باۋىرجان يسلامحان فۋتبولدان قازاقستان بىرىنشىلىگىنىڭ ەڭ ۇزدىك ويىنشىسى اتاندى
مامانداردىڭ پىكىرىنشە، باۋىرجان يسلامحان بيىلعى ماۋسىمدى ءساتتى وتكىزگەن.
ال «قايرات» كومانداسى ماۋسىم بارىسىندا چەمپيوندىققا ۇمىتكەر كوماندالاردىڭ ءبىرى بولدى. دەگەنمەن، سوڭعى ويىنداردا قارسىلاستارىنا ەسە جىبەرىپ الىپ، ناتيجەسىندە قولا جۇلدەگە يە بولدى. سونىمەن قاتار، الماتىلىق كلۋب بيىل قازاقستان كۋبوگىن جەڭىپ الدى. بيىلعى بىرىنشىلىكتە باۋىرجان بارلىعى 5 گول سالىپ، ارىپتەستەرىنە 9 رەت گول سالۋعا مۇمكىندىك بەرگەن. سونداي- اق باۋىرجان بيىل ۇلتتىق قۇراما ساپىندا دا ءتاپ- ءتاۋىر ونەر كورسەتتى. ول 6 ماتچقا قاتىسىپ، قارسىلاستار قاقپاسىنا ەكى گول سالعان. ونىڭ ەنشىسىندە بارلىعى - 166 ۇپاي.
ەكىنشى ورىندا «استانا» فۋتبول كلۋبىنىڭ 28 جاستاعى جارتىلاي قورعاۋشىسى جانە ورتالىق افريكا رەسپۋبليكاسى ۇلتتىق قۇراماسىنىڭ ەڭ ۇزدىك ويىنشىلارىنىڭ ءبىرى - فوكسي كەتيەۆواما. ونىڭ كومانداسى بيىل ەل چەمپيونى اتاندى. كەتيەۆواما بارلىعى 16 گول سالىپ، چەمپيوناتتىڭ ەڭ ۇزدىك مەرگەن فۋتبولشىسى جانە ارىپتەستەرىنە 16 رەت گول سالارلىق ويىن ورنەگىن كورسەتىپ، ەڭ ۇزدىك كومەكشى فۋتبولشى اتاندى. ونىڭ ەنشىسىندە - 86 ۇپاي.
ءۇشىنشى ورىندا «اقتوبە» فۋتبول كلۋبىنىڭ 30 جاستاعى جارتىلاي قورعاۋشىسى مارات حايرۋللين. كوماندا بيىل ەل بىرىنشىلىگىنىڭ كۇمىس جۇلدەگەرى اتاندى. ول «گول+پاس» جۇيەسى بويىنشا 20 ۇپاي جيناقتادى. بيىلعى ماۋسىمنان كەيىن مارات كلۋب تاريحىندا ەڭ كوپ ويناعان جانە ەڭ كوپ گول سالعان فۋتبولشى اتاندى. ول ءارى قازاقستاندىق كلۋبتارىنىڭ ساپىندا ەۋروپا كۋبوكتارىندا ەڭ كوپ ويناعان ويىنشى.
ايتا كەتەلىك، قازاقستان بىرىنشىلىگىنىڭ ەڭ ۇزدىك ويىنشىسى «Sports.kz» پورتالىنىڭ «الماس» جوباسىنىڭ ساۋالناماسى ارقىلى انىقتالدى. بۇل جوبانى پورتال 2011 - جىلى قازاقستان بىرىنشىلىگىنىڭ ەڭ ۇزدىك فۋتبولشىسىن اي سايىن جانە ماۋسىم سايىن انىقتاپ تۇرۋ ءۇشىن قولعا العان بولاتىن. وتكەن جىلى «شاحتەر» كلۋبىنىڭ شابۋىلشىسى اندرەي فينونچەنكو ەڭ ۇزدىك ويىنشى اتانسا، 2011-2012 - جىلدارى «جەتىسۋ» (تالدىقورعان) جانە «ەرتىس» (پاۆلودار) كوماندالارىندا ونەر كورسەتكەن وزبەكستاندىق فۋتبولشى ۇلىقبەك باكايەۆ ەڭ ۇزدىك ويىنشى بولىپ تانىلعان ەدى.
