دومبىرانىڭ قۇلاعىندا وينايتىن وزگە ۇلت وكىلدەرى قازاق ەلىنە العىسىن ونەرى ارقىلى جەتكىزدى

الماتى. قازاقپارات - قازاقكونتسەرتتىڭ كيەلى ساحناسىندا وزگە ۇلت وكىلدەرى قازاق اندەرى مەن كۇيلەرىنەن شاشۋ شاشتى.

 دومبىرانىڭ قۇلاعىندا ويناپ، قازاق اندەرىن ناشىنە كەلتىرە شىرقاعان ولار ءوز ونەرلەرىن قازاقستانعا ارنادى.

ق ر مادەنيەت جانە سپورت مينيسترلىگىنىڭ قولداۋىمەن وتەتىن مادەني شارا ق ر تۇڭعىش پرەزيدەنتىنىڭ كۇنى مەن قازاقستان حالىقتارى اسسامبلەياسىنىڭ 20  جىلدىعىنا وراي ۇيىمداستىرىلدى.

اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ سوليستەرى حاليد نۋراليەۆ، الەكساندر سمەتانين، ولەگ تاتاميروۆ، ايدا چاسوۆيتينا، يلونا تەن، مەملەكەتتىك حور كاپەللاسىنىڭ سوليستەرى سوفيانا بلاگودارنايا، يۆان پرىتكوۆ قازاقتىڭ كلاسسيكالىق تۋىندىلارىن اۋەلەتسە، «سالتانات» مەملەكەتتىك ءبي ءانسامبلىنىڭ ءبيشىسى ميلەنا مازۋر، «نايري» ارميان ءبي ءانسامبلى قازاقتىڭ ۇلتتىق بيلەرىن ناشىنە كەلتىرە ورىندادى.

«رودينا» كورەي مادەني ورتالىعىنىڭ حورى قازاق حالىق اندەرىنەن پوپۋري ۇسىندى.

ساحناعا قازاقتىڭ ۇكىلى دومبىراسىن الىپ ۆاسيليسا مۋرومتسيەۆا مەن گەورگي يۋگاي شىققاندا حالىقتىڭ قوشەمەتىندە شەك بولمادى.

 ولار «بالبىراۋىندى» قوسىلا ويناپ، ءارقايسىسى جەكە كۇيلەردى كۇمبىرلەتىپ قالىڭ كوپشىلىكتىڭ ريزالىعىنا بولەندى.

 سونداي- اق، ۇتتىق مادەني ورتالىقتاردىڭ وكىلدەرى يانيس كايفيدي (ۆوكال) ، ايدانا سادىقوۆا (ۆوكال) ، فۋات ماليكوۆ (ۆوكال) ، قالبىنۇر رازييەۆا (ۆوكال) قازاق اندەرىنەن شاشۋ شاشتى.

ۇيىمداستىرۋشىلاردىڭ ايتۋىنشا، اتالعان فەستيۆال قازاقستاندا تۇرىپ جاتقان بىرنەشە ۇلىستار مەن ۇلتتاردىڭ باسىن بىرىكتىرىپ، قازاقتىڭ قايتالانباس ۇلتتىق ونەرىن ءناسيحاتتاۋعا باعىتتالعان.

«ەلباسى ۇلتارالىق دوستىققا كوپ كوڭىل بولەدى. ول قازاقستان حالىقتارىنىڭ اسسامبلەياسى وتىرىسىندا قازاق تىلىندە ەركىن سويلەيتىن وزگە ۇلت وكىلدەرىن كورسە، قاتتى قۋاناتىنىن جەتىزگەن بولاتىن. سونداي- اق، ەلىمىزدە سول ۇلتتاردىڭ وزىندىك مادەنيەتى مەن ءتىلىن ساقتاۋدا بارىنشا جاعداي جاسالعانىن ايتا وتىرۋ كەرەك» ، - دەدى اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ ب ا ق- پەن بايلانىس جونىندەگى مەنەدجەرى اسەل مۋسينوۆا.

اۆتور: گۇلميرا عوسمانالي