قىتايدىڭ «ساني گرۋپ» كومپانياسى سىر وڭىرىندە سەمەنت زاۋىتىن سالۋدى جوسپارلاپ وتىر

قىزىلوردا. قازاقپارات - بۇگىن قىزىلوردا وبلىسىنىڭ اكىمى قىرىمبەك كوشەربايەۆ قىتايدان كەلگەن حالىقارالىق «ساني گرۋپ» كومپانياسىنىڭ وكىلدەرىن قابىلدادى، دەپ حابارلادى وبلىستىق اكىمدىكتىڭ باسپا ءسوز قىزمەتىنەن.

بۇل كومپانيا وبلىستاعى قۇرىلىس جانە مۇناي-گاز سالاسىنا قىزمەت كورسەتۋگە ينۆەستيتسيا سالماق. كومپانيا باس ديرەكتورىنىڭ ورىنباسارى لي تسزيانحۋا قازاقستان مەن قىتاي ەلى اراسىنداعى دوستىق جانە ەكونوميكالىق قارىم-قاتىناستىڭ جىلدان جىلعا نىعايىپ كەلە جاتقانىن ايتتى. ولار سىر وڭىرىندە قۇرىلىس يندۋسترياسى مەن قۇرىلىس ماتەريالدارىن ءوندىرۋدى دامىتۋدى كوزدەپ وتىر. سونىڭ باستاماسى رەتىندە ايماقتا سەمەنت شىعاراتىن زاۋىت سالۋدى جوسپارلاپ وتىرعاندىقتارىن جەتكىزدى. كومپانيانىڭ بۇل سالادا تاجىريبەسى مول. اتاپ ايتقاندا، يندونەزيادا اۋقىمدى يندۋستريالىق ايماقتى وسى كاسىپورىن سالعان. بۇگىندە سول ەلدىڭ تاجىريبەسىن وسى وڭىردە قولدانباق.

ايماق باسشىسى قىزىلوردانىڭ الەۋمەتتىك-ەكونوميكالىق جاعدايىمەن تانىستىرا كەلىپ، ەلباسى شاعىن جانە ورتا بيزنەستىڭ دامۋىنا جان-جاقتى قولداۋ كورسەتىپ جاتقانىن ايتتى. ايماقتىڭ الەۋەتتىك مۇمكىندىگىن كەڭىنەن پايدالانا وتىرىپ، وتاندىق جانە شەتەلدىك ينۆەستيتسيانى وندىرىسكە، اۋىل شارۋاشىلىعى مەن تۇرعىن ءۇي-كوممۋنالدىق شارۋاشىلىققا، قۇرىلىس سالاسىنا تارتۋ كەرەكتىگىن، سونداي-اق، بۇگىندە وسى سالالاردا قىتاي ەلىنىڭ تەحنولوگيالارى بىزدە جوعارى سۇرانىسقا يە بولىپ وتىرعانىن اتاپ ءوتتى.

ەكىجاقتى كەزدەسۋ بارىسىندا تاراپتار ءوز ويلارىن ورتاعا سالىپ، پىكىر الماستى. الداعى جوسپارلار جايلى ايتا كەلىپ، دوستىق قارىم-قاتىناستىڭ دامي بەرۋى ءوز ناتيجەسىن بەرەدى دەپ سەنىم ءبىلدىردى.