شىمكەنتتە جۇرگىزۋشىلەر بەنزين قۇيۋ ءۇشىن قوسىمشا تاۋار ساتىپ الۋدا

استانا. قازاقپارات - وڭتۇستىكتە جانارمايدى تەك تالونمەن قۇياتىن جاعدايعا جەتتى.

قازىر شىمكەنتتە شاھاردى شىر اينالىپ، بەكەتكە جەتە الماي تەمىر تۇلپارىمەن تۇرالاپ قالعاندار جەتەرلىك.

بۇل تۋرالى جەتىنشى ارنا حابارلايدى.

ال جۇرگىزۋشىلەر بەنزين تاپشىلىعىن پايدالانعاندار، امالىن تاۋىپ، ءوز ساۋداسىن قىزدىرۋدا دەپ وتىر. شىمكەنتتەگى جانارماي قۇيۋ بەكەتتەرىندە جاعداي كەزەكتى مارتە كۇردەلەنىپ تۇر. جۇرگىزۋشىلەر بەنزين ىزدەپ، شاھاردى شىر اينالۋمەن شارشاعان.

"قول جەتىمسىز بولىپ تۇرعانى ازداي، ساپاسى دا ناشار"، - دەيدى كولىك يەلەرى.

"بەنزين قىمباتتاعان سايىن ساپاسى ناشارلاپ جاتىر. بەكەتتەردەن قۇيساڭ ءۇش ايدا ماشيناڭدى جوندەپ تۇراسىڭ"، - دەيدى جۇرگىزۋشىلەردىڭ ءبىرى.

ال ەندى ءبىرى جانارمايدى تەك تالون ارقىلى عانا الۋ مۇمكىن ەكەنىن ايتادى.

"سينويل" بەكەتىندە بەنزين بەرمەيدى. تەك تالون سۇرايدى. جانارماي قۇيۋعا كەلەسىڭ، سونداعى دۇكەننەن ءبىر تاۋارىن ساتىپ المايىنشا ساعان بەنزين بەرمەيدى. شوكولاد نەمەسە تاعى باسقا سۋسىنداردى ساتىپ الۋ كەرەك. قۋلىققا كوشكەن عوي"، - دەيدى قالاداعى كولىك جۇرگىزۋشىسى.

 اتالمىش بەكەتتەر راسىمەن تەك تالونى بارلارعا عانا قىزمەت كورسەتۋدە. ال وپەراتورلار كەلگەندەرگە ەرەكشە تالاپ قويادى ەكەن. ونى ارنايى بەينەدەن بايقاۋعا بولادى.

 وپەراتور جۇرگىزۋشىگە 2-3 مىڭ تەڭگەگە بەنزين قۇيۋ ءۇشىن 5 ليترلىك تەرەزە جۋعىشتى ساتىپ الۋىن مىندەتتەگەن. نارىقتاعى بۇل جاعدايدان جانارماي قۇيۋ بەكەتتەرى قاۋىمداستىعىنىڭ وكىلدەرى دە حاباردار بولدى. ولار بۇل - تۇتىنۋشىلاردىڭ قۇقىن تاپتاۋ دەپ وتىر.

"دۇرىس نارسە ەمەس ول. ءار كومپانيا سونداي ۋاقىتتاردى پايدالانادى. ول ادامنىڭ جەتىسپەۋشىلىگىن پايدالانادى. ول دۇرىس نارسە ەمەس دەپ ويلايمىن"، - دەيدى و ق و جانار-جاعارماي قاۋىمداستىعىنىڭ ءتوراعاسى قايىپبەك قامباروۆ.

ال جانارماي ءوندىرۋشى كومپانيا باسشىلىعى بۇل جايتتەن بەيحابار بولىپ شىقتى. ەشكىمگە دە تاۋار الدىرۋ تالابى قويىلماعان دەپ وتىر. "كەرىسىنشە، وڭتۇستىكتەگى بەكەتتەردى مۇناي ونىمىمەن بارىنشا قامتىپ، تاپشىلىق بولماۋىن باقىلايمىز"، - دەيدى ونداعى وكىلدەر.

 "بۇل ماسەلەنى ءبىز زەردەلەيتىن بولامىز. تۇسىنىكسىز جاعداي بولىپ تۇر. مۇمكىن ساتۋشى مەن ساتىپ الۋشى ءبىر-ءبىرىن دۇرىس تۇسىنبەگەن بولۋى كەرەك. ءبىراق ءبىز مۇنى زەرتتەيمىز ءالى"، - دەيدى Sinooil ج ش س وكىلى تيمۋر ابىشيەۆ.

دەسە دە، كونبىستىككە سالىنعان كولىك يەلەرى ەش جەرگە شاعىم ايتىپ بارماعان.

NUR. KZ