (52 كەلى) قاتىسۋدا. بۇنىڭ الدىندا ول ەكى جەكپە-جەكتى دە ءوز پايداسىنا شەشكەن بولاتىن.

اۆتور: جاسۇلان جولدىبايەۆ