اتىراۋلىقتار اقتوبەدە يساتاي باتىردى تاعى ءبىر ۇلىقتادى

استانا. قازاقپارات - اتىراۋ وبلىسىنداعى يساتاي اۋدانى ازاماتتارىنىڭ قولداۋىمەن اقتوبە وبلىسىنىڭ شەيىتساي دەگەن جەردە حالىق باتىرى يساتاي تايمان ۇلىنىڭ كەسەنەسى تۇرعىزىلدى.

«مەن، مەن ەدىم، مەن ەدىم، مەن نارىندا جۇرگەندە، ەڭىرەپ جۇرگەن ەر ەدىم، يساتايدىڭ بارىندا، ەكى تارلان ءبورى ەدىم، قاي قازاقتان كەم ەدىم، ءبىر قازاققا تەڭ ەدىم»، دەپ اسقاق رۋحتى، داۋىلپاز اقىن ماحامبەت اعا تۇتىپ، جالاۋلى جىرىنا قوسقان حالىق باتىرى يساتاي تايمان ۇلى اقتوبە وبلىسىنىڭ قوبدا اۋدانىندا ماڭگىلىك تىنىستاعان.

تاريحي دەرەكتەرگە سۇيەنگەن عالىمدار باتىردىڭ سۇيەگى شەيىتساي اتالاتىن جەردە جەرلەنگەن دەگەن توقتامعا كەلدى.

وتكەن جىلدىڭ قىركۇيەگىندە اتىراۋ وبلىسىنداعى يساتاي اۋدانى مەن اقتوبەدەگى قوبدا اۋدانى اراسىندا ىنتىماقتاستىق بايلانىس ورناتۋ تۋرالى ەكىجاقتى مەموراندۋم جاسالىپ، سودان بەرى ىسكەرلىك تۇرعىسىندا ءبىرقاتار شارالار قولعا الىندى.

يساتاي اۋدانىنىڭ سول كەزدەگى اكىمى نۇرلىبەك وجايەۆ اقساقالدارمەن، عالىمدارمەن اقىلداسا كەلىپ، قوبدا اۋدانىنىڭ اكىمشىلىگىنە يساتاي باتىردىڭ كەسەنەسىن تۇرعىزۋ جونىندە ۇسىنىس ايتتى. بۇل ۇسىنىستى كورشىلەس وبلىستاردىڭ ىسكەر ازاماتتارى تاراپىنان قولداۋ تاپتى. وسىلايشا، يساتاي تايمان ۇلى قوعامدىق قورى قۇرىلىپ، وعان ەڭبەك ۇجىمدارى ءبىر كۇندىك ەڭبەكاقىلارىن اۋداردى، مۇناي كومپانيالارى مەن كاسىپكەرلەر دەمەۋشىلىك قاراجاتىن ءتۇسىردى.

قوبدا اۋدانىنداعى شەيىتساي جەرىندە 1991 - جىلى يساتاي باتىردىڭ 200  جىلدىعىن اتالىپ وتىلگەندە ەسكەرتكىش بەلگى ورناتىلىپتى. يساتاي اۋدانىنىڭ قازىرگى اكىمى تۇراربەك سۇلتانبەكوۆتىڭ ۇيىتقى بولۋىمەن بيىلعى شىلدەدە سول جەردە باتىر كەسەنەسىن تۇرعىزۋ ءۇشىن ماڭعىستاۋلىق شەبەر نۇرسۇلتان يماشيەۆ ىسكە كىرىستى.

كەسەنە قۇرىلىسىنا ماڭعىستاۋ وڭىرىنەن ءار داناسى 2,5 توننانى قۇرايتىن 52 تاس تەمىرجولمەن جىڭىشكە تەمىرجول بەكەتىنە دەيىن تاسىمالدانىپ، ودان ءارى 220 شاقىرىمداعى شەيىتسايعا اۆتوكولىكپەن اكەلىندى. ماڭعىستاۋلىق شەبەر نۇرسۇلتان يماشيەۆتىڭ ايتۋىنشا، كەسەنەنىڭ بيىكتىگى 10,5 مەتردى، ەنى 6 مەتردى قۇرايدى.

كەسەنە ىشىندە يساتاي تايمان ۇلى مەن ونىڭ ۇلى وسپاننىڭ ءومىر سۇرگەن جىلدارى مەن يساتاي باتىردىڭ بەينەسى، سونىمەن بىرگە، ماحامبەت اقىننىڭ «ارىستان تۋعان يساتاي، دەگەنىنە جەتە الماي، ارماندا ءوتىپ كەتتى دەپ، قينالساڭىز بىزدەرگە، مىڭ سان راحمەت سىزدەرگە!» دەگەن شۋماق ولەڭى قاشالىپ جازىلعان.

باتىر كەسەنەسىنىڭ اشىلۋىنا اتىراۋ قالاسىنىڭ اكىمى نۇرلىبەك وجايەۆ پەن يساتاي اۋدانىنىڭ اكىمى تۇراربەك سۇلتانبەكوۆ، قوبدا اۋدانى اكىمىنىڭ ورىنباسارى بولات كۋلوۆ، يساتاي باتىردىڭ ۇرپاقتارى اتىنان عازيز شاماقوۆ پەن امانعالي قۇرمانوۆ، وزگە دە جاناشىر ازاماتتار قاتىستى، دەپ جازادى egemen.kz.