ۇلتتىق قوردان بولىنەتىن قارجى ەكونوميكانىڭ ءتيىستى سالالارىندا قۇرىلىمدىق رەفورمالار جۇرگىزۋمەن سۇيەمەلدەنەدى - ە. دوسايەۆ

الماتى. قازاقپارات - ۇلتتىق قوردان بولىنەتىن ينۆەستيتسيالار ەكونوميكانىڭ ءتيىستى سالالارىندا مىندەتتى تۇردە قۇرىلىمدىق رەفورمالار جۇرگىزۋمەن سۇيەمەلدەنەدى.

بۇل تۋرالى بۇگىن قۇرمانعازى اتىنداعى كونسەرۆاتوريا ستۋدەنتتەرىمەن كەزدەسۋدە ق ر ۇلتتىق ەكونوميكا ءمينيسترى ەربولات دوسايەۆ ايتتى.

«ول ءۇشىن حالىقارالىق قارجى ۇيىمدارىمەن بىرلەسكەن جۇمىس جۇرگىزىلەتىن بولادى. مىسالى، دۇنيەجۇزىلىك بانك، ازيا دامۋ بانكى، ەۋروپالىق قايتا قۇرۋ جانە دامۋ بانكى جانە يسلام دامۋ بانكى ءقازىردىڭ وزىندە- اق الداعى 3 جىلداعى 90 باسىم جوباعا شامامەن 9 ميلليارد دوللار بولۋگە دايىن»، - دەدى ە. دوسايەۆ.

ونىڭ ايتۋىنشا، جولداۋدا قارجىلاندىرۋدىڭ قاجەتتى كولەمدەرى مەن كوزدەرى بار ناقتى جوبالار ايقىندالعان.

ءبىرىنشى قادامىن مەملەكەت باسشىسى اعىمداعى جىلعى اقپاندا ەكونوميكالىق ءوسۋدى قولداۋ جانە جۇمىسپەن قامتۋ ءۇشىن ۇلتتىق قوردان 2014-2015 - جىلدارى ءبىر تريلليون تەڭگە (6 ميلليارد  $) ءبولۋ تۋرالى شەشىم قابىلداعان كەزدە جاسادى.

ەكىنشى قادام - بۇل «نۇرلى جول» جاڭا ەكونوميكالىق ساياساتى، ونى ىسكە اسىرۋ ءۇشىن 2015 - جىلدان باستاپ 2017 - جىلدارى ارالىعىندا ۇلتتىق قوردان جىل سايىن 3 ميلليارد دوللار بولىنەتىن بولادى.

«نۇرلى جول» جاڭا ەكونوميكالىق ساياساتى قانداي بولماق؟ بىرىنشىدەن، مەملەكەت باسشىسى اتاپ وتكەندەي، ول كونترسيكلدى بولادى. قىسقاشا ايتقاندا، بۇل ەكونوميكالىق باياۋلاۋ كەزەڭدەرىندە مەملەكەتتىك شىعىستاردى ءوسىرۋدى جانە جوعارى ەكونوميكالىق بەلسەندىلىك كەزەڭدەرىندە مەملەكەتتىك شىعىستاردى تەجەۋدى بىلدىرەدى.

 ەكىنشىدەن، جاڭا ەكونوميكالىق ساياسات ءبىزدىڭ ەكونوميكامىزداعى قۇرىلىمدىق رەفورمالاردى جالعاستىرۋعا باعىتتالاتىن بولادى. بۇل باسەكەگە قابىلەتتىلىكتى، ونىمدىلىكتى ارتتىرۋ، ەكونوميكانىڭ قۇرىلىمىن، ونىڭ جاڭا تاۋارلار شىعارۋ مەن قىزمەتتەر ۇسىنۋ قابىلەتىن جاقسارتاتىنىن بىلدىرەدى. سوندىقتان ۇلتتىق قوردىڭ جاڭا ينۆەستيتسيالارى ەكونوميكانى ودان ءارى قايتا جاڭارتۋعا باعىتتالادى. ەڭ الدىمەن بۇل - كولىك، ەنەرگەتيكا، يندۋستريالىق جانە الەۋمەتتىك ينفراقۇرىلىمدى، شاعىن جانە ورتا بيزنەستى دامىتۋ»، - دەدى ە. دوسايەۆ.

مينيستر ينفراقۇرىلىمدى دامىتۋ ىشكى سۇرانىستىڭ وسۋىنە ىقپال ەتىپ، جاڭا وندىرىستەردىڭ دامۋىنا، بيزنەس پەن حالىق ءۇشىن ىسكەرلىك بايلانىستار مەن جاڭا مۇمكىندىكتەردى ارتتىرۋعا، وڭىرلەردىڭ ەكونوميكالىق ينتەگراتسياسىنا قولايلى جاعداي تۋعىزاتىنىن اتاپ ءوتتى.

اۆتور: گۇلميرا عوسمانالي