رەسپۋبليكالىق اسكەري-پاتريوتتىق اندەر بايقاۋىنىڭ باس جۇلدەسىن «ساربازدار ءانى» جەڭىپ الدى
«اسكەري اندەر» راديوفەستيۆالى - «قازاقستان» ر ت ر ك ا ق «قازاق راديوسى» مەن قازاقستان رەسپۋبليكاسى قورعانىس مينيسترلىگىنىڭ بىرلەسكەن جوباسى.
«قازاقستان» ر ت ر ك ا ق باسپا ءسوز قىزمەتىنىڭ حابارلاۋىنشا، جەڭىمپازدار ءتورت نوميناتسيا بويىنشا ماراپاتتالدى. «ۇزدىك اقىن» نوميناتسياسى بويىنشا ءاننىڭ ءسوزى مەن سازىن ءوزى جازىپ شىققان نۇرلان نۇرتازين جەڭىسكە جەتتى.
«ساربازدارى قازاقتىڭ» انىمەن ساحناعا شىققان تالعات كۇزەمبايەۆ «ۇزدىك ورىنداۋشى» اتاندى. «ماڭگىلىك ەل» ءانىنىڭ اۆتورى ماقسات جاۋتيكوۆ «ۇزدىك كومپوزيتور» اتاعىنا لايىق دەپ تانىلدى. راديوفەستيۆالدىڭ باس جۇلدەسى «ساربازدار انىنە» بۇيىردى. ولەڭى اسقار دۇيسەنبىنىكى، ءانى قۇرماش ماحاندىكى. ورىنداعاندار - جۇبانىش جەكسەن ۇلى، قۇرماش ماحان، داۋرەن سەيتجان.
كەڭەس وداعىنىڭ باتىرى، قازاقستان رەسپۋبليكاسىنىڭ ءبىرىنشى قورعانىس ءمينيسترى، حالىق قاحارمانى، اسكەر گەنەرالى ساعادات نۇرماعامبەتوۆتىڭ ەستەلىگىنە ارنالىپ ارنايى بايقاۋعا ءان جازىلدى. ونى نۇرلان نۇرتازين مەن جۇلدىزبەك ۇتەشقاليەۆ ورىندادى.
راديوفەستيۆال جەڭىمپازدارىن ماراپاتتاۋ ءراسىمى كەزىندە «قازاقستان» ر ت ر ك» ا ق ءتورايىمى نۇرجان مۇحامەدجانوۆا «وسكەلەڭ ۇرپاقتى پاتريوتتىق رۋح تاربيەلەۋدە» وسىنداي بايقاۋلاردى وتكىزۋدىڭ ماڭىزى ەرەكشە زور ەكەندىگىن اتاپ ءوتتى.
راديوفيەستيۆالدى وتكىزۋ ارقىلى اسكەري اندەردى كەڭ كولەمدە ناسيحاتتاۋ، ۇلتتىق مادەنيەتكە، ونەرگە دەگەن قۇرمەت سەنىمىن قالىپتاستىرۋ ماقساتى كوزدەلگەن.
جوبا جىل باسىندا باستاۋ الىپ، وسى ۋاقىت ىشىندە راديوفەستيۆالگە بارلىعى 200 دەن استام ءان كەلىپ ءتۇستى، ونىڭ ىشىنەن ەڭ ۇزدىك دەگەن 13 ءان ناتيجەسىندە فينالعا جولداما الدى. بايقاۋ كونگرەسس-حولل سارايىندا ۇلكەن گالا-كونسەرتپەن اياقتالدى.
راديوفەستيۆالعا ءاربىر قازاقستان ازاماتى قاتىستى: قازاقستان اۋماعىنداعى اسكەري بولىمدەردىڭ ساربازدارىنان باستاپ، كاسىبي انشىلەر مەن كوركەمدىك-ونەرپازدار ۇجىمدارىنىڭ وكىلدەرىنە دەيىن. بايقاۋدىڭ باستى تالاپتارىنىڭ ءبىرى بۇعان دەيىن ەش جەردە ايتىلماعان قازاق حالقىنىڭ اسكەري- رۋحتى اندەرىن ءتۇرلى ورىنداۋشىلىق مانەردە (ءداستۇرلى، اكادەميالىق، ەسترادالىق) ورىنداۋ بولدى. كوپتەگەن ءان اۆتورلارى ۇلكەن ساحناعا شىعۋ تاجىريبەسى جوق ونەرپازدار.
9 اي ىشىندە كوركەمدىك كەڭەستىڭ ىرىكتەۋىنەن وتكەن اندەر «قازاق راديوسى» مەن «شالقار» ۇلتتىق ارناسى ەفيرلەرىنەن بەرىلدى.
ايتا كەتەيىك، راديوفەستيۆالعا قاتىسۋعا تىلەك بىلدىرگەن ۇمىتكەرلەر شىعارمالارىن جاندى داۋىستا ورىندادى.
