قازاقستان سيركتەرى ءبىر بىرلەستىككە توپتاستىرىلادى

استانا. قازاقپارات - قازاقستان سيركتەرى ءبىر بىرلەستىككە توپتاستىرىلادى. بۇل تۋرالى بۇگىن ق ر پرەزيدەنتى جانىنداعى ادام قۇقىقتارى جونىندەگى كوميسسيانىڭ كەڭەيتىلگەن وتىرىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ايتتى.

بىزدەر ءۇشىن ەڭ وزەكتى ماسەلەنىڭ ءبىرى وڭىرلىك جانە ورتالىق مادەنيەت ۇجىمدارىن ۇيلەستىرۋ بولىپ وتىر. ماسەلەن، بىزدە 4 سيرك بار. ءارقايسىسى - جەكە مەملەكەت. ءبىر-ءبىرىنىڭ نە ىستەپ جاتقانىن بىلمەيدى. بۇكىل دۇنيەجۇزىندە سيركتەر بىرلەستىككە توپتاسقان. ديۋ سولەي سيركى، رەسەي سيركى ءبىر بىرلەستىك. ول دۇرىس»، - دەدى مينيستر.

ونىڭ اتاپ وتۋىنشە، 1 وڭىردەگى سيرك ترۋپپاسىن جەرگىلىكتى حالىق 3-4 ايدىڭ ىشىندە تاماشالاپ شىعادى. ونى كەلەسى ءوڭىردىڭ ەكىنشى ترۋپپاسى كەلىپ الماستىرماسا، وندا سيرككە ەشكىم بارمايدى.

«بىزدە ءار سيرك بولەك بولعاننان كەيىن ولاردىڭ قىزمەتى ۇيلەستىرىلمەيدى. سوندىقتان حالىق از بارادى. ەگەر سيركتەر ءبىر بىرلەستىككە توپتاسسا، ودان كەيىن ترۋپپالار ءبىر قالادان ەكىنشى قالاعا بارىپ ونەر كورسەتەتىن بولسا، كورەرمەن قاتارى مولايار ەدى»، - دەدى ول.

ا. مۇحامەدي ۇلىنىڭ ايتۋىنشا، وڭىرلەردەگى سيركتەردىڭ كادر، قارجىلىق ماسەلەلەرىنە مينيسترلىك ارالاسپايدى. مۇنىڭ بارلىعى جەرگىلىكتى اتقارۋشى ورگاننىڭ قۇزىرىندا بولادى.