عالىمدار ۇلىتاۋدا قازاقتاردىڭ گەنەتيكالىق سىناعىن جۇرگىزۋدى ۇسىندى
«ۇلىتاۋ قازاقتاردىڭ ارالاسىپ، بىر-بىرىمەن باس قوساتىن ورتالىعى بولعان. وسىناۋ كەڭ دالادا تىلدىك ەرەكشەلىكتەر مەن ديالەكتىنىڭ جوقتىعى دا وسىدان. ۇلىتاۋ - ۇلت ۇياسى. سوندىقتان ونداعى حالىقتىڭ گەنەتيكالىق ماتەريالىن الىپ، قازاقتاردىڭ گەنوفونىنا زەرتتەۋ جاساۋعا بولادى»، - دەپ اتاپ ءوتتى ول بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە.
ونىڭ ايتۋىنشا، نازاربايەۆ ۋنيۆەرسيتەتىندە قازاقستانداعى جەرگىلىكتى حالىقتىڭ گەنەتيكالىق قۇرىلىمىنا زەرتتەۋ باستالعان. ساۋلەت ساكەنوۆ سول جۇمىستىڭ ۇلىتاۋ ولكەسىندە دە وتكىزىلگەنىن قالاپ وتىر.
«ءبىز ول كوماندامەن جۇزدەسىپ، ۇلىتاۋعا شاقىردىق. ولار كەيىن ۇلىتاۋعا سوعىپ، ول جەردەن دە گەنەتيكالىق ماتەريال الۋعا بولاتىنىن ايتتى. بۇل جوبا ءبىزدىڭ كومەگىمىزبەن جۇزەگە اسۋى ىقتيمال»، - دەيدى س. ساكەنوۆ.
«ءبىز قازاقتاردىڭ گەنەتيكالىق قۇرىلىمىن بىلگىمىز كەلەدى. سودان سوڭ گەنەتيكالىق بايلانىستاردى دا انىقتاعىمىز كەلىپ وتىر. قازاقتار ورتالىق ازيالىق مادەنيەتكە قالاي كەلگەنىن ءبىلۋ تۇرعىسىندا بۇل وتە قىزىقتى جوبا. ەگەر بارلىعى ىسكە اسسا، جىل سوڭىندا بەلگىلى بولادى»، - دەپ ءتۇيدى ءسوزىن ول.
ايتا كەتەيىك، س. ساكەنوۆ باستاعان ەكسپەديتسيا 2014-جىلى تامىز ايىندا ۇلىتاۋ ولكەسىندە بولعان ەدى. سونىڭ ارقاسىندا قىرۋار زەرتتەۋلەر جۇرگىزىلىپ، ايماقتىڭ Google Maps-تاعى كارتاسى جاسالدى.
اۆتور: جاسۇلان جولدىبايەۆ
