ەستە ساقتاۋ وي سپورتى بويىنشا الەم چەمپيوناتىندا «گراندماستەر» دارەجەسىن يەلەنگەن جالعىز قازاق
2011 - جىلى قىتايدىڭ گۋاڭجوۋ قالاسىندا ەستە ساقتاۋ وي سپورتى بويىنشا (World Memory Championship) وتكەن جارىستا «گراندماستەر» دارەجەسىن العان 21 جاستاعى موڭعوليالىق قازاق ۇلانباتىر قالاسىندا تۇرادى.
ول - ەستە ساقتاۋ بويىنشا مونعوليالىق بەس گراندماستەردىڭ ءبىرى ءھام وسىنداي اتاق يەلەنگەن جالعىز قازاق. اقجول 1993 - جىلى الماتى وبلىسىنىڭ بۇرىنعى نارىنقول اۋدانىندا دۇنيەگە كەلگەن ەكەن. قازاق تىلىندە كىبىرتىكتەپ سويلەيتىن ول ازاتتىق تىلشىسىنە سىپايى تۇردە: «ءبىر جاسىمدا اتا- انام ۇلانباتىرعا قونىس اۋدارىپتى. سودان بەرى موڭعول ۇلتىنىڭ وكىلدەرىمەن ارالاسىپ كەلەم. بالاباقشادا، مەكتەپتە وقۋ موڭعول تىلىندە بولدى. سوندىقتان كەيبىر ويلارىمدى جەتكىزە الماي جاتسام، كەشىرىڭىز» دەدى.
ايتكەنمەن اقجولدىڭ ايتار ويىن قازاقشا بارىنشا تۇسىنىكتى ەتىپ جەتكىزۋگە تىرىساتىنى بايقالادى. ول بيىلعى جەلتوقسان ايىندا قىتايدىڭ حاينان قالاسىندا وتەتىن ەستە ساقتاۋ بويىنشا الەم چەمپيوناتىنا دايىندالىپ جاتقانىن ايتتى.
2011 - جىلى قىتايدىڭ گۋاڭجوۋ قالاسىندا وتكەن الەم چەمپيوناتىندا موڭعوليالىق قازاق جىگىت بەرىلگەن تاپسىرمالاردى 120 سەكۋند ىشىندە ورىنداپ، «گراندماستەر» دارەجەسىن يەلەنگەن. اقجول وسى وي سپورتى بويىنشا مونعوليانىڭ ەكى مارتە چەمپيونى ەكەن.
1991 - جىلدان بەرى تۇراقتى تۇردە ءوتىپ كەلە جاتقان الەمدىك ەستە ساقتاۋ چەمپيوناتىنا قاتىسۋشى 10 ءتۇرلى تاپسىرما بويىنشا ۇپاي جينايدى. اقجولدىڭ سوزىنشە، ءوڭ- ءتۇس، تاريحي وقيعالار، ەكىلىك ساندىق جۇيە، ادام جانە كۇنتىزبە اتاۋلارى، اۋەندى سيفرلار سياقتى تاپسىرمالاردىڭ بىرىنەن 90 اتاۋ بەرىلەدى. قاتىسۋشى سونى ەكى مينۋتتىڭ ىشىندە جاتتاپ، ايتىپ شىعۋى كەرەك.
ازاتتىق ءتىلشىسى اقجولدان كۇندەلىكتى ومىردە، وقۋدا مۇنداي ەستە ساقتاۋ قابىلەتىنىڭ پايداسى قانشالىقتى تيەتىنى تۋرالى سۇرادى.
ول وسى قابىلەتىنىڭ ارقاسىندا ۋنيۆەرسيتەتتە ەكى ماماندىقتى قاتار يگەرىپ جاتقانىن ايتتى. اقجول ءتۇرلى حالىقارالىق جارىستارعا دايىندالۋ جانە قاتىسۋ ءۇشىن ساباعىنان ءجيى قالۋعا ءماجبۇر. ءبىراق بۇل ماسەلە دە ەرەكشە جادى يەسى ءۇشىن كوپ قيىندىق تۋعىزبايدى.
«ەمتيحانعا ءبىر اي قالعاندا تاقىرىپتاردى مەڭگەرۋگە ءبىر- اق كۇن جۇمسايمىن. ءبىر كۇننىڭ ىشىندە ءار تاقىرىپتى جان- جاقتى وقىپ، تالداپ ايتىپ بەرە الام. ساباقتان قانشا قالسام دا، وسى ۋاقىتقا دەيىن وقىتۋشىلاردان بىردە- ءبىر رەت سوگىس الىپ كورمەپپىن» دەپ كۇلدى ول.
اقجولدىڭ اكەسى سەرىكحان توقيلا ۇلى جەكە كومپانيادا مەنەدجەر بولىپ قىزمەت ىستەيدى. وتباسىندا بەس بالاسى بار. اقجول بالالارىنىڭ ورتانشىسى ەكەنىن ايتقان اكەسى «ول مەكتەپكە التى جاسىندا باردى. مەكتەپتى التىن مەدالعا ءبىتىردى. ءتورت جاسىنان باستاپ شاحمات ويناۋدى مەڭگەردى. ال 11- سىنىپتى بىتىرگەن سوڭ «memory» ونەرىمەن اينالىسا باستادى» دەپ اقجولدىڭ ءومىربايانىن قىسقاشا اڭگىمەلەپ ءوتتى.
اقجول قازىر ۇلانباتىر قالاسىنداعى عىلىمي زەرتتەۋ جانە تەحنولوگيا ۋنيۆەرسيتەتىندە «جول قۇرىلىسى» ماماندىعى بويىنشا 2- كۋرستا وقىپ ءجۇر. ول موڭعول مەملەكەتتىك ۋنيۆەرسيتەتىن «ەلەكتروندىق اۆتوماتيكا» سالاسى بويىنشا دا ءبىتىرىپ شىققان.
ەستە ساقتاۋ قابىلەتى بويىنشا الەم چەمپيوناتىنا ازىرشە قازاقستاننان ەشكىم قاتىسىپ كورمەپتى.
«ازاتتىق» راديوسى
