تۇركيالىق اۋلا سىپىرۋشى ءوز وتانىندا باتىرعا اينالدى

استانا. قازاقپارات - تۇركيادا اۋلا سىپىرۋشى تۇرعىن ءۇيدىڭ جەتىنشى قاباتىنداعى تەرەزەدەن قۇلاعان ءتورت جاسار قىزدى قۇتقارىپ قالدى.

ول جوعارىدان قۇلديلاپ كەلە جاتقان ءبۇلدىرشىندى قاعىپ العان، دەپ حابارلادى تۇرىكتىڭ Dogan اقپاراتتىق اگەنتتىگى.

كەلەڭسىز جاعداي 28 - قاراشادا ەلدىڭ باتىسىنداعى ەسكيشەحير قالاسىندا بولعان. شۋكريۋ دەنيز تاپ جانىنا اسپاننان بالانىڭ اياق كيىمى تۇسكەن شاقتا ۇيلەردىڭ ءبىرىنىڭ ماڭىندا كوشە سىپىرىپ جاتقان. ول جوعارى قاراعان كەزدە اشىق تەرەزەنىڭ جاقتاۋىندا ويناپ وتىرعان قىزدى كورگەن. بالانىڭ قۇلاماۋى مۇمكىن ەمەستىگىن سەزگەن اۋلا سىپىرۋشى توتەنشە جاعدايعا وراي شالت شەشىم قابىلدادى.

«ول تەرەزە جاقتاۋىندا تۇرا الماي، قۇلاپ كەتتى. مەن ونى اۋادا ۇستاپ قالۋعا تىرىستىم. قىز قۇلاعان سوڭ قاتتى جىلادى. ءبىراق ەسىنەن تانعان جوق. مەن ەش جەرىم جاراقاتتانباعانىمەن قاتتى شوشىنىپ، بىرنەشە مينۋت بويى اياعىما تۇرا المادىم، دەپ مويىندادى دەنيز.

زارداپ شەككەن ءبۇلدىرشىن اۋرۋحاناعا جىبەرىلدى. ارادا ءبىر تاۋلىك وتكەن سوڭ ونىڭ تۋىستارى جاعدايى جاقسارعانىن حابارلاعان. بۇگىن، 30 - قاراشادا ءسابي ۇيىنە ورالادى.

تۇرىك اۋلا سىپىرۋشىسىنىڭ بۇل قادامى ەلدىڭ الەۋمەتتىك جەلىسىندە قىزۋ تالقىلانۋدا. دەنيز ءوز وتانىندا باتىرعا اينالدى.