قازاق ونەرىنىڭ ساڭلاقتارى: سارىمالاي
سارىمالاي حالىق كۇيلەرىن شەبەر ورىنداۋمەن قاتار ءوز جانىنان «قارا جورعا»، «نار يدىرگەن»، «بۇلبۇل»، «جورعا ايۋ»، «شال بۇركىت»، «اق قاباننىڭ تولقىنى»، ت. ب. كۇيلەر شىعارعان.
سارىمالاي (سىدىق) 1835 - جىلى، قازىرگى باتىس قازاقستان وبلىسى، كازتالوۆ اۋدانىندا تۋىلعان. 1885 - جىلى تۋعان جەرىندە ومىردەن ءوتتى. حالىق كومپوزيتورى، سىبىزعىشى. جاسىنان جوقشىلىقتىڭ تاۋقىمەتىن كورىپ، مال سوڭىندا جۇرگەننەن «سارى مالاي» اتانعان. سارىمالاي سىبىزعىنى العاش اكەسىنەن ۇيرەنگەن. كەيىن سابىر ەسىمدى سىبىزعىشىدان شەبەرلىگىن شىڭداعان. ول وسى اسپاپتا حالىق كۇيلەرىن شەبەر ورىنداۋمەن قاتار، ءوز جانىنان كۇي دە شىعارعان. سارىمالايدىڭ شىعارمالارى باتىس قازاقستان، ورىنبور قازاقتارى مەن باشقۇرت ۇلتى اراسىندا كەڭ ناسيحاتتالعان.
سارىمالايدىڭ شىعارماسىن وسى زامانعا جەتكىزگەن ى. ۋالييەۆ سانالادى. سارىمالايدىڭ ول ورىنداعان ءبىرقاتار كۇيلەرىن 1936 -جىلى ب. ەرزاكوۆيچ جازىپ العان. سارىمالايدىڭ نوتاعا تۇسىرىلگەن «قارا جورعا»، «قوڭىر»، «شوڭاي»، «اقساق قوي»، «بالجىڭكەر»، «بوز ىنگەن»، «جەلمايا»، «جەتىم بالا» كۇيلەرى ءار ءتۇرلى جيناقتاردا جاريالانىپ كەلەدى.
سارىمالاي سىبىزعىدا كۇي شىعارۋدىڭ قۇرىلىمىن جەتىلدىرىپ، 3 تەسىكتى اسپاپتىڭ ويىعىن 6-عا جەتكىزگەن. وسى نەگىزدە قاراپايىم اسپاپتىڭ دىبىس اۋقىمى كەڭەيىپ، ءۇن بايلىعى مولايىپ، دياپازونى ارتا تۇسكەن.
