قانات يسلام : گولوۆكين مەنىڭ قارسىلاسىم ەمەس

استانا. قازاقپارات - كاسىپقوي بوكستا قازاقستان نامىسىن قورعاپ جۇرگەن بوكسشىلارىمىز ساۋساقپەن سانارلىق. ونىڭ ىشىندە بۇگىنگى تاڭدا گەننادي گولوۆكيننىڭ ايى وڭىنان تۋىپ تۇر.

وعان ەشكىم كوز جۇمبايدى. وتە تالانتتى، نامىسشىل بوكسشى. بۇگىنگە دەيىن بىردە- ءبىر جەڭىلىستىڭ اشى ءدامىن تاتىپ كورگەن جوق. ۇلتى وزگە بولسا دا، قازاقتىڭ كەستەلى تونىن جامىلىپ، كوكبايراعىن جەلبىرەتىپ كەلەدى. ال، كاسىپقوي بوكستاعى قازاق ۇلاندارى تۋرالى اڭگىمە قوزعاي قالساق، بىردەن ەسىمىزگە قانداسىمىز قانات يسلام ورالادى.. .

بار- جوعى ەكى جىل ىشىندە 18 جەكپە- جەك وتكىزىپ، بارلىعىندا جەڭىسكە جەتكەن قاناتتان قازاق ەلى ۇلكەن ءۇمىت ارتىپ وتىر. ءتىپتى، جاقىندا اقپارات قۇرالدارىندا الداعى ۋاقىتتا قازاق ۇلانى گەننادي باعىندارعان بيىكتى باعىندىرۋ بىلاي تۇرسىن، وعان «قاۋىپ توندىرەدى» دەگەن الىپ- قاشپا اڭگىمەلەر شىعىپ، وقىرمان قاۋىمنىڭ قىزۋ تالقىسىنا اينالدى. جۇرت: «ەكى قازاقستاندىق بوكسشىنىڭ جۇدىرىعى قاشان شارشى الاڭدا تۇيىسەدى؟» دەپ الاسۇردى. ارينە، بوكسسۇيەر قاۋىمعا قىزىق كەرەك.

مۇنداي اڭگىمە قالاي پايدا بولدى؟ بۇگىن قاناتتىڭ وزىمەن سويلەسۋدىڭ ءساتى تۇسكەننەن كەيىن، وسى ماسەلە تۋرالى تاعى دا وقىرمان قاۋىممەن وي بولىسكەندى ءجون كورىپ وتىرمىز.

نەگىزى، بۇل پىكىردى ءبىرىنشى بولىپ حالىق نازارىنا ۇسىنعان قانات يسلامنىڭ پروموۋتەرى - نەلسون لوپەس. ول جۋرناليستەرگە بەرگەن ءبىر سۇحباتىندا قاناتتىڭ قارىمدى بوكسشى ەكەنىن ايتا كەلىپ: «كاسىبي رينگتە اتويلاپ جۇرگەن قازاقستاندىق بوكسشى - گەننادي گولوۆكينگە ءبىراز قيىنشىلىق كورسەتە الامىز» دەپ ايتىپ قالادى. بۇل جەردە باپكەردىڭ ويى قاناتتىڭ قانشالىقتى دەڭگەيدەگى بوكسشى ەكەنىن ايتۋ بولاتىن. ونىڭ كۇش- جىگەرىن گولوۆكيننەن كەم ەمەس دەپ تۇسىندىرگىسى كەلدى. وكىنىشكە قاراي، ب ا ق وكىلدەرى وتىز تىستەن شىققان ءسوزدى وتىز رۋلى ەلگە كۇنى ەرتەڭ جۇدىرىقتاسقالى جاتقانداي سۇيىنشىلەپ جەتكىزدى. تاراتىلعان اقپاراتتىڭ تارتىمدىلىعى سونشالىق، جاي بوكسسۇيەر قاۋىم عانا ەمەس، بەلگىلى سپورتشىلار دا، سپورت ساراپشىلار دا، سپورت ماماندارى دا ءوز ويلارىن ورتاعا سالىپ، قوس ساڭلاعىمىزدى ءبىر اپتاداي «قيالدارىمەن» جۇدىرقتاستىرىپ الدى. جەڭىمپازدارىن دا انىقتاپ، سىي- سياپاتىن دا بەرىپ تاستادى. بۇل دۇرىس پا؟
مەيلى، قانات بولسىن، مەيلى گولوۆكين بولسىن ەكەۋىنىڭ دە ءالى باعىندىرار بيىگى الدا ەكەنىن كوزىقاراقتى وقىرمان جاقسى بىلەدى. ەكەۋىنىڭ دە وزدەرى ونەر كورسەتىپ جۇرگەن سالماقتارىندا ءالى بوكستاسىپ ۇلگەرمەگەن تالاي مىقتى قارسىلاستارى جەتەرلىك. سونداي- اق، ەكەۋى دە شارشى الاڭدا ەكى ءتۇرلى سالماقتا ونەر كورسەتەدى.

ەكەۋى جۇدىرىقتاسۋ ءۇشىن اۋەلى ولار ءوز- ءوز سالماعىندا جەر بەتىندە تەڭدەسسىز اتانۋى كەرەك. ەكەۋىنە دە وزدەرى ونەر كورسەتەتىن ەكى ءتۇرلى سالماق كاتوگورياسىندا قارسىلاس قالماي، جۇدىرىقتارىن كىمگە سىلتەرىن بىلمەي اڭتارىلعان كۇنى «ەندى ءبىر- بىرىڭمەن شىعىڭدار» دەسە قالاي بولادى ەكەن؟ ! ال ودان بۇرىن ەكى وتانداسىمىزدى ءبىر- بىرىنە قارسى قويۋ ءبىر وتباسىندا تۋعان، ءبىر ناندى بىرگە ءبولىپ جەگەن، ەكى ەگىز ۇلدى ەرەگەستىرىپ، توبەلەستىرگەنمەن بىردەي دەگەن ءسوز.

