الماتىلىقتار الەم چەمپيونى نازىم قىزايبايدى قارسى الدى
سپورتشىنىڭ جەتىستىگىن ءوز اۋزىنان ەستۋگە سپورت مەكتەبىنىڭ وقۋشىلارى، جاقىندارى، باپكەرلەر، ب ا ق وكىلدەرى جينالدى.
«شويىن جۇدىرىقتى» شىناشاقتاي قىز الەم چەمپيوناتىنداعى كەزدەسكەن قيىندىقتارىمەن ءبولىستى.
«مەن ءۇندىستاننان كەلگەن قارسىلاسىمدى بۇرىننان بىلەتىنمىن. ونىمەن وتكەن چەمپيوناتتا جۇدىرىقتاسقام. بۇعان تاكتيكالىق جانە تەحنيكالىق تۇرعىدان دايىن بولدىق. ماعان فينالداعى جەكپە- جەك اسا قيىن بولعان جوق. قازىرگى قۋانىشىمدى سوزبەن جەتكىزە المايمىن. بارلىعى ءبىزدىڭ كوماندانىڭ، باپكەرىمىزدىڭ ارقاسى. ەلىمنىڭ قولداۋىنا كوپ راحمەت»، - دەدى چەمپيون.
نازىم بولاشاقتا وليمپيادا ويىندارىنا قاتىسۋعا ءۇمىتى بارىن ايتتى.
«اقىرىنداپ سالماقتى وليمپيادالىق دەڭگەيگە كوتەرە باستايمىز. مەنىڭ ماقساتىم - وليمپياداعا قاتىسۋ»، - دەدى نازىم.
سپورتشىنىڭ باپكەرى قالمىرزاقوۆ جۇمابەك ءوزىنىڭ شاكىرتىنىڭ جۇمىسىنا تولىق ريزا ەكەندىگىن جەتكىزدى.
«بىزگە ەڭ قيىن سوققانى - رۋمىن سپورتشىسىمەن بولعان جەكپە- جەك. ول - وتە تاجىريبەلى كۇشپەن ۇراتىن سپورتشى. ونى جەڭگەن سوڭ، ءارى قاراي مۇلدە ۋايىمدامادىق. مەنىڭ شاكىرتىم - ەكى قولىمەن دە جۇدىرىقتاسا بىلەتىن ايەلدەر اراسىنداعى جالعىز بوكسشى. ونىڭ بۇل قابىلەتى ءبىراز قارسىلاستى ساستىرعانى راس. اسىرەسە، كورەيالىق سپورتشى مۇلدە نە بولعانىن تۇسىنبەي قالدى. سوسىن، ونىڭ قورعانىسى مىقتى. مەن وعان ۇنەمى ايتامىن، ءوزىڭ تاياق جەمەسەڭ ۇنەمى تىڭ بولاسىڭ دەپ. قىزىمىز ءبىر جەكپە- جەكتە 3-4 جۇدىرىقتى عانا جىبەرىپ وتىردى»، - دەدى ول.
ەستەرىڭىزگە سالا كەتەيىك، نازىم قىزايباي كورەيانىڭ چەدجۋ قالاسىندا وتكەن ايەلدەر اراسىنداعى بوكستان الەم چەمپيوناتىندا 48 كەلى سالماق ساناتىندا ءۇش قارسىلاسىن دا تىزە بۇكتىرىپ، التىن مەدالدى يەلەنگەن بولاتىن.
ازىرگە نازىم - قازاقستان بويىنشا ايەلدەردەن شىققان تۇڭعىش الەم چەمپيونى. قازىر ول الماتىداعى سپورت جانە تۋريزم اكادەمياسىندا ءبىلىم الىپ جاتىر.
سپورتشى بۇعان دەيىن شاڭىراق شاعىن اۋدانىنداعى وليمپيادالىق رەزەرۆتەگى دارىندى بالالارعا ارنالعان رەسپۋبليكالىق مەكتەپ- ينتەرناتىندا ءتالىم الىپ كەلگەن. سپورت مەكتەبىندە وقىعالى بەرى 6 جىلدا 6 رەت قازاقستان چەمپيونى، 2 رەت الەم چەمپيوناتىنىڭ جۇلدەگەرى بولىپ ۇلگەرگەن.
اۆتور: گۇلميرا عوسمانالي
