تۇركيا پرەزيدەنتىنىڭ ەر مەن ايەل تەڭسىزدىگى تۋرالى ءسوزى داۋعا اينالدى
ستامبۋلداعى ايەل قۇقىعىنا ارنالعان بۇقارالىق شارادا تۇركيا پرەزيدەنتى ەر مەن ايەلدىڭ اراسىنداعى بيولوگيالىق ەرەكشەلىكتەرگە بايلانىستى ولاردىڭ تەڭ ەمەستىگىن ايتقان.
«ەر مەن ايەلدىڭ ادەتى دە، قىلىقتارى دا، دەنە ءبىتىمى دە بولەك. بالا ەمىزەتىن ايەلدى، ەركەكپەن تەڭەۋگە بولمايدى. ايەلدەر ەركەكتەر اتقاراتىن كەي جۇمىستاردى جاساي دا المايدى. ايەلگە جەر جىرتقىزۋدىڭ قاجەتى جوق. ول ونىڭ نازىك بولمىسىن بۇزادى. ايەلدى قۇرمەتتەۋ كەرەك، مەن انامنىڭ اياعىن سۇيەر ەدىم»، دەگەن ول تۇرىك فەمينيستەرىن سىناعان. ول انا قادىرىن تەرەڭ ءتۇسىنىپ، يسلامداعى ورنىن باعالاۋ كەرەكتىگىن ايتتى، دەپ جازادى «ر ي ا نوۆوستي».
كوپتەگەن باسىلىمدار تۇرىك باسشىسىنىڭ «گەندىرلىك تەڭدىكتىڭ بولۋى مۇمكىن ەمەس» دەگەن پايىمىن وسىعان دەيىن دە ايتقانىن ەسكە سالدى. سان- فرانتسيسكونىڭ SFGate باسىلىمى جازعانداي، وسىعان دەيىن ەردوگان ءار ايەلدە كەم دەگەندە ءۇش بالا تۋۋى كەرەك دەگەن. سونداي-اق، ول جاساندى تۇسىك جاساتۋ مەن زيناقورلىققا قارسى شىققان.
ەردوگاننىڭ مالىمدەمەسى الەۋمەتتىك جەلىلەردە دە قىزۋ تالقىلاندى. قۇقىق قورعاۋشى گۋليا گۋلباحاردىڭ ايتۋىنشا، تۇركيا پرەزيدەنتى گەندەرلىك تەڭدىك تۋرالى پىكىرىمەن ەل كونستيتۋتسياسىنا، تۇرىك زاڭدارى مەن حالىقارالىق كونۆەنتسيالارعا قايشى كەلدى.