بۇل ءبىزدىڭ پىكىرىمىز جانە تىلەگىمىز. تىلەگىمىز دەگەندە ەكەۋى جۇدىرىقتاسپاسا ەكەن دەپ وتىرعامىز جوق. ەكەۋىنىڭ ءوز- ءوز سالماقتارىندا قارسىلاستارى قالماي، سوسىن بارىپ، ءبىر- ءبىرىن كەزدەسۋگە شاقىرسا دەگەن وي. ال بۇل تۋرالى بوكسشىلاردىڭ ءوزى نە دەدى؟ ەندى سول جايىندا قىسقاشا توقتالىپ وتسەك.

جاقىندا گەنناديي گولوۆكين استانادا نازاربايەۆ ۋنيۆەرسيتىندە قوناقتا بولدى. جانكۇيەرلەرىمەن جۇزدەسۋ بارىسىندا قانات يسلام مەن ءوزىنىڭ اراسىنداعى داۋلى پىكىردە نازاردان تىس قالعان جوق. سوندا ءجۋرناليستىڭ سۇراعىنا جاۋاپ بەرگەن گەنناديي گولوۆكين: «بۇل اڭگىمە تۋرالى ءدال قازىر ءسوز قوزعاۋ ەش قيسىنعا كەلمەيدى. سەبەبى قانات ەكەۋىمىز ەكى سالماقتىڭ بوكسشىلارىمىز. سونداي- اق، ەكەۋىمىزدىڭ رەيتينگتىك كورسەتكىشىمىز دە ەكى ءتۇرلى. مەن قاناتتى كوپتەن بەرى بىلەمىن. ءبىز كەزدەسىپ، ارالاسىپ تۇرامىز. مەنىڭشە ول جەكە ءوزى مەنى جەكپە- جەككە شاقىرماۋى مۇمكىن. ونى ونىڭ باپكەرى جاساسا كەرەك. قازىرگى كەزدە ءبىزدى سالىستىرىپ نەمەسە قارسى قوياتىندار كوبەيىپ كەتتى. مۇندايدى دوعارۋ قاجەت»، - دەپ تاپ ءوتتى. وتە ورىندى جاۋاپ. بوكسشىنىڭ ءوزى ايتقانداي بۇل اڭگىمەنى ۇدەتۋدى دوعارعانىمىز ءجون سياقتى.

ال وسى تالاس- تارتىسقا بايلانىستى قانات يسلامدا قاراپ قالعان جوق. ول دا ءوزىنىڭ پىكىرىن اشىق ءبىلدىردى.

ول: «گولوۆكين مەنىڭ قارسىلاسىم ەمەس، ول ەڭ اۋەلى مەنىڭ وتانداسىم، تىلەكشىم. ەكەۋمىز دە قازاق ەلىنىڭ نامىسىن قورعاپ ءجۇرمىز. «اكەم - ورىس، شەشەم - كارىس، ءوزىم - قازاقپىن» دەپ الەمگە جار سالعان گەنا مەن ءۇشىن دە قازاق. ال قازاقتىڭ اتىنان شىعىپ، قازاقستاننىڭ تۋىن جەلبىرەتىپ جۇرگەن دوسىممەن قولعاپ ءتۇيىستىرۋ - ول وسى ەلدىڭ ازاماتى بولىپ تۇرعاندا ەش قيسىنعا كەلمەيتىن دۇنيە. مەندە ات جارىستىرۋ مەن اتاق تالاستىرۋ قاسيەتىمدە جوق. ەگەر، اتاق، ءمانساپ قۋسام اتا- جۇرتىما ورالماي- اق، قىتايدا جۇرە بەرەر ەدىم. ماعان كەرەگى الاش جۇرتىنىڭ ابىرويى. الەمدە قازاقتىڭ كوكبايراعى جەلبىرەگەنى كەرەك. قايدا جۇرسەم دە قازاقتىڭ تۋىن جەلبىرەتىپ، ءانۇرانىن اسقاقتاتىپ جۇرسەم سودان ارتىق باقىت جوق. ال وسى قازاقستان دەگەن ۇلكەن قارا شاڭىراعىمىزدىڭ بايراعىن بىرگە جەلبىرەتىپ، نامىسىن بىرگە قورعاپ جۇرگەن قوس باتىرىن ءبىر- بىرىنە قارسى قويۋ دەگەن اقىلعا سىيمايتىن دۇنيە. مەن بۇنى ۇلتقا، رۋعا بولەتىن ارانداتۋشىلىق دەپ تۇسىنەم» دەپ اتاپ ءوتتى.

ءيا، ەل نە دەمەيدى؟! «قوڭىراۋسىز كەرۋەننىڭ ءسانى قايدا؟ » دەمەكشى اتى شىققان باتىرلارىمىزدىڭ ارتىنان وسىنداي ءسوز ەرمەسە دە ءسانى كەلمەيتىن سياقتى.

ايتپاعىمىز قازاق ەلىنىڭ ابىرويىن اسىرىپ جۇرگەن ەكى باتىرمىز دا امان بولسىن! شارشى الاڭدا كەزدەسە مە، كەزدەسپەي مە ول الداعى ۋاقىتتىڭ ەنشىسى.. .

كۇنسۇلتان وتارباي

استانا