تۇڭعىش پرەزيدەنت ءرولىن سومداۋ - حالىق الدىندا ۇلكەن جاۋاپكەرشىلىك - اكتەر ن. ءالىمجانوۆ

استانا. قازاقپارات - «تىعىرىقتان جول تاپقان» فيلمىندە ق ر پرەزيدەنتى نۇرسۇلتان نازاربايەۆتىڭ ءرولىن سوماداعان قازاقستاندىق اكتەر نۇرلان ءالىمجانوۆ فيلم پرەمەراسىندا كينوجوبا جايىنداعى ويلارىمەن ءبولىستى.

اكتەر ەلباسىنىڭ ءرولىن سومداۋ بارىسىندا حالىق الدىندا ۇلكەن جاۋاپكەرشىلىك سەزىنگەنىن ايتادى.

«بۇل تاريحي بەينە. ارينە، جاۋاپكەرشىلىك ۇلكەن. سوعان قاراماستان حالىق پەن پرەزيدەنت بىزگە ءوز باتاسىن بەردى»، - دەيدى ول.

 ايتا كەتەيىك، استاناداعى «قازاقستان» ورتالىق كونسەرت زالىندا ەلباسى نۇرسۇلتان نازاربايەۆتىڭ قاتىسۋىمەن «تىعىرىقتان جول تاپقان» فيلمىنىڭ پرەمەراسى وتۋدە.

ق ر مادەنيەت جانە سپورت مينيسترلىگىنىڭ تاپسىرىسىمەن شاكەن ايمانوۆ اتىنداعى قازاق فيلم كينوستۋدياسىنىڭ ق ر تۇڭعىش پرەزيدەنتى جايلى تۇسىرىلگەن «تىعىرىقتان جول تاپقان» فيلمى «ەلباسى جولى» كينو ەپوپەياسىنىڭ ءتورتىنشى ءبولىمى بولىپ تابىلادى.

وندا قازاقستان پرەزيدەنتى نۇرسۇلتان نازاربايەۆتىڭ 1970- جىلدارداعى ەڭبەك جولى، ساياساتقا ەندى عانا قادام باسقان ساتتەرى سۋرەتتەلگەن. فيلمنىڭ رەجيسسەرى - رۇستەم ءابدىراشوۆ.

ەسكە سالا كەتەيىك، 2011 - جىلدان بەرى «ەلباسى جولى» كينو ەپوپەياسى ءتۇسىرىلىپ كەلە جاتىر. بۇنىڭ الدىندا كينو ەپوپەياعا «بالالىق شاعىمنىڭ اسپانى» (2011) ، «وتتى وزەن» جانە «تەمىر تاۋ» (2013) فيلمدەرى ەنگەن بولاتىن.

 «تىعىرىقتان جول تاپقان» فيلمىنىڭ ءتۇسىرىلىمى 2014 - جىلى اقپان ايىندا باستالدى. كينوعا قازاقستاندىق اكتەرلەرمەن بىرگە ۆالەنتين گافت، ەۆگەنيي سيديحين، ۆلاديمير ستەكلوۆ، ەۆگەنيي ستىچكين، ۆيكتور سۋحورۋكوۆ سىندى رەسەيلىك اكتەرلەر ەندى. ەلباسىنىڭ بەينەسىن قازاقستاندىق اكتەر نۇرلان ءالىمجانوۆ سومدادى. فيلم كوپشىلىك نازارىنا 4 - جەلتوقساندا قازاقستاننىڭ 25 قالاسىندا 50 كينو تەاتردا تارتۋ ەتىلەدى دەپ جوسپارلانعان.

 اۆتور: جاسۇلان جولدىبايەۆ