ي. تاسماعامبەتوۆ: ءبىزدىڭ باستى مىندەتىمىز - جاۋىنگەرلىك قابىلەتتى، كەز-كەلگەن قاۋىپ-قاتەرلەرگە قارسى تۇرا الاتىن ارميا قۇرۋ

استانا. قازاقپارات - بۇگىن قورعانىس ۆەدومستۆوسى القاسىنىڭ وتىرىسى بارىسىندا قارۋلى كۇشتەردىڭ جاي-كۇيىنە بايلانىستى ءبىرقاتار ماسەلەلەر قارالدى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتىنەن.

القاعا قورعانىس مينيسترلىگى باسشىلىعىنىڭ وكىلدەرى، دەپارتامەنتتەر مەن باسقارمالاردىڭ باسشىلارى، اسكەر تۇرلەرىنىڭ باس قولباسشىلارى، تەكتەرىنىڭ، وڭىرلىك قولباسشىلىقتار اسكەرلەرىنىڭ قولباسشىلارى، اسكەري جوعارى وقۋ ورىندارىنىڭ، قورعانىس ىستەرى جونىندەگى دەپارتامەنتتەردىڭ باستىقتارى قاتىستى.

وتىرىس بارىسىندا قارۋلى كۇشتەردىڭ جاي-كۇيىنە بايلانىستى ءبىرقاتار ماسەلەلەر قارالدى. سونىڭ ىشىندە، اسكەرلەردىڭ جاۋىنگەرلىك ازىرلىگى، ق ر قارۋلى كۇشتەرىندەگى اسكەري ءتارتىپ پەن قۇقىق ءتارتىبىنىڭ جاي-كۇيى، ونى جاقسارتۋ جونىندەگى مىندەتتەر تالقىلاندى. ءبىزدىڭ جاۋىنگەرلىك ازىرلىگىمىزدىڭ قانشالىقتى ەكەندىگىن وڭتۇستىك اسكەري وكرۋگىن كۇتپەگەن تەكسەرۋ بارىسى ءىشىنارا كورسەتىپ بەردى.

3 مىڭنان استام ادام مەن 400 گە جۋىق اسكەري تەحنيكانى جانە 36 اۆياتسيالىق تەحنيكانى ءبىر ۋاقىتتا دابىل بەلگىسىمەن كوتەرگەن وسىنداي وقۋ- جاتتىعۋ كوپتەن بەرى بولماعان.

اسكەري تەحنيكانىڭ دامۋىنا قاراي جاۋىنگەرلەر الدىندا تۇرعان مىندەتتەر دە كۇردەلەنىپ كەلەدى. ولاردىڭ كولەمى ارتىپ، ەڭبەك سيپاتى ساپالىق تۇرعىدا وزگەرۋدە، مورالدىق، مورالدىق-پسيحولوگيالىق جانە دەنە جۇكتەمەلەرى ارتىپ كەلەدى. بۇل جەكە قۇرامنىڭ سانالى تۇرعىدا ءوسۋىن قاجەت ەتەدى. وسىلايشا، ءبولىمنىڭ جاۋىنگەرلىك ازىرلىگى ءاربىر اسكەري قىزمەتشىنىڭ جاۋىنگەرلىك ازىرلىگىنەن قالىپتاسادى.

كۇن تارتىبىندەگى مەملەكەت باسشىسىنىڭ «نۇرلى جول - بولاشاققا باستار جول» اتتى قازاقستان حالقىنا جولداۋىن ىسكە اسىرۋ ماسەلەسى دە ۇلكەن ماڭىزعا يە.

قازاقستان رەسپۋبليكاسىنىڭ قورعانىس ءمينيسترى ي. تاسماعامبەتوۆ: «جوعارعى باس قولباسشى - ەلىمىزدىڭ پرەزيدەنتى ءوز جولداۋىندا قارۋلى كۇشتەر الدىنداعى باستى مىندەتتى انىق بەلگىلەپ بەردى، ويتكەنى كۇشتى ەكونوميكاسىز قۋاتتى، جاۋىنگەرلىك قابىلەتتى، كەز-كەلگەن اسكەري-ساياسي، ەكونوميكالىق سيپاتتاعى قاۋىپ-قاتەرلەرگە قارسى تۇرا الاتىن ارميا بولۋى مۇمكىن ەمەس. سوندىقتان دا ءبىز ونى ىسكە اسىرۋعا بەلسەندى اتسالىسىپ، ءوز ۇلەسىمىزدى قوسۋىمىز قاجەت»، - دەپ اتاپ ءوتتى.

القادا سونىمەن قاتار قارۋلى كۇشتەر اۆياتسياسىن اپاتسىز پايدالانۋ، قورعانىس مينيسترلىگى قىزمەتىنىڭ 2015 - جىلعا ارنالعان جوسپارىن ورىنداۋ بارىسى، «قارۋلى كۇشتەردىڭ كۇندەلىكتى قىزمەتىن باسقارۋ ورتالىقتارىن» ماماندارمەن جاساقتاۋ ماسەلەلەرى تالقىلاندى.

قارۋلى كۇشتەردەگى اسكەري ءتارتىپ پەن قۇقىق ءتارتىبىنىڭ جاي-كۇيى ماسەلەسى بويىنشا القا وتىرىسىنا قاتىسۋشىلار بارلىق لاۋازىمدى ادامدار، قۇرىلىمدار مەن اسكەري باسقارۋ ورگاندارى اراسىندا ءتيىمدى جانە پراكتيكالىق ءوزارا ءىس-قيمىلدىڭ ورتاق نۇكتەلەرىن ايقىنداۋ اسكەري ءتارتىپتى نىعايتۋدا ۇلكەن ءرول اتقاراتىنىن اتاپ ءوتتى.