ايدىڭ ارعى بەتىن كورگىڭىز كەلە مە؟ - فوتو
ورتالىق ازيا اۋماعىندا تۇڭعىش رەت ۇيىمداستىرىلىپ وتىرعان كورمە ۇلتتىق مۋزەيدىڭ زاماناۋي زالدارىندا وتۋدە. ەكسپوزيتسيا 3 ينستاللياتسيادان جانە مۇسىننەن تۇرادى. ءاربىر ينستاللياتسيا سۋرەتشىنىڭ اقيقاتقا اينالعان ويى مەن قيالىنىڭ كوكجيەگىن كورسەتىپ، ونەرسۇيەر قاۋىمدى بىرەگەيلىگىمەن تاڭ قالدىرادى. ەندەشە، قايتالانباس كورمەگە ساياحات جاساپ كورەيىك.
كورمە زالىنا كىرگەن بەتتە ءسىز وسىنداي ونەر تۋىندىلارىمەن تانىسا الاسىز. قاڭىلتىردان جاسالعان بۇل گۇل كەسكىندەرى ءومىردىڭ قارا جاعىن نەمەسە تابيعاتتاعى قويۋ قاراڭعىلىقتى بەينەلەيدى.
گۇل كەسكىندەرىن جاقىننان كورسەڭىز جاپىراقتاردان ءتۇرلى بەينەلەردى كورۋگە بولادى. انىقتاپ قاراعاندا قوزعالىستاعى ادام بەينەسى كورىنەدى. بۇل قويۋ قاراڭعىلىقتا دا قوزعالىستىڭ توقتامايتىندىعىن بىلدىرەدى.
ال، مىنا زالدا قاڭىلتىردان جاسالعان 20 مىڭنان استام گۇل كەسكىندەرى بار. بەرگى جاعىنان قاراساڭىز بارلىعى بىردەي قارا ءتۇستى. ول جوعارىدا ايتىپ وتكەنىمىزدەي، قاراڭعىلىقتى بەينەلەيدى. ەندى گۇل كەسكىندەرى تۇرعان الاڭنىڭ كەلەسى بەتىنە شىعىپ كورەيىك. الاڭنىڭ ارعى بەتىنەن كەسكىندەردىڭ ءتۇسى مۇلدە باسقاشا. ول تومەندەگى سۋرەتتە:
الاڭنىڭ ارعى بەتىنەن قاراعاندا گۇل كەسكىندەرىنىڭ ءتۇرلى- ءتۇستى ەكەنىن كورە الاسىز. ونىڭ جاپىراقتارى مەن ساباقتارىنان ءتۇرلى بەينەلەردى كورىپ عانا قويماي، تىرشىلىكتەگى سان الۋان تۇستەردى دە بايقاۋعا بولادى.
كورمە زالىنىڭ كەلەسى بولىگىندە قويۋ قاراڭعىلىقتاعى اي كەسكىنىن تاماشالاۋعا بولادى. تۋىندىنىڭ بەتىندە تۇندە دە تىنىم تاپپايتىن جاندىكتەر بەينەلەنگەن. جاندىكتەردىڭ سۋرەتىن جاقىننان كورۋ ءۇشىن تومەندەگى سۋرەتكە نازار اۋدارىڭىز:
ءتۇن. تىنىشتىق. ءبىراق جاندىكتەر ەشقاشان تىنىم تاپقان ەمەس. كورمە اۆتورى تۇنگى تىرشىلىكتى وسىلايشا بارىنشا اشىپ كورسەتۋگە تىرىسقان. بۇل اي كەسكىنىڭ بەرگى بەتىندەگى بەينەلەر. ال، ايدىڭ ارعى بەتىندەگى تىرشىلىك قانداي ەكەن؟ بۇل سۇراققا كەلەسى سۋرەتتەن جاۋاپ تابۋعا بولادى:
بۇل ايدىڭ ارعى بەتى. دۇنيە جاڭارىپ، تىرشىلىك سان ءتۇرلى تۇسكە بويالعان. تىرشىلىكتەگى سانسىز بوياۋدى تاماشالاۋ ءۇشىن سىزگە كەلەسى سۋرەتتى ۇسىنامىز:
اۆتور ءتۇرلى- ءتۇستى بوياۋ مەن كەسكىن بەينەلەر ارقىلى تىرشىلىكتى وسىلايشا بارىنشا سۋرەتتەۋگە تىرىسقان.
كورمەنى ءسىز ءار كۇن سايىن ساعات 09.00-17.00 اراسىندا ق ر ۇلتتىق مۋزەيىنەن تاماشالاي الاسىز. كورمەدەن رۋحاني مول اسەر الاتىندىعىڭىزعا سەنىمدىمىز!
نۇرسەرىك جولبارىس، عابيت ماداليەۆ (فوتو) .
