اتا كاسىپتەن قول ۇزبەۋىمىز كەرەك - قىزىلوردا وبلىسى اكىمى

قىزىلوردا. قازاقپارات - بۇگىن مال شارۋاشىلىعىن دامىتۋ باعىتىندا اتقارىلىپ جاتقان جۇمىستار سارالاندى. جيىنعا وبلىس اكىمى قىرىمبەك كوشەربايەۆ قاتىستى، دەپ حابارلادى وبلىس اكىمدىگىنىڭ باسپا ءسوز قىزمەتىنەن.

 ءمۇيىزدى ءىرى قارا جانە تۇيەنىڭ سانى سالىستىرمالى كەزەڭدە ارتىپ وتىر. تيىسىنشە، ەت جانە ءسۇت ءوندىرۋدىڭ دە كولەمى كوبەيگەن. اسىل تۇقىمدى مال باسىن ارتتىرۋ ماقساتىندا سۋبسيديالاۋعا 1 367,4 ميلليون تەڭگە ءبولىندى. ۆەتەريناريالىق سالاعا قولداۋ كورسەتىلۋدە. اۋىل شارۋاشىلىعى باسقارماسىنىڭ باسشىسى داۋىربەك ءابۋوۆ «سىباعا»، «التىن اسىق»، «ىرىس» جانە «قۇلان» مەملەكەتتىك باعدارلامالارىنىڭ جوعارعى دەڭگەيدە ورىندالىپ جاتقاندىعىن ايتتى.

 ايماق باسشىسى ۇرىقتاندىرۋ پۋنكتەرىنىڭ تولىق جۇمىس جاساماي تۇرعاندىعىن سىنعا الدى. ءتيىستى سالا باسشىلارىنا قولدا باردى ءتيىمدى پايدالانۋدى قاتاڭ تاپسىردى.

 - قازىر ءارتاراپتاندىرۋ جۇمىستارى جۇرگىزىلىپ جاتىر. ءبىراق سونىمەن بىرگە اتا كاسىپتەن قول ۇزبەۋىمىز كەرەك. سوندىقتان مال شارۋاشىلىعىن عىلىمي تۇرعىدا زەرتتەۋ قاجەت. ى. جاقايەۆ اتىنداعى «كۇرىش عىلىمي- زەرتتەۋ ينستيتۋتىنىڭ» بازاسىنان مال شارۋاشىلىعى ءبولىمى اشىلدى. الداعى ۋاقىتتا وسى ءبولىمنىڭ نەگىزىندە «عىلىمي- وندىرىستىك ورتالىق» اشۋ جۇمىستارى جۇرگىزىلەتىن بولادى، - دەدى وبلىس اكىمى ق. كوشەربايەۆ.

 وبلىس باسشىسى ءالى توقمەيىلسۋگە ەرتە ەكەندىگىن اتاپ ءوتىپ، قالا، اۋدان اكىمدەرىنە «بايقوڭىر» ا ك ك جانە سالا ماماندارىنا جۇمىس قارقىنىن باسەڭدەتپەۋ قاجەتتىگىن تاپسىردى. اسىرەسە، بارلىق مال سويۋ پۋنكتتەرى، ەت جانە ءسۇت ءوندىرۋ زاۋىتتارى سانيتارلىق تالاپقا ساي بولۋ قاجەتتىگىن ەسكەرتتى.

 اۆتور: ەلۋباي اۋەزوۆ