پاۆلودار وبلىسىنىڭ بۇرىنعى اكىمى ەرلان ارىن سوت زالىنان بوساتىلدى
سوت ەرلان ارىندى ق ر ق ك- نىڭ 307- بابىنىڭ 3- تارماعى بويىنشا «جاۋاپتى مەملەكەتتىك لاۋازىمدى اتقاراتىن تۇلعالاردىڭ قىزمەت وكىلەتتىگىن تەرىس پايدالانۋى» بويىنشا ايىپتى دەپ تاپتى.
ونى ءۇش جىلعا شارتتى تۇردە باس بوستاندىعىنان ايىرۋعا ۇكىم شىعارىلدى. سونىمەن بىرگە، سوتتىڭ وكىمىمەن ول «قۇرمەت»، «پاراسات» وردەندەرىنەن ايىرىلادى. پاۆلودار وبلىسىنىڭ ەكس- اكىمى سوت زالىندا قاماۋدان بوساتىلدى.
«مەن ۇكىمگە ريزامىن. جاقسىلىق كۇتتىك، وسىنىڭ ءوزى دە وڭ ناتيجە بولدى»، - دەدى ۇكىم شىعارىلعاننان كەيىن ەرلان ارىننىڭ ادۆوكاتى ايجان سابيرينا.
ەسكە سالا كەتەيىك، سوتتالۋشىعا قاتىستى ايىپتاۋلار نەگىزگى كۋاگەر، وتكەن جىلدىڭ كۇزىندە اقشا بوپسالاپ، ءىرى كولەمدە پارا العانى اشكەرەلەنگەن وبلىس اكىمىنىڭ بۇرىنعى كومەكشىسى باعۇستار ساپاروۆتىڭ جاۋاپتارى نەگىزىندە تاعىلعان ەدى. سوتتا وزىنە كەلگەن كۇدىكتەن قۇتىلۋ ءۇشىن ساپاروۆتىڭ ءوز كىناسىن مويىنداپ كەلۋ قاعازىن جازىپ، وندا اتالعان ءىس- ارەكەتتى ءوز باسشىسىنىڭ مۇددەسى ءۇشىن جاساعانىن بايانداعانى انىقتالدى.
العاشقىدا تەرگەۋ ەرلان ارىنعا 10 ەپيزود بويىنشا ايىپ تاقتى. ءبىراق تەرگەۋ بارىسىندا ەكى ايىپ قانا قالدى. قورعاۋشى تاراپتىڭ ءىستى تەرگەۋگە قايتا جىبەرۋ تۋرالى ءوتىنىشىن سوت قابىلداماي تاستادى.
ءسويتىپ، سوتتا كاسىپكەر يليا تەرەنچەنكودان 1,6 ميلليون تەڭگە الدى دەپ ايىپ قارالدى. بۇل قاراجات ەكس- اكىمنىڭ ايەلى ريزات ارىنعا تيەسىلى پاۆلودارداعى كوپبەيىندى كوللەدجگە «نيۆا» اۆتوكولىگىن ساتىپ الۋعا جۇمسالعان- مىس. تەرگەۋدىڭ مالىمەتىنشە، وسى وقۋ ورنىنا ەكى «گازەل» كولىگىن ساتىپ الۋ ءۇشىن تەندەردەگى جەڭىسكە جاردەمدەسەمىز جانە جالپى قورعان بولامىز دەپ، كاسىپكەر ۋملات ماتيەۆتەن 5,6 ميلليون تەڭگە كولەمىندە پارا الىنعان.
سوتتا ەكى كاسىپكەر دە اقشانى ساپاروۆتىڭ ءوزى عانا سۇراعانىن، اقشانى سوعان بەرگەنىن ايتتى. بۇعان قوسا، سوتتىڭ ءبىرىنشى كۇنى يليا تەرەنچەنكو ماتەريالدىق تالاپ قويۋدان باس تارتىپ، سوتتالۋشىعا ەشقانداي كىنا ارتپايتىنىن مالىمدەدى. «مەنىڭ ەرلان مۇحتار ۇلىمەن ەشقانداي قارىم- قاتىناسىم بولمادى جانە وعان ەشقانداي كىنا قويمايمىن»، - دەدى تەرەنچەنكو.
