كارىم ءماسىموۆ نازاربايەۆ ۋنيۆەرسيتەتى بيزنەستىڭ جوعارى مەكتەبى جانە مەملەكەتتىك ساياساتتىڭ جوعارى مەكتەبى اشىلۋىنىڭ سالتاناتىنا قاتىستى
بۇل شارا ق ر تۇڭعىش پرەزيدەنتى كۇنى مەرەكەسىنە ارنالدى، دەپ حابارلايدى primeminister.kz.
ۇكىمەت باسشىسى جوعارى وقۋ ورنىنىڭ جەتەكشىلىگىن جانە ستۋدەنتتەردى قۇتتىقتاي كەلە، جاڭا عيمارات ىرعاقتى دامۋ ۇستىندەگى نازاربايەۆ ۋنيۆەرسيتەتىنىڭ ودان ءارى قاناتىن كەڭگە جايۋىنا ىقپال ەتەتىندىگىن جەتكىزدى.
«عيمارات پەن جابدىقتار قازاقستاندىق ءبىلىم بەرۋدى جاڭا ساپاعا كوتەرە المايدى. بۇل ءۇشىن بىزگە جەتەكشى پروفەسسورلار، تالانتتى جانە شىعارماشىل ستۋدەنتتەر قاجەت. سىزدەردە بۇلار جەتىپ ارتىلادى دەگەن سەنىمدەمىن»، - دەدى ك. ءماسىموۆ ستۋدەنتتەرگە قاراتا ايتقان سوزىندە.
سونداي- اق، سالتاناتتى ءراسىم بارىسىندا نازاربايەۆ ۋنيۆەرسيتەتى مەن ق ر سىرتقى ىستەر مينيسترلىگى اراسىندا، نازاربايەۆ ۋنيۆەرسيتەتى مەن ق ر ءبىلىم جانە عىلىم مينيسترلىگى جانە ق ر ۇلتتىق بانكى اراسىندا ىنتىماقتاستىق جونىندەگى مەموراندۋمدارعا قول قويىلدى.
جوعارى وقۋ ورنىنىڭ جاڭا عيماراتىندا اۋقىمدى ءىس- شارالار، سەمينارلار جانە الەمدىك دەڭگەيدە فورۋمدار وتكىزۋگە مۇمكىندىك بەرەتىن كەڭ ءدارىس وقيتىن اۋديتوريالار، كونفەرەنتس- زالدار جانە ۆيديەكونفەرەنتسيا زالدارى بار.
عيماراتتىڭ جالپى اۋماعى 19000 شارشى مەتردى الىپ جاتىر. عيمارات ەكى مەكتەپتىڭ ستراتەگيالىق سەرىكتەستەرى - ديۋك ۋنيۆەرسيتەتىنىڭ فۋكۋا بيزنەس مەكتەبى جانە سينگاپۋر ۇلتتىق ۋنيۆەرسيتەتىنىڭ لي كۋان يۋ اتىنداعى مەملەكەتتىك ساياسات مەكتەبىنىڭ قاتىسۋىمەن جوبالانعان.
