ن. نازاربايەۆتىڭ ەڭ العاشقى مەدالى تۋرالى نە بىلەسىز؟ - فوتو

استانا. قازاقپارات - ەلباسىنىڭ بالالىق، جاستىق شاعىنا قاتىستى ءاربىر دەرەكتەر وقىرمانداردىڭ قىزىعۋشىلىعىن تۋعىزادى. ەلباسىنىڭ سىنىپتاستارى مەن زامانداستارىنىڭ جەكە مۇراعاتتارىندا ساقتالعان، مۋزەيلەرگە قويىلعان كوپ جىلدار تاريحىن بۇككەن دەرەكتەرگە ءبىز دە ءۇڭىلىپ كورگەن ەدىك.

ق ر تۇڭعىش پرەزيدەنتىنىڭ قورىندا ساقتالعان، بۇگىنگە دەيىن كوپشىلىككە بەيمالىم بولىپ كەلگەن دەرەكتەر مىنا دەرەك ەرىكسىز وزىنە نازار اۋدارتتى. دەرەكتەرگە تەرەڭ ۇڭىلگەنىمىزدە نۇرسۇلتان نازاربايەۆ العاشقى ناگراداسىن ون التى جاسىندا العاندىعى بەلگىلى بولدى.

شالعايدا ورنالاسقان شامالعانداعى د. فۋرمانوۆ اتىنداعى مەكتەپتىڭ «جاس ناتۋراليستەر» ۇيىمىنا مۇشە بولعان نۇرسۇلتان نازاربايەۆتىڭ 1956-جىلى بۇكىلوداقتىق اۋىلشارۋاشىلىق كورمەسىنىڭ مەدالىمەن ماراپاتتالعانىن بىرەۋ بىلسە، بىرەۋ بىلە بەرمەس.

بۇل وقيعانىڭ تاريحى تۋرالى «جاس ناتۋراليستەر» ۇيىمىنىڭ مۇشەسى دۋندىچ ۆالەنتينانىڭ ەستەلىگىندە بىلاي باياندالادى: نۇرسۇلتان ءابىش ۇلى 9-سىنىپ وقىپ جۇرگەن كەزىندە «جاس ناتۋراليستەر» ۇيىمىنا مۇشە بولادى. ۇيىم بوتانيكا ءپانىنىڭ ءمۇعالىمى ەۆگەنيا ۆاسيليەۆنانىڭ جەتەكشىلىگىمەن ۇيىمداستىرىلادى. «جاس ناتۋراليستەر» ۇيىمىنا الدىن-الا ىرىكتەۋدەن وتكەن ەڭبەكقور، تاپسىرىلعان ىسكە جاۋاپتىلىقپەن قارايتىن وقۋشىلار عانا مۇشە بولعان. جاز بويى جاس ناتۋراليستەر مەكتەپ جانىنداعى جەر تەلىمىندە جۇمىس ىستەيدى.

جۇمىس كوكتەمدەگى ەگىستەن باستالىپ، جاز كەزىندە ەگىن، باۋ-باقشا كۇتىمىمەن جالعاسىپ، كۇزدە جيىن-تەرىنمەن اياقتالاتىن بولعان. 1956-جىلى كوميسسيا جاس ناتۋراليستەر وسىرگەن ونىمدەردى ماسكەۋ قالاسىندا وتەتىن بۇكىلوداقتىق اۋىل شارۋاشىلىق كورمەسىنە جىبەرۋ جونىندە شەشىم قابىلدايدى. كورمەگە جىبەرىلگەن ەكسپوناتتار-ونىمدەر جۇلدەلى ورىندارعا يە بولىپ، جەتى ادام مەدالمەن ماراپاتتالادى. وسىلايشا، نۇرسۇلتان نازاربايەۆ ءوزىنىڭ العاشقى ناگراداسىنا - بۇكىلوداقتىق اۋىلشارۋاشىلىق كورمەسىنە قاتىسۋشى مەدالىنە 1956-جىلى يە بولادى.

«جاس ناتۋراليستەر» ۇيىمىنىڭ مۇشەلەرى

تاعى ءبىر قىزىقتى دەرەك قازاقستان رەسپۋبليكاسى ۇلتتىق كىتاپحاناسىنىڭ قورىنان تابىلدى. ەلباسىنىڭ ءومىرى مەن قىزمەتىنە قاتىستى قورداعى 6 ماقالا كىتاپحاناعا كەلۋشىلەردىڭ نازارىن اۋدارتادى. اتاقتى عارىشكەر ۆ. ف. بىكوۆسكيدىڭ «ۆوستوك-5» كورابلىمەن 1963-جىلى عارىشقا اتتانعانى بەلگىلى. وسى جىلدىڭ 14-19- ماۋسىم ارالىعىندا عارىشتا بولىپ، وزىمەن بىرگە الىپ ۇشقان كومسومول توسبەلگىسىن جاس نۇرسۇلتانعا تابىس ەتكەنىن ءبىرىمىز بىلسەك، ءبىرىمىز بىلە بەرمەيمىز. بۇل تۋرالى «كومسومولسكايا پراۆدا» گازەتىندە 1964-جىلعى 16- قاڭتارىندا ماقالا جاريالانعان بولاتىن. ماقالانىڭ ءتۇپ نۇسقاسى مەن سۋرەتتەرى كىتاپحانا قورىندا ساقتاۋلى تۇر.

«كومسومولسكايا پراۆدا» گازەتىنىڭ 1964-جىلعى 16- قاڭتارىنداعى سانى.

ەلباسىنىڭ جاستىق شاعىنا قاتىستى قىزىقتا دەرەكتەر مۇنىمەن عانا شەكتەلمەيدى. بۇگىنگى كۇنى ق ر تۇڭعىش پرەزيدەنتى مۋزەيىندە ساقتالعان ءتۇرلى دەرەكتەر وسىنىڭ ايعاعى.

نۇرسەرىك جولبارىس

ماتەريالدى دايىنداۋعا ق ر تۇڭعىش پرەزيدەنتى مۋزەيىنىڭ باس عىلىمي قىزمەتكەرى ءلايلا وماروۆا قاتىستى. سۋرەتتەر ق ر تۇڭعىش پرەزيدەنتى مۋزەيىنىڭ قورىنان الىنعان.

BAQ. KZ