ول ءوزىن جابىرلەنۋشى دەپ سانامايتىنىن دا ايتتى. «ءساۋىر ايىنىڭ باسىندا وبلىس اكىمدىگىندە وبلىس اكىمىنىڭ ورىنباسارى ارسلان ءابدىقالىقوۆ مەنەن ارداگەر ءۇشىن «نيۆا» اۆتوكولىگىن ساتىپ الۋعا دەمەۋشىلىك كومەك كورسەتۋدى سۇرادى. يگى نيەتپەن مەن وعان كومەك كورسەتتىم. مەن ءوزىمدى جابىرلەنۋشى دەپ ەسەپتەمەيمىن، بۇل قايىرىمدىلىق بولدى، بۇل قاراجات ماعان شىعىن كەلتىرگەن جوق. مەن قارجى پوليتسياسىنا شاعىمدانبادىم. وندا مەنى شاقىرعان بولاتىن، سوندا عانا ءبارىن ءبىلدىم»، - دەدى تەرەنچەنكو. ءوز كەزەگىندە كاسىپكەر ۋملات ماتيەۆ تە پارانى ساپاروۆقا عانا بەرگەنىن راستادى.
ايتا كەتەيىك، پاۆلودار جۇرتشىلىعى ەكس- اكىم ءوزىنىڭ قولى لاس كومەكشىسىنىڭ تەرىس نيەتىنىڭ قۇربانى بولدى دەگەن پىكىردە. ەرلان ارىننىڭ ءوزى دە سولاي ويلايدى. ونىڭ ايتۋىنشا، وزىنە قاتىستى ءىس قولدان جاسالعان، مۇنى پارا بوپسالاۋ مەن الۋ جانە كاسىپكەردىڭ قارجىسىن جىمقىرۋ دەرەگى بويىنشا دالەلدەردىڭ جوقتىعى دالەل.
ەرلان ارىننىڭ ادۆوكاتتارى دا تەرگەۋ بارىسىندا جانە سوتتا وعان تاعىلعان ايىپتاردىڭ راستالماعانىن مالىمدەدى. ولاردىڭ ايتۋىنشا، تەرگەۋ و باستا ايىپتاۋ نيەتىمەن جۇرگىزىلدى، باستى كۋاگەر باعۇستار ساپاروۆ وسى جىلدىڭ شىلدەسىنە دەيىن ايىپتاۋشىلار قاتارىندا بولدى. قورعاۋشى تاراپ ول ەرلان ارىنعا قاساقانا جالا جاپتى دەپ ەسەپتەيدى.
پاۆلودار وبلىسىنىڭ بۇرىنعى اكىمى ەرلان ارىن وسىنىڭ الدىنداعى سوتتا سوڭعى ءسوزىن ايتتىپ جانە ءوزىنىڭ كىناسىز ەكەنىن مالىمدەگەن بولاتىن.
«مەن توعىز ايدان بەرى تەرگەۋ يزولياتورىندا وتىرمىن، بۇل - تۇرمە. ەشكىمگە مۇندا ءبىر كۇن دە، ءبىر ساعات تا وتىرماۋدى تىلەيمىن. ارينە، كۇدىك، ايىپتاۋ بويىنشا جانە تەرگەۋگە بايلانىستى وتىرۋ بۇل ەكى سوزبەن ايتىپ جەتكىزۋ وڭاي بولمايتىن سىناق شىعار. ءوز باسىمدا بولىپ جاتقان وقيعالاردى تاعى ءبىر وي ەلەگىنەن وتكىزۋگە، تارازىلاۋعا ۋاقىت بولدى. مەن ەڭ الدىمەن قازاقستان رەسپۋبليكاسىنىڭ ازاماتى رەتىندەگى كونستيتۋتسيالىق قۇقىعىمدى پايدالانا وتىرىپ، تەرگەۋ بارىسىندا كۋالىك ەتپەگەنىمدى ايتۋدان باستاعىم كەلەدى. تەرگەۋدىڭ العاشقى كۇنى- اق جاۋاپتى سوتتا عانا بەرەمىن دەپ مالىمدەدىم. ويتكەنى ماعان قارسى قويىلعان ەپيزودتاردىڭ بارلىعى بويىنشا ءىس جۇرگىزگەن تەرگەۋگە سەنبەدىم جانە ءالى كۇنگە دەيىن سەنبەيمىن. تەرگەۋ ۇلكەن زاڭبۇزۋشىلىقتارمەن جۇرگىزىلگەنىن تاعى دا ايتقىم كەلەدى. الدىن الا كەسىپ ءپىشۋ، جالا جابۋ، جالعان ءسوز، بار كىنانى ماعان ارتۋعا تىرىسۋ - بۇل قىلمىستىق ىسكە ىرگەتاس بولعان نەگىزگى ۇعىمدار وسىلار»، - دەدى ەرلان ارىن.
ونىڭ ايتۋىنشا، اتالعان تۇلعالار سوتتا ءوز جاۋاپتارىنان جاڭىلىسىپ، ءبىر- بىرىنە قايشى كەلىپ جاتتى. ول قارجى جىمقىرۋ تۋرالى ءىس بويىنشا ايىپتالىپ جاتقان ساپاروۆتىڭ سوتتا قالايشا كۋاگەر رەتىندە جاۋاپ بەرگەنىن تۇسىنە الماعانىن ايتتى. "ايىپتالۋشى ءابدىقالىقوۆتىڭ (ارسلان ءابدىقالىقوۆ - پاۆلودار وبلىسى اكىمىنىڭ بۇرىنعى ورىنباسارى) كۋاگەر رەتىندە سويلەۋى دە ماعان تۇسىنىكسىز. ماتيەۆ - پارا بەرۋشى، ول سوتتا ونى مويىندادى، ساپاروۆ اقسۋداعى تەندەردە پارا العانىن مويىندادى، وعان مەنىڭ قاتىسىم جوق. بۇل - كۋاگەرلەردىڭ تىكەلەي مالىمدەمەسى. ولاردىڭ نەگە قىلمىستىق جاۋاپكەرشىلىككە تارتىلماي وتىرعانى دا تۇسىنىكسىز"، - دەدى ارىن.
ەرلان ارىن ءسوز سوڭىندا اينالاسىنداعى بۇرىنعى ادامداردىڭ كەسىرىنەن سوتتالۋشى ورنىنان ءبىر- اق شىعىپ، ەل پرەزيدەنتىن جەرگە قاراتقانى ءۇشىن وكىنىش ءبىلدىردى. «مەن مەملەكەتتىك قىزمەتكەر ابىرويىنا كۇيە جاقپادىم، مەن ءۇشىن ەڭ اۋىرى - قازاقستاننىڭ ءىرى وڭىرلەرىنىڭ ءبىرى - پاۆلودار وبلىسىنىڭ بۇرىنعى اكىمى رەتىندە ايىپتالعانىم. ونىڭ ۇستىنە، اكىمنىڭ ەل پرەزيدەنتى - ەلباسى نۇرسۇلتان ءابىش ۇلى نازاربايەۆتىڭ سەنىمدى وكىلى ەكەنىن ايتقىم كەلەدى. ايىپتالىپ جاتقان كەزدە پرەزيدەنتتى جەرگە قاراتقانىمدى ايتقىم كەلەدى. وسى جاعدايدى پايدالانا وتىرىپ، مەن مەملەكەت باسشىسى - ەلباسى نۇرسۇلتان ءابىش ۇلى نازاربايەۆتان بۇل ءۇشىن كەشىرىم سۇراعىم كەلەدى. 1991 - جىلدىڭ جەلتوقسان ايىنان بەرى مەن پرەزيدەنتتىڭ رەفورمالارىن جاقتاپ، ونىمەن ءبىر كوماندادا بولدىم. مەملەكەت باسشىسىنىڭ كومانداسىندا بولۋدىڭ لاۋازىم ەمەس، كاسىپقوي، پاتريوت بولىپ، ءوز وتانىڭدى ءسۇيۋ ەكەنىن تۇسىنەمىن.»، - دەدى پاۆلودار وبلىسىنىڭ بۇرىنعى اكىمى.
ەسكە سالا كەتەيىك، مۇنىڭ الدىندا تاراپتاردى قاتار تىڭداۋ بارىسىندا مەملەكەتتىك ايىپتاۋشى راديمحان دۋدايەۆا پاۆلودار وبلىسىنىڭ بۇرىنعى اكىمى ەرلان ارىندى مۇلكىن تاركىلەۋمەن بىرگە بەس جىلعا باس بوستاندىعىنان ايىرۋدى سۇراعان بولاتىن. جازاسىن جەڭىلدەتەتىن جاعدايلار رەتىندە ول ايىپتالۋشىنىڭ بۇرىن سوتتالماعانىن، كامەلەتكە تولماعان بالالارى مەن مەملەكەتكە سىڭىرگەن كوپ ەڭبەگى بارىن اتادى.